تیاب دپی بلوچستان ءَ کُٹھمی نمبر پلیٹ کلچر

نبشتہ کار: جاوید بلوچ 

مئے تیاب دپی بلوچستان ءَ کُٹھمی نمبر پلیٹ کلچر ءِ آیگ ءِ یک سببے  وَ زَر اَت بلے دگہ یک سببے ”ناجائز تعلقات“ اَنت کہ اشیی ءَ عام زبان ءَ ”اپروچ“ گُش انت۔ سرکاری  ءُ ”اسل سرکاراں“ گوں تعلقات  ءِ بوھگ ھم یک مزنیں سببے۔ چوناھا گُشگ بیت کہ اگاں ترا سورس ھست دُزی، شتلی  ءُ ھر وڑیں دو نمبر کارے کن ئے بہ کن بلے دو نمبری ءِ تہ ءَ وتی کُٹھمی نمبر پلیٹ ءَ یک نمبر ثابت کنگ، کلچر ءَ گَند کنگ ءَ اِنت۔ اے واستا کہ منی تعلقات  ءُ اپروچ ھست پمشکہ مئے نمبر پلیٹ شرتر اِنت؟ اے مئے ربیدگ  ءَ تاوان دیگ ءَ اِنت۔ 

اے نمبر پلیٹ والا کلچر ءِ سر ءَ اگاں ما گپ نہ کُت، ایر نہ جَت گڑا مارا چہ رندی پدریچ اشیی ءَ پہ وت ءَ شانے سرپد بیت۔ انچو کہ ما وتی پیسری پدریچ ءَ سیاسی دو تل  ءُ دو پوستی کلچر ءِ آرگ، لبزانک ءُ زبان ءِ نام ءَ ٹیکھداری کنگ یا سرکاری ادارگانی تہ ءَ کرپشن ءُ سفارش ءِ آرگ ءِ زمہ وار سرپد بئیں ھمے وڑ گڑا اے نمبر پیلٹ کلچر  ءِ زمہ وار ما اِنت۔ اگاں مارا چہ رندی نسل چہ اے کلچر ءَ متاسر بیت  گڑا اے کلچر گندگتریں رنگے زور ایت۔ بلکیں مزنیں ھدے ءَ زُرتگ ئے۔

بلوچستان ءِ تیاب دپی دمگاں اے نمبر پلیٹ کلچر چنچو بدیں رنگے ءَ سر کشگ ءَ اِنت، گوں اے دروراں زانگ بیت کہ نمبر پلیٹ ءِ ارزشت چنچو وَدّاِتگ۔ لھتیں وھد پیسر مئے نیم  ءَ لوگانی بندگ ءُ دمکے ءِ سر ءَ وت ماں وتیں سیاد مِڑ اَنت۔ کار اوشت ایت (چوناھا مئے نیمگ ءَ گیشتر مردم وت ماں وت سیاد انت)۔ ھمے مردم زمینانی بنداتی بھا ءِ وھد ءَ زمینانی سر ءَ اڑیتگ انت گڑا دو ایں مخالف فریق ھور عدالت ءَ شُتگ آں پیشی بوتگ پد ءَ ھور یکیں گاڑی ءَ واتر میتگ ءَ اتکگ آں بلے کس ءَ وتی نمبر پلیٹ ءِ بُرز تِر کنگ ءِ واستا کسی راہ نہ بستگ۔ اے بَری ھم انچو بیت کار اوشتیت، کمو دپ جاکی بیت، ھماھی ءِ سورس گیشتر بنت آ جی ڈی اے (گْوادر ءِ دیمرھی ءِ ادارگ)  ءَ شکایت کنت۔

 بلے کُٹھمی نمبر پلیٹ ءِ کینگ ورناھاں مست کنت آ دومی لوگ ءِ  ورنایانی سر ءَ بنداں، روڈے ءِ سر ءَ بند ءُ گولائیش بنت، پد ءَ رپوٹ  ءُ پیشی بیت کسانیں ورناہ ماہ یے  ءَ گیش بند بنت تھنا اے واستا کہ اگاں بیر نہ گپت  ءُ دومی نہ جَت بزاں مئے نمبر پلیٹ اسلی یے نہ اِنت۔ چُشیں درور گیش بوھان اَنت  ءُ گیشتر بدبھتی ءِ گپ اِش انت کہ اے کلچر ءِ آماچ ھما ورناہ اَنت کہ وانندہ اَنت۔

ھمے وڑ مرچاں تیاب دپی دمگاں اگاں یک کُٹھمی  ءِ گونڈوے  وانگ جاہ  ءَ دگہ گونڈویے ءَ جَت گڑا گوں سلہ ءُ کاٹار دومی گونڈو ءِ سر بندگ   ءُ جنگی انت، اگاں نہ جَت بزاں مئے کُٹھم ءِ نمبر پلیٹ جھل کپیت۔ اے نمبر پلیٹ ءِ اسل ثابت کنگ ءَ المی جوڑ بوتگ کہ ناجائزیں تعلقاتاں کارمرز کن گڑا تئی شان بُرز بیت ءُ پد ءَ روانکاں بھر بہ زور بہ گوش ”نعرہ نعرہ بلوچ، جیئے جیئے بلوچ“۔ 

کُٹھمی نمبر پلیٹ ناں ایوک گْوادر ءَ کیسگ ءَ اِنت بلکیں گْوادر ءَ ڈن ھم گون انت۔ درآمدیں جاہ آں کسانیں گپے ءِ سر ءَ دو نودربر بند  ءُ گولائیش بوت گڑا داں بیر نہ گپت بزاں نمبر پلیٹ ءِ توہین اِنت۔ تیاب  ءِ دپ ءَ گاڑی ترینوکاھی، ٹورنامنٹ، دپترے ءَ دستخطے گِرگ داں پکنک  ءُ سوداگری ءَ نمبر پلیٹ کارمرز کنگی اِنت۔ 

اے نمبر پلیٹ کلچر کسان کسانیں ”گینگ“ جوڑ کنگ ءَ اِنت، ھدا مہ کنت داں یکے برگ  ءُ بیگواہ کنگ مہ بیت یا شھیدی ءِ روچ دارگ مہ بیت گڑا ما نمبر پلیٹانی تہ  ءَ بھر اِنت، ھمے روچ  ءُ روانکاں کہ نمبر پلیٹ چیر تراں مارا تھنا بلوچ کناں۔ اے نمبر پلیٹ ءِ بیم ناکیں  ءُ گندگیں کلچر گوں ترند ءَ پیداگ انت۔۔۔۔۔۔۔