بلوچ وللہ سک بزگ اِنت۔۔۔ کجا؟ سوشل میڈیا ءَ۔

 نبشتانک: جاوید بلوچ

”بالاچ نمیران اِنت“ ھمے سوت ءَ گوں لھتیں زالبولانی اکساں ویڈیو یے اسٹیٹس کُت، شُت دکان پچ کُت۔ پد ءَ شپ ءَ کایاں دگہ پوسٹے شیئر کناں کہ بلوچستان ءَ آس روک اِنت۔

بلوچ سک بزگ، زوراک ءِ ظلم ءِ آماچ اِنت، ھرنیمگ ءَ بلوچستان بُن اِنت۔۔۔۔

کجا؟

سوشل میڈیا ءَ۔۔۔ بس۔

کول ءِ کمالان بیبگر ءِ اگاں اے راج ءِ دیم ءَ ھچ مہ گُش اوں ھچ پروا نیست، اشیی ءَ  انچو کہ گیرت ءُ بلوچیت ءِ سرٹیفکٹ دست ءَ انِت ءُ بھر کنگ ءَ دیر نہ کنت ھمے وڑ ءَ دو سے آشوبی دانک بہ لِک، یا لھتیں اکس شیئر بکن پد ءَ تؤ آشوبی یے ھم دمان ءَ بئے بلے ۔۔۔۔۔ 

بالاچ ءِ کھول ءَ جار جتگ اَت کہ باندہ سرجمیں مکُران ءَ دَر بندیں زھرشانی کنگ بیت بلے سنگتے سوشل میڈیا ءَ گِلہ کنگ ءَ اِنت کہ گْوادر ءِ دکان پرچا پچ اَنت؟ اے دکاندارانی کہ جیڑہ نہ انت۔ اے بلوچ ءِ ءُ بلوچستان ءِ جیڑہ اِنت۔ ءُ بلوچ ءُ بلوچستان دو ایں بزگ اَنت بلے کجا؟ سوشل میڈیا ءَ۔

ناں دنیا ءِ ادارگ ھوڑ اَنت ناکہ ریاست۔ دنیا ءِ ادارگانی کرّ ءَ کسے بلوچ ءُ بلوچستان ءِ گپ ءَ کنت، دنیا ھمے سمجھ ایت کہ اے بیچارگ ءِ لاپ ءُ رہائش ءِ مسئلہ اِنت اے آسراتیاں دنت ئے پد ءَ ندارگ چاریت کہ باریں بلوچ ءُ بلوچستان لُک بوان لُک بوان داں ریاست ءِ کلات ءُ پد ءَ آئی ءِ گَلّ ءَ کاینت کسہ لُک بیت۔ 

مُلک ءَ پد ءَ بلوچستان ءُ بلوچ ءِ بزگی تھنا سوشل میڈیا ءَ اِنت۔ کامریڈ داں نودربر گلّے ءَ اِنت ءُ آئی ءِ گَلّ اگاں سردار یا ٹیکھداری ءِ پاکٹ آرگنائزیشن انت گڑا چاریت پارٹی ءِ انٹرسٹ کجا انت؟ سوشل میڈیا ءَ ٹُک ایت آشوبی پوسٹے پد ءَ وت وتی واجہ ءِ کرّ ءَ روت۔ ھمے وڑ ءَ لبزانکی دانشور موقع ءَ چاریت سوشل میڈیا ءَ فلسطین ءُ بلوچستان ءَ ھور کنت چہ  سرکار ءَ ڈڈیں فنڈے گپت۔ برے برے مردم جیڑیت کہ مُلا ءُ پارلیمانی ٹیکھدار ءُ سردار مُپت ءَ بنّام اَنت کہ بلوچ ءَ رَد دیگ ءَ اَنت۔ بلوچ ءِ جند کے اِنت؟ ھماکہ آئی ءَ اکسے گون اِنت یا لاشے ءِ وارس اِنت۔ دگہ وَ ما دُرس سوشل میڈیا ءَ ابید، دگہ ھچ وڑ ءَ اے بزگی ءَ گون نہ انت۔۔۔ اگاں گون انت ھم گڑا سوشل میڈیا ءَ۔ کول ءِ ناھدا ئیگ ءَ پد ءَ ھما ھم گون انت کہ گُشاں ”کھدہ بابر بھائی جان اور شہید لالا حمید کو سرخ سلام“ ۔ 

برے برے جیڑئے بلوچ چی یے؟ راجے؟ سیکیولرے؟ لبرلے؟ قوم پرستے یا مذھبی یے؟ چی یے؟ پرچا کہ سوشل میڈیا ءَ دَر کائے نزیک ءَ تو بلوچ ءَ چار ئے ٹولیانی تہ ءَ بھر اِنت۔ اگاں رائے ونڈی مُلایانی بگیری ءَ سیکیولر ءُ لبرلے بلے مُلاھی ءِ باریگ کیت آئی ءِ چمپلاں سر ءَ کنگ ءَ تیار بیت۔ ھمے وڑ ءَ ووٹ ءِ وھد ءَ میتگ ءِ میر، کھدہ ءُ سردار یا ٹیکھدار ءِ سیاہ کانچیں گاڑی ءَ سوار بئیگ یا آئی ءِ کش ءَ اوشتگ ءَ انچو سماہ بیت کہ مرد ءَ کول ءِ داد سائب ئیگ ءَ نمبر پلیٹے رَستگ۔ 

ریاست وَ زانت کہ اسمبلی ءَ بلوچ ءِ کرپٹ تریں سیاستدان ھم سالے یک رندے دو دانک جزباتی تران بہ کنت آ ھیرو بیت پمشکہ اشاں سیئرس مہ زور۔ ءُ پد ءَ بلوچ نامیں اے لشکر ھم زانت کہ سوشل میڈیا ءَ دو دانک بہ گُش پد ءَ وائس آف بلوچستان ءِ مردم بئے یا ڈی سی ءُ میر ءِ ھچ پرک نہ دنت۔ پمشکہ اگاں گْوادر ءِ دکان بند نہ بنت یا بلوچ تپاکی ءِ نام ءَ کسے ڈیزل ءِ پک اپ یے زیر ایت یا نوکری ءُ فنڈے گپت ءُ لبزانکی ادارگے چلائینیت پروا نیست اگاں بلوچ ءُ بلوچستان بزگ اَنت گڑا سوشل میڈیا ءَ۔ اود ءَ پوسٹے کنیں۔ بالاچ ءِ لوگ ءِ مردمانی کرّ ءَ رو ایں ھور نند اِنت یا انّاں، دکان ءَ بند کن اِنت یا انّاں بلے سوشل میڈیا ءَ کہ بلوچ بزگ انت اود ءَ وت یا وت انّاں دگہ یکے ءِ پوسٹ ءَ شیئر کن انت۔ بلوچ ءُ بلوچستان سوشل میڈیا ءَ اَنت۔ پد ءَ کُکار کنیں اے مُلا کور اَنت، جھانی ادارگ کَرّ اَنت ءُ پاکستانی میڈیا گُنگ اِنت۔ ما وت؟ ما سوشل میڈیا ءَ اِنت مئے لاپ وَ اِنّاں۔