تاکبند گوناپ ءِ سر ءَ چندیں دانک

 چمشانکار: عامر صالح

‎تاکبند گوناپ ھما تاک انت کہ بلوچی لبزانک ءَ اے تاک یک نوکیں گیشی یے۔ ھمے رنگ ءَ ایشاں پدر کتگ کہ کار کنوکیں مردم چون کار کن انت۔ ءُ بلوچی لبزانک ءِ مردماں گُشتگ اِش  کہ تاک چوش اوں کَشگ  بیت۔ تاکبند گوناپ ءِ مستریں شری اش انت کہ چہ ایندگہ تاکاں چَٹ جُتا انت۔

 تاکبند گوناپ ءَ وتی پَجار گوں یک انچیں دروشمے ءَ کُتگ وانوک سما کن انت کہ اے تاک ءَ الم یک نوکیں چیزے مان بیت ءُ اے تاک الم ءَ زورگی انت۔  منی ھیال ءَ اے زمانگ ءَ اے بلوچی ءِ اولی تاک  بیت انت کہ مردم نھاد ءَ نہ چار انت ءُ گش انت یکے پمن ایر کن کہ ھلاس مہ بنت بلے ھما وانوکیں مردم کہ آ لبزانک ءَ سنگینیں رنگے ءَ زور انت۔ 

اے رندی گوناپ تاکبند ءِ شونکار ءَ یک نوکیں گیشی یے وتئی تاک ءِ تہ ءَ آؤرتگ کہ رجانک ءِ ارزشت ءِ سر ءَ ھر تاک ءَ سیریزی رنگے ءَ سرپدی دیان کن انت کہ رجانک چی یے ءُ چے پیم ءَ کنگ بیت۔ اے پہ وانوکاں  نوکیں چیزے ءُ یک رجانک تاکے ءِ المی بھرے زانگ بیت۔ 

‎تاکبند گوناپ ءِ فارسی تاک ءَ رند دومی تاک عربی لبزانک ءِ سر ءَ انت۔ اے تاک ءِ دست کپگ ءَ رند سما کپت کہ ایشی ءِ  شونکاراں چینچو محنت کتگ ءُ وتی اے کار ءَ چینکدر سوبین بوتگ انت۔ اول سر ءَ کہ تاکبند ءِ لڑ دیست تہ ھیران مَنّتاں کہ اے آزمانک ءُ اے لچہ کہ ھما زبان ءَ چہ رجانک بیتگ انت بلوچی ءَ اتکگ انت من ناں آ نبشتہ کارانی نام پیسر ءَ اشکتگاں ءُ نئیکہ ونتگاں ءُ ھمے داب ءَ بلوچی ءَ رجانکارانی لڑ دیست کہ تاکبند گوناپ ءِ شونکار ءَ اے مردم کجا چہ آؤرتگ انت۔ پرچہ کہ من گیشتریں رجانکار  بس گوناپ تاکبند ءَ دیستگ انت دگہ جاہ ءَ اے نام من نہ دیستگ انت۔ اے ھم گوناپ ءِ کمال انت کہ نوکیں مردماں لبزانک ءَ گوں آشنا کنگ ءَ انت ءُ آیاں دیم ءَ آرگ ءَ انت۔ دیمتر ءَ کار کنگ ءِ سکین ءَ دیگ ءَ انت۔

‎من اے تاک ءِ وانگ ءَ پد ھمے سما کت کہ تیوگ ءَ بلوچی تاکے ءُ بلوچی لبزانک ءَ پہ انچیں گیشی یے کہ اے تاک داں کرناں وتی جاہ ءَ مان ایت۔  عربی لبزانک شاھگانیں لبزانکے ءِ بستار ءَ زانگ بیت ءُ اسل ءَ ھم باز شاھگان انت۔ اگاں کسے پہ چمشانک عربی لبزانک ءَ بلوچی ءَ وانگ لوٹ ایت تہ مستریں درور ءُ کتاب تاکبند گوناپ عربی انت۔ 

تاکبند گوناپ ءَ انچیں نبشتہ کار رجانک بوتگ انت کہ پیسر ءَ ماں بلوچی لبزانک ءَ چوشیں نام  کدی اوں نہ دیستگ۔ ءُ پد آیانی ساچشتانی وانگ ءَ رند سما کتگ کہ چونیں ساچشتکار انت ءُ چے رنگ ءَ وتی ڈیھ ءِ غماں گار انت۔ 

‎تاکبند ءِ  آزمانک بہ بنت یا کہ لچہ گیشتر گوں وتئی ڈیھ ءَ ھمگرنچ انت۔ عربی لبزانک ءَ ھم ھمے داب ءَ ڈیھ ءِ غم ءُ درد ھست انت ھمے رنگ ءَ مئے زمین بلوچستان ءُ بلوچی لبزانک انت۔ ھمے رنگ ءَ کہ بلوچستان استان ءِ کالونزم ءِ تہ ءَ بندیگ انت ھمے رنگ ءَ  فلسطین ءُ عراق انت۔ یک گلامیں راجے ءِ گور ءَ لبزانک چے رنگ ءَ سان زور ایت ءُ سھرا بیت  ایشی ءَ پہ تاکبند گوناپ ءِ عربی تاک مئے دیم ءَ انت۔ فلسطینی زھگ چے رنگ وتی گلھاں ءُ وتی بزگیاں نمدی ءِ دروشم ءَ ھدا ءَ گوں درشان کن انت اے تاکبند ءِ وانوک سما کنت۔ سے گدار جتائیں نبشتہ کارانی ءُ جتائیں رجانکاراں رجانک کتگ انت کہ ایشانی اولی بھر اے تاک ءَ مان انت ءُ دگہ کسمانک انت اے کُل وانگ کرز انت۔ بلوچستان ءُ بلوچی لبزانک ھم چہ اے سان ءَ در نئیتکگ۔ بزاں ھمے داب ءَ مئے ڈیھ انت ءُ لبزانک انت ھمے رنگ ءَ  فلسطین ءُ عراق انت۔ بوت کنت فلسطین ءُ عراق ءِ جیڑہ دگر بہ بنت (پرچہ کہ من آشنا نیاں) ءُ بلوچستان ءِ جیڑہ دگر بنت بلے وھدے کہ کسے تاکبند گوناپ ءِ عربی لبزانک تاک ءَ وان ایت تہ آئی ءِ دیم ءَ ھمے درد ءُ اندوہ پدر بنت کہ یک بلوچستانی زھگے ئیگ انت۔ 

‎گوناپ ءَ ھرچ چیزے من ونت من ءَ ھچ جاہ ءَ اے سما نہ بوت کہ من دَری چیزے وانگ ءَ آں۔ ھمے سما بیتگ  من بلوچستان ءِ کسہ ءَ وانگ ءَ آں۔ بوت کنت کہ منی وتی ھیال بہ بنت بلے ھمے رنگ ءَ روان ات داں تاک ھلاس بوت ءُ  اگاں ساچشتانی رجانک ءِ بابت ءَ گپ بکن آں تہ  من ایشانی اسل ساچشت وَ نہ ونتگ آں بلے اے تاک ءَ ھرچ ساچشتے ونتگ  تہ ایشی ءِ  تہ ءَ من ھچ جاہ ءَ درامدی نہ مار اتگ۔ ھر کجا تاک ءَ من ءَ گوں وت بران کُتگ۔  یک شریں چیزے من اے اوں دیست کہ ھرچ نبشتہ کارے کہ رجانک بوتگ آئی ءِ بابت ءَ  ھم چیزے نویسگ بوتگ کہ کئے انت ءُ آئی ءَ عربی لبزانک ءَ چی داتگ ءُ ھرچ ساچشتے کہ رجانک بوتگ کجا چہ زورگ بیتگ۔ اے سرشون ھم دئیگ بیتگ انت کہ پہ تاک ءَ الم انت۔  ایشی ءِ ھواری ءَ من یک کمی یے ھم مار اتگ ات کہ حسن بلاسم عربی لبزانک ءِ تہ ءَ بلاھیں بستارے دار ایت ءُ ایشی ءِ یک آزمانکے “یک ھزار یک چاکو” نام ءَ رجانک  بیتگ کہ ایشی ءِ تہ ءَ ھچ رنگ ءَ رجانک ءِ ھیالداری نہ بیتگ ءُ نئیکہ  رجانک ساچست ءَ گوں ھمگرنچ  بیتگ۔

 وانوک نزانت کہ آ چی وانگ ءَ انت۔ باید انت کہ گوناپ تاکبند ءِ شونکار اے چیزے ھیال ءَ بدار انت۔ نام ءِ بدل ءَ آ ساچست ءِ جند ءَ بچار انت کہ آ ساچست ءِ حق ادا بیتگ انت وانگ کرز انت یا ناں، چوش تاک پونگ بنت ءُ وتئی ارزشت ءَ دور دئے انت۔ امیت انت دیم ءِ رند ءَ اے وڈیں ردی نہ بیت۔ 

‎تاکبند گوناپ ءِ شونکار کہ اے کار ءَ کنگ انت باز جوانیں کارے ءُ ستا کرزیں کارے کہ بلوچی لبزانک ءَ چوشیں کارانی ءُ شونکارانی زلورت انت۔ اے سپر مدام ھمے داب ءَ جُنزان بات۔ فرانسیسی تاک ءِ ودار انت۔ 

‎بلوچ ءُ بلوچستان دائم سبز ءُ آباد بات انت