ساجد راجدوستے نہ اَت

نبشتہ کار: ایسپ بلوچ

من زندگیں ساجد بِھ نہ زانت۔ چپّ ءُ چاگرد ءَ نارہ اَت۔ کوکار اَت۔ اینچو جاگہ نیست اَت کہ من دگہ دیمے بہ چار آں۔۔

آ پمشکہ درانڈیھ ات کہ ملک ءِ جاور نگیگ ات انت بلے آئی ءِ واستہ درملک ءَ اوں جاور نگیگ بوت انت۔ ساجد ھمودا اوں برگ بوت۔ شھر ءِ بتّی روک اتنت۔ گِرّ ءُ گار پہ مدامی است ات۔ ٹھکانی توار ات۔ ھرچیز پیسری وڑ ءَ اَت۔ بس ساجد ءِ بیگواھی ءَ نی بیست ءُ ھپت روچ سرجم ات۔ کش ءِ ھوٹل ءِ دپ ءَ نِشتگیں گیشتر مردماں ساجد نہ زانت، اگاں کسے ءَ زانت اوں گشت ئِے "اے ڑئے پاٹ اَنت، ڈنّ ءَ رو اَنت، کسّ اِش پجّا نیار ایت پمشکہ چوش کن انت کہ مھلوک مارا ڈسکس بہ کنت"۔لھتے ءَ کہ ساجد ءِ نام اش کتگ اَت گْوشت اِش ''مھلوک پہ نامداری ءَ وڑ وڑیں ھنر کنت''

من نہ زاناں چی بوت بلے ھال اتک ساجد کُشگ بوتگ ءُ مھلوک ءِ تران مٹ بوان بوت انت۔ چیزے روچ ءِ یا بگندئے کلاکانی تہ ءَ  ساجد سنگین بوت۔ ساجد ءِ کار بلوچی کار بوت انت۔ ساجد ءِ مرگ بلوچ ءِ تاوان بوت۔ ساجد بلوچے بوت۔

شھر ءِ بتّی یکشل ءَ روک اتنت بس ٹھکانی توار میزان میزان ءَ جھل ترّ اِتگ ات۔ من  ساجد نامیں مردمے ءِ بابت ءَ اش کنان اِت آں۔ اے دگرے اَت۔ کسے ءَ گشت اھولکارے بوتگ۔ اگاں مردمے ءَ ساجد نہ زانت گشت ئِے بلاھیں سیاسی مردمے بوتگ۔

اے اولی رند اَت بلوچاں اش کتگ ات کہ بلوچے درانڈیھ ءَ کُشگ بیتگ۔ درملک ءَ مردم گار بنت۔ درملک ءَ مردم کشگ ھم بنت؟ اول سر ءَ مئے وت گڑین ءُ نیم بُندگیں سیاسی تجزیہ نگارانی واستہ اے نبیتگیں گپے اَت۔

گڈ ء ساجد ءَ کسے ءَ آ اھوالارے گوشت ءُ دگرے ءَ نگدکارے۔ ھرچی ئِے اَت۔ بلئے ساجد راجدوستے نہ بوت۔ ساجد مئے مردم نہ بوت۔ مئے سرکلانی مردم۔

کسے کہ ھبرے کنت ءُ مارا مہ گلاھیت۔ کسے کہ مارا رد مہ دنت۔ مئے توسیپ ءَ مہ کنت۔ مئے گھتگیں کاراں واہ واہ مہ کنت۔ آ چوں راجدوستے بیت کنت؟

اے مرد ءَ کہ مارا بھہ نہ گْوشت آزاتی کوہ ءِ پُشت ءَ اِنت۔ سرکار ما پروش داتگ۔ ما دنیا ءِ تواناتریں قوم ایں۔ اچ مارا کوھانی دل لرز انت۔ اے مرد ءَ کہ مئے نزوریانی سر ءَ ھبر کت۔ مئے ردیں پالیسانی سر ءَ نگد کت، پمّارا گشئے زاناں کارچے اَت۔ ما ساجد ءَ عادت نہ اتیں۔ ءُ ما کہ کسے ءَ عادت نہ بیں، آئی ءِ بائیکاٹ ءَ کن ایں۔۔

مئے بائیکاٹ ءِ مقصد ایش اِنت کہ ما مردم ءَ ھال بہ دیں کہ تو مئے ھم رنگ نہ ئے۔

شھر ءِ بتی روک اَنت۔ ھوٹلانی دپ ءَ دیوان اِنت۔ یونیورسٹانی تہ ءَ چُری چُری اِنت۔ ءُ  ما مردم پٹّگائیں۔ اچ ما جتائیں مردم۔ ھما  کہ مئے ھمریش نہ اَنت۔ ھما کہ اسٹیجانی سر ءَ دروگ نہ بند اَنت۔ ھما کہ مارا نہ گلا اَنت۔ انچیں مردم کہ ما آیاں بائیکاٹ بہ کن ایں۔