بلوچ کربلا ءِ جاوراں اوں زندگ نہ انت

نبشتہ کار: جاوید بلوچ

بلوچ اجتماعی دروشم ءَ ناں کدی گوستانک ءَ راجے بوتگ نہ انو یک راجے۔ ھو بٹاک ءُ جزباتی ترانانی ھدّ ءَ کوہ پروشیں دلیرے، سیکیولر ءُ ترقی پسندے بلے راستی ءَ بلوچ یک ٹولیانی تہ ءَ بھر ءُ بانکے لشکرے۔ اشیی ءِ مستریں لوٹ وت گلاھی انت ءُ مستریں جیڑہ لاپ اِنت۔ وت گلاھی ءِ واستا چہ وت ءَ تاکتور ءِ دیم ءَ ھر ھما ناجائزیں چم جھلی ءُ سِلکاری ءَ کنت دانکہ آئی ءَ ھما پروٹوکول بہ رسیت کہ وتیگانی تہ ءَ آئی ءِ بستار بُستر زانگ بہ بیت۔ سردار، میر، مُلا، مُلاھی، کامریڈ ءُ دانشور یا کُٹھمی نامے پِر کنگ بہ بیت۔ ءُ پہ لاپ وت ءَ سرجم ءَ بدل کنت۔ ھمے لاپ ئے بہ رسیت ءُ پروٹوکول ئے گون بہ بیت بس۔ 

مرچی ھمے سبب انت کہ بلوچ اے ھدّ ءَ رستگ کہ کربلا ءَ چہ بدتریں جاورانی آماچ اِنت۔ کیچ ءَ بگر داں زاھدان ءَ یزید ءِ زوراکی ءِ چیر ءَ اِنت۔ درآمدیں کوفہ والایاں چہ گِلہ کنگ ءَ انت کہ آ پرچا ھاموش اَنت؟ 

مرچی بلوچ ءِ مسخ شدہ لاش ءُ گریوگانی اکساں سوشل میڈیا ءِ دھر ءَ ھم جھان نہ گِندگ ءَ انت۔ سردار ءُ ٹیکھداراں، مُلا ءُ ملاھی وتی ووٹانی کم بوھگ ءِ تُرس ءَ ھاموش اَنت بلے ھما کہ آ جھانی آمیدگِسانی در ءِ دپ ءَ نشتگ انت آ پرچا اے نزوری ءَ کبول نہ کن انت کہ آ جھان ءِ راھبنداں زانت نہ کنگ ءَ اَنت۔ بقول ءِ شھید ساجد حسین پرچا اے گپ ءَ نہ گُش انت ”واجہ ایں ڈونلڈ ٹرمپ انگت سرپد نہ انت کہ بلوچستانے ھست“۔ 

دوازدہ دانگ مُلا مرچی اوشتاگ ءُ پلستین ءِ سر ءَ ازرائیلی زوراکیانی بگیری ءَ آیاں زھرشانی کُتگ۔ بلوچ گِلہ کنگ ءَ اَنت کہ اے مُلا بلوچستان ءَ زوراکیانی باریگ ءَ کور اَنت، تُربَت ءِ شھید فدا چوک ءَ نہ گند انت۔ اگاں اے بہ گند انت اِش گڑا بلوچ سیکیولرے ءَ در کیت؟ مذھبی بیت؟ اگاں بلوچ مذھبی نہ انت گڑا اے دینی سوداگراں چہ گِلّہ پرچا؟ ھما کہ ذی قدوس ءِ سرکار ءَ آئی ءِ بوٹانی پالش کنوک اِتاں آ وَ ناں ایوک مرچی شھید فدا چوک ءِ گریوگاں وتی اسٹیٹس کنگ ءَ اَنت بلکیں سک تکانسراں۔ شھید فدا چوک داں گوستگیں قوم پرست گلّے ءَ چہ سیادی داروکیں سروزیرے ءِ لوگ ءَ چنچو دور بیت؟ 

مرچی اے جاوراں ھمے ٹیکھدار ءُ بیوروکریٹساں گوں سلفی کشوک ھم بزگ سک گمیگ انت۔ اشانی گمیگ بوھگ بس نہ انت؟ 

جھانی انسانی ھکّانی ادارگ ناں کور اَنت ءُ ناں کرّ بلے ھؤ بلوچ ءِ کیس ءَ کنفیوز اَنت۔ یکیں نام ءِ بلوچ اِنت بلے زاھدان ءَ ھون ریچی ءِ سر ءَ یک بلوچے آیانی دَر ءِ دپ ءَ گریوگ ءَ اِنت دومی بلوچ ھمد ءَ انچو گوزیت کہ گُش ئے اے کرّ اِنت۔ پد ءَ دگہ روچے اے بلوچ گریوگ ءَ انت آ دومی گوزیت۔ ۔ ۔

بزگی ءِ آماچیں بلوچ مرچی ھما دھر ءُ جاورانی آماچ انت ءُ جیڑگ ءَ انت کہ کجا ءُ کے آئی ءِ زند، اکس یا کُنٹ ءِ سودا ءَ جنگ ءَ اِنت؟ پمشکہ انفرادی حیثیت ءَ وتی بھر ءَ ھوار کنگ ءِ ھاتر ءَ گُڈی راہ ءَ گچین کنگ ءَ اِنت۔ مرچی بلوچ یک ٹوئیٹر اسپیسے ءَ ھم درآمدانی مھتاج اِنت کہ کجام درکوم بئیت ءُ گون بہ کپیت، ریاست ءَ کمو بہ شُدیت۔ بلوچ ناں بلوچستان ءَ مُچی ءَ یک راجے ءِ بستار ءَ زندگ انت ناں درمُلک ءَ۔ ادا اوں مناپکی، لاپ، بٹاک، بزگی، جون ءُ بیگواھی ءِ کسہ یاں گوں زندگ اِنت ءُ ڈن ءَ ھم۔ بلوچ ءِ دژمناں شاباش انت کہ بے ریا ءُ رو یک شَل ءَ ءُ یک وڑ ءَ جُنزان اَنت۔ وتی رِپکاں مَٹ کنان اَنت بلے بلوچ اِنت کہ بلوچ بیت نہ کنگ ءَ اِنت۔ وت رَد وارتگیں بلوچ، وتیگاں رَد دیان اِنت۔ زانگ ءَ اِنت ھم کہ جھان ءَ وتی توار ءَ سر کنگ ءَ بے سوب بوتگ بلے میریں بلوچ ءِ بالاد ءُ شان ءِ مسئلہ اِنت کہ بہ منیت۔

”یک سردارے ءَ دیریں وتی کلوہ یے ءِ تہ ءَ گُشتگ کہ مِڑ اِت کن اِت بہ مِڑ اِت اگاں ناں وتی ماتاں مہ گریوائین اِت“ مرچی بلوچ ماتانی ارس ءُ دگّانی سر ءَ مُچی بلوچ ءَ اشتھارانی دروشم ءَ گون انت۔ ھمے اشتھاراں ما شیئر کنگ ءَ انت، مئے تہ ءَ دُرس اے شیئر کنگ ءِ موسم ءَ وت ءَ پشت نہ گیج ایں۔ ھردیں اے اکس ءُ پوسٹ کوھن تِر بنت پد ءَ لاپ ءُ پروٹوکول ءِ پوست ءَ پوش اِنت۔ کربلا اگاں چُش بوت ایں انگت کسے ءَ وتی سینگاں شامات بہ جت ایں ءُ ھمے گم یات بہ کُتیں بلے بلوچ ءِ کرب ءُ اندوہ ءَ اے ھم نسیب ءَ نیست۔ 

بلوچ یزید ءِ زوراکیانی سر ءَ وَ ھمروچ ماتم کنگ ءَ اِنت بلے گیشتریں ماتم پہ وتی جند ءِ سر ءَ انت، وتی گُنگ ءُ جھان ءَ سر نہ بوھوکیں توار ءُ نابودی ءِ سر ءَ انت۔۔۔۔