گار بیگواھیں بلوچ ءُ اسلام آباد ءِ زھرشانی نندانک ۔

نبشتانک:  ندیم بلوچ  

مرچی چہ بلوچستان ءَ بلوچ گار ءُ بیگواھیں مردمانی کَھول وتی وارِسانی  پَد جنگ ءَ اسلام آباد ءَ اتکگ اَنت  ، ھمیشانی ھواری ءَ راشد حسین ءِ مات ھم گُون اِنت کہ پنچ سال ءَ ساری آٸی ءِ بچ امارات ءَ گپتگ ءُ پاکستان ءِ دست ءَ داتگ ، پاکستان ءَ وت اے داوا کُتگ کہ من  مُلک دشمن راشد حسین گپتگ ءُ منی کرا اِنت ۔

مات ءَ پنچ سال ءَ چہ گیش انت کہ دَر پہ دَر ، زھرشانی ءُ کیمپ ، پریس کلب ، پاکستان ءِ کورٹ ، عدالت ، کمیشن ، پارلیمان ، ھَر کُجا وتی پِریات سَر کُتگ ، جھان ءِ انسانی ھکانی رکّینوکیں تنظیم دُرست پہ بلوچ ءِ سرا بوکئیں ریاستی ظلم ، جبر ، بربریت ، فیک انکاؤنٹر ءُ گار ءُ بیگواھ کنگ ءَ ھاموش انت ۔ انچوشکہ راشد حسین ءِ گُھار ءَ گشت " مارا چہ پاکستان ءِ عدالت ءُ قانون آں انصاف لوٹگ ءَ دم بُرتگ ، مرچی اگا مئے جھد برجا انت بس پہ بلوچ قوم ءِ  اُوست ءُ اُمید ءَ کہ مئے آواز بنت ءُ ھمراداری کن انت "

 وھدے من اے ماتانی بزگی ، ھیسکارگ ، بے وسی دیست انت ھئیران بیتاں کہ ما بلوچ چونیں وَت پَرست جوڈ بوتگیں ، بلوچستان ءَ آس روک اِنت ، ھَر گس ءَ چہ تَمردیں بچ چست کنگ ءُ بَرگ بٸیگا انت ، بلوچانی ٹیکی تیر سُپتگیں کُنٹ انت ، دھشت گردے ءِ نام ءَ بلوچ ءِ نسل کشی ءَ کنگ بوھگ ءَ انت ۔۔۔۔! بلے لَس بلوچ انگت واب انت کہ اے جیڑہ منی نہ انت ، منی برات ءُ وارث گار ءُ بیگواہ نہ انت من چیا آواز چست بکن آں ۔۔۔! کدی ءَ داں  وتی باریگ ءِ ودار ءَ کنٸے ۔۔۔

مازیب ءَ گوں دَردیگیں آوازے ءَ گُشت " ریاست بلوچ کنت ءُ بارت ، بلوچ کنت ءُ ترا فیک انکاؤنٹر ءِ نام ءَ جَنت تئ لاش ءَ ماں جنگل ءُ ویرانگاں چگل دنت ، بلے مرچی ما بلوچ بُوھگ ءُ یک جاہ بیگ ءَ تیار نہ انت ، چوش پرچہ ۔۔۔؟" 

ادا اسلام آباد ءِ تہ ءَ مارا مرچی دومی روچ انت کہ " نیشنل پریس کلب اسلام آباد " دیما نشتگیں بَس یک ءُ دو نیوز والا چہ اَبید کَسے ءَ بلوچ ماتاں جُست ھم نہ کُت کہ  شُما پرچہ اینچو دُور بلوچستان ءَ چے  اتکگ اِت ءُ ادا روڈانی سرا نشتگ اِت؟ شُمے مسلہ ءُ جیڑہ چی انت ؟  پاکستان ءِ میڈیا کدی ھم بلوچ ءِ آواز نہ بیتگ ءُ نٸیکہ بیت ، درور مئے دیما انت کہ مرچی شش روچ انت تربت ءَ بالاچ ءِ نہ ھکیں کوش ءِ ھلاپ ءَ بالاچ ءِ کُنٹ گُون اِنت ءُ شھید فدا چوک ءَ نشتگ انت ، سرجمیں مکران ءَ مرچی پہیہ جام ھڈتال انت ، بلے ما گندیں ملک ءِ یک نیوز چینل ءِ ھم اے مسلہ ءَ دیم ءَ نیاریت ءُ بریکینگ نیوز جوڈ نہ بیت ۔ 

مارا اے چیز مارگ ءُ زانگی انت کہ بلوچ نَسل کشی ءُ گار بیگواہ کنوک ادارگ انت ، انچوشکہ بلوچستان ءِ تہ ءَ سیکیوریٹی ءِ بازیں ادارگ بلوچ ءِ سرا دور دیگ بیتگ انت ۔ اے ادارگانی لوٹ انت کہ بلوچ چہ اے سرزمین ءَ ھلاس کنگ بہ بیت ، پرچہ کہ اے بس بلوچستان ءِ سُھر ءُ مڈی ، نیلیں زِرّ ءُ گیاباناں لوٹ ایت نٸیکہ بلوچ راج ءَ ۔ 

مارا بلوچ بیگ ءُ یَک مُشت بئیگی انت وتی توار چست کنگی انت ، توار چست کنگ المی انت ، وتی باریگ ءِ ودار کنگی نہ انت ، گار ءُ بیگواھیں مردمانی پَد جنگی انت  ، ریاستی ظلم ، جبر ، بربریت ءُ نارواٸیں پالیسی نہ منگی انت ءُ آھانی دیم ءَ  مارا چو نرمزار ءَ مِکّ بوھگی انت ۔ بلوچی ءَ گُشنت " کَس پہ دِگَر ءِ جُوھان ءَ وتی ریشاں دنزین نہ کنت "