نبشتہ کار: جاوید بلوچ
ما ءُ شما جھان ءِ مستریں دیوال بزاں دی گریٹ وال آف چائنہ ءِ بابت ءَ اِشکُتگ ءُ سرپدیں بلے ناں تھنا چین ءَ جھان ءِ مستریں دیوالے ھست بلکیں وتی مھلوک ءَ سرپدی ءِ سر نہ بوھگ ءُ انٹرنٹ ءِ گِر ءُ دار کنگ ءِ ھاتر ءَ ھم فائر وال سسٹمے چین ءِ گور ءَ ھست۔
انوگیں پاکستان ءِ مزن وزیر ءِ چین ءِ تر ءُ تاب ءِ وھد ءَ یک ھالے ھمے آس ءِ دیوال بزاں فائر وال ئیگ اِنت۔ ھالانی رِد ءَ پاکستان سرکار ءَ سوشل میڈیا ءِ گِر ءُ دار ءِ ھاتر ءَ چہ چین ءَ نیشنل فائر وال سسٹم بھا زُرتگ ءُ اے پاکستان ءَ جَنَگ بوتگ۔ اے سسٹم سوشل میڈیا ءَ ھر مواد ءَ چاریت، داریت، محدود یا بلاک کنت۔ اے سسٹم ءِ مول ءُ مراد یکے وَ اے زانگ ءُ چارگ اِنت کہ کجام سرپدی یا ھال چہ کجا شنگ کنگ بوتگ ءُ کے ءَ شنگ کُتگ۔ دومی ھما سوشل میڈیا اکاؤنٹ، پیج یا ھما لبز کہ سرکار ءَ دوست نہ بنت آیانی ریچ بزاں مردماں سربوھگ ءِ کساس ءَ محدود کنگ، کم کنگ یا سرجم ءَ بلاک کنگ اِنت۔
لبز فائر وال ءِ اسل مانا ءُ بزانت یک انچیں دیوالے کہ آس ءِ شنگ بوھگ ءَ بہ دار ایت بلے سرکار اشیی ءَ سرپدی ءُ ھالانی سوچگ ءِ ھاتر ءَ کارمرز کن انت۔ ما گُشت کنیں کہ انچیں آس ءِ دیوالے جوڑ کنگ کہ آ سرکار ءِ نہ دوستیں لبز، سوشل میڈیا اکاؤنٹ ءُ سرپدی آں بہ سوچیت ءُ لس مردماں سر بوھگ ءَ مئیلیت۔
اے رِد ءَ پاکستان سرکار ءَ اے گپ رَد کُتگ ءُ گُشتگ آئی ءَ چہ چین ءَ فائروال سسٹم نہ زُرتگ بلے پٹ ءُ پولی اھوالکار عمر چیمہ ءِ یک ھالے ءِ رِد ءَ ناں ایوک اے سسٹم زورگ بوتگ بلکیں انٹرنٹ دیوکیں ادارگاں جَنَگ ھم بوتگ۔ دی نیوز ءِ رپورٹے ءِ رِد ءَ یک سرکاری سروکے ءَ من اِتگ کہ سوشل میڈیا ءِ گِر ءُ دار کنگ ءِ ھاتر ءَ اے سسٹم انسٹال کنگ بوتگ۔ اے سسٹم ءَ پیش چہ کینیڈا ءَ زُرتگیں سسٹم نِٹ سویپر 2013 ءَ جَنگ بوتگ بلے آئی ءِ کار سرکار ءِ نہ دوستیں ویب سائٹ ءُ سوشل میڈیا ءِ اکاؤنٹسانی بلاک کنگ بوتگ۔ اے نوکیں چینی فائر وال سسٹم سوشل میڈیا ءَ شنگیں ھر مواد ءِ بُن ءَ شوھازیت، کے چہ کجا ءُ کے ءَ شنگ کُتگ۔ سرکار ءِ نہ دوستیں اکاؤنٹ، پیج یا لبزاں محدود یا بلاک کنت۔
اے سسٹم سینسرشپ ءِ واستا کارمرز بیت، اشیی ءِ مستریں مول ءُ مراد اپوزیشن ءِ توار ءِ بند کنگ اِنت بلے اشیی ءِ مستریں تاوان ھما راج ءُ دمگاں رسیت کہ اود ءَ سوشل میڈیا ءَ ابید سرپدی ءِ دگہ ھچ وسیلہ نیست۔ بلوچستان چُشکہ چوناھا یک انفارمیشن بلیک ھولے بزاں تھاریں چاتے زانگ بیت چہ اے فائر وال ءَ بلوچستان ءِ توار ءَ بند کنگ، ادا جاری ایں زوراکیانی چیر دیگ ءَ گیشتر موہ رسیت۔
اشیی ءِ گِر ءُ دار وَ بوت نہ کنت بلے وتی سرپدی ءَ لس مھلوک ءَ سر کنگ ءِ ھاتر ءَ جُتاھیں اکاؤنٹ، اسل لبزانی جاگہ ءَ یک مانا ایں دگہ لبزانی کارمرز کنگ ءَ چہ سرپدی دارگ بوت نہ کنت۔ چہ اشیی ءَ سرکاری اسپانسر میڈیا آؤٹ لٹس ءُ ڈمی اھوالکاراں نپ رسیت، سرکاری پروپیگنڈہ گیشتر چارگ بیت ءُ گیشتر مھلوک ءَ سر بیت۔ اے سسٹم ءِ تہ ءَ ھما لبز بلاک کنگ بنت ءُ ھما سرھال کہ سرکار ءَ دوست نہ بنت آیانی لس مھلوک ءَ سربوھگ ءِ ریچ بزاں کساس محدود کنگ بیت۔
گڑا چہ اشیی ءَ ھیالانی آجوھی، فریڈم آف اسپیچ یا اھوالکاری دارگ بیت؟ یا انسانی توار بند کنگ بند؟
اشیی ءِ پسو ءَ واجہ اکبر بارکزئی ءَ گُشتگ
”روچ ءَ کے کُشت کنت
رژن ءَ کے داشت کنت
روچ ءِ پاکیں کشگ
رژن ءِ بندی کنگ
کسی تاکت نہ انت
کسی تاکت نہ انت“.
No comments:
Post a Comment