سامراجانی پنچگ ءُ نزویں ڈیھ

  نبشتہ کار: صغیر امین

رجانک کار:  شھداد بلوچ

"ھدا ءِ دادیں ملک"  ءِ آ دگہ شھرانی وڑ ءَ گوادر  ھم پہ مھلوک ءَ بزّگی ءُ جنجالانی جھلیں زِرے! کہ اد ءَ نوجوان بے روزگار اَنت، نئے کہ آیانی ڈگری پہ آیاں کار آیگ اَنت ءُ نئے کہ پہ آیاں  دگہ امیتے بالگ ءَ اِنت۔

گریب  گیرانی ءِ کوکّار جنوکیں گورمانی دیمپان اَنت، نئے کہ جان سلامتی ءِ  آسرات ھست اَنت۔ وانگ وَ ماں زر ءَ بُڈّاتگ ءُ نوجوان ریاست ءِ زوراکیانی ساھگ ءَ ساہ کشّ اَنت۔

بلے! مھلوک ءِ سر ءَ زوراکیانی پندل اد ءَ دارگ نہ بیت۔ 

یک برے پد ءَ گوادر ءَ ماں ٹَٹْاں کنگ ءِ کار بندات کنگ بوتگ۔ بزاں کہ شھر ءِ 25 کلومیتر ءَ سیمّ جَنگ بیت ءُ پہ مھلوک ءِ روگ ءُ آیگ واستا دو پوائنٹ اڈّ دیگ بنت ایشی ءَ پد شھر ءَ مردمانی چارگ  ءُ سیکورٹی  ءِ نام ءَ 500 کیمرہ جنگ بَیت۔

اے کارپدانی سوب ءَ ڈسٹرکٹ گوادر ءِ سئین تحصیل جیونی،پسنی ءُ اورماڑہ سرجم ءَ چہ گوادر شھر ءَ جدا بنت 

ءُ گوادر ءِ سئے یوسی چھب کلمتی، پلیری ءُ سربندن ھم چہ شھر ءَ ڈَنّ بنت۔ریاست ءُ آئی چانوگریں میڈیا اے کارپداں سیف سٹی پروجیکٹ ءِ نام ءَ دیگ اِنت کہ آئی مکسد گوادر ءِ مھلوک ءَ ءُ شھر ءَ چہ دھشت گرد اُرشاں رکینگ اِنت۔

گڑا باریں اے کار پہ مردمانی رکینگ ھاتر ءَ بوگ ءَ اَنت؟

ھو!! پرچا ناں، اے رکینگ ءِ کلات  شھر ءِ ھما بھر ءَ اڈّ دَیگ بوگ ءَ اِنت کہ آود ءَ چین ءِ سرمایا کاری  ھست اِنت۔

کہ آود ءَ گوادر  پورٹ ، انٹرنیشنل ایئرپورٹ ءُ آ دگہ سٹرٹیجک مفاد ھست اَنت۔ بزاں کہ اے سِلیں کار پہ سرمایادارانی جتگیں زرانی رکینگ ءِ ھاتر ءَ بوگ ءَ اَنت۔ پہ گوادر ءِ شدلاپیں مھلوک  ءِ واستا ھچ نہ بوگ ءَ اِنت کہ آیاں دو وھد ءِ نان ھم پہ زلتی ءَ رسگ ءَ اِنت۔آ دنیگہ چہ سوئی گیس ءَ زِبَھر اَنت۔

آیاں اے گرماگ ءَ ھم چاردہ شانزدہ ادار لین دیگ نہ بیت۔

آیاں پہ ورگ ءَ ساپیں آپ ھم نہ رس ایت ھمے سوب ءَ آ وڑ وڑیں نادرایانی آماچ اَنت کدی ھَور آیاں بُڈّین ایت  ءُ برے بان ءِ لُمبگ ءِ سوب ءَ بیران بنت ءُ برے بے کس ءُ لاچاری ءَ پَٹانی سر ءَ پِسک اَنت، ءُ پد ءَ نادراھی سَر جن اَنت ءُ پِنڈگ بندات کنگ بیت مردم کسان کسانکیں نادراھیانی سوب ءَ مرگ ءِ آماچ بنت۔

اگاں بچار ئے شھر ءِ مھلوک ءَ اگاں کسی ارش ءِ ھترہ ھست آ ریاست ءِ زوراکی اَنت زر ءَ ٹرالرانی  اُرش اَنت  آزمان ءَ سربوتگیں بےروزگاری ءُ گیرانی ءِ اُرش اَنت۔

گوادر ءَ ماں ٹَٹْاں بند کنگ ءِ رِپک کالونائزیشن ءِ گندتریں کارے ءُ نوآبادیاتی منسوبہ ءِ بھر اِنت کہ ایشی ءِ مکسد یک نیمے سرمایادارنی سرمایاکاری ءِ رکینگ اِنت ءُ دومی نیمگ ءَ مھلوک ءَ ازاباں دَور دیگ ءِ پندلے۔ مردماں گوں آیانی کھول ءَ ھوار ماں سر پجیں زندانے ءَ بند کنگ ءُ آیاں چہ دگہ ھند ءُ دمگاں نشتگیں آیانی سیاد ءُ وارساں  سندگ ءِ یک سِلیں کارے۔  کَش ءُ کر ءِ مردمانی سامان زیرگ،الاج،وانگ ءُ آ دگہ کارانی جاہ ھمے گوادر شھر اِنت۔ گوں اے کاراں شھر ءِ مردماں ھوار کش ءُ کر ءِ مردم ھمے ازابی بنت۔

اے سامراجی منسوبہ ءَ ایر جنگ ءُ مزمت کنگ ءَ گوادر ءِ مھلوک ءِ ھمکوپگی ءِ درشانی وَ بیت بلے ایشی ءِ توجیل(حل) چے بوت کنت ؟

توجیل ءِ نیمگ ءَ روگ ءَ پیسر ما پاکستان ءُ چین ءِ سیادی، پاکستان ءِ سامراجی کردار ءُ بلوچ سیاست ءِ  سر ءَ گپ کنیں۔

پاکستان ءُ چین ءِ سیادی 

اے وَ منتگیں گپے کہ پاکستان یک ابرمی ریاستے نہ اِنت کہ یک ھاسیں ارتکائی  اَمَلے ءَ گوزوک بہ بیت بلکیں اے  انگلستان ءِ سرپرستی ءَ مزھبے نام ءَ پہ زَردارنی ھاتر ءَ جوڑ کنگ بوتگ۔ ترسناک ءُ چہ ھون ءَ سرریچیں یک انچیں ملکے  ءَ کہ آئی سر ءَ نام ءِ مزھب پہ زور چاگرد  ءِ سر ءَ دیگ بوتگ کہ آ یک باز راجانی ءُ جتا جتائیں مزھبانی ھنکین اِنت۔ آئی ءِ وانگی نساب  سرجم ءَ سرکار ءِ مزھبی لیکہ ءِ سر ءَ اڈّ دیگ بوتگ۔ سرکار ءِ دروگ ءُ بے سریں  ھیالانی  ھاتر ءَ سرجمیں گوستانک مٹ کنگ بوتگ۔ اردو راجی زبان  مُسلت کنگ بوتگ۔ کسانیں راجانی سر ءَ کوہ پروشگ  بندات کنگ بوتگ ھمیشانی سوب ءَ  بے سروپائیں سیاست  بندات بوتگ کہ پہ افسر شاھی یک ریاست،یک تالانیں منڈی یے، کدرت ءِ داتگیں مال ءُ مڈّی ءُ مردمانی کُوَت ءِ ھستی ءَ پد اوں وتی پادانی سر ءَ اوشات نہ کت۔ چہ وتی بنداتی روچاں ایشی ءِ کردار چانوگری ، جی واجہی ءُ وتی سامراجی ھدایانی وپاداری اِنت۔ایشی ءَ وتی 76 سال ءِ ھستی ءَ سامراجی تاگتانی دیم ءَ پونز ءِ   لپاشگ ، پِنڈگ ، چاپلوسی ،  ءُ جنگاں وتی زمین دیگ ءُ ڈالر  زیروکائی کتگ۔

اے گپ ءَ وَ ھچ شک نیست کہ  پاکستان بید ءِ آئی ایم اِیپ ءُ ورلڈ بینک ءِ پِنڈاں ھلّ اِت نہ کنت  اے ھمیشانی کمک ءَ ھلّگ ءَ اِنت۔ ءُ اے ادارھانی تہ ءَ امریکہ ءِ گپ وزن دار اَنت۔

اے عالمی مالیاتی ادارھانی برکت ءَ پاکستان ءِ ساہ زورگ نوکیں گپے نہ اِنت۔ سرد جنگ ءَ ءُ سرد جنگ ءَ پد اوں  ایشی ءِ ھال ھمیش اَنت بلے چیزے وھد اِنت کہ پاکستان ءَ  ھما ملک ءِ سامراجی کُوت ءِ  دزرسی گیش بُوان اَنت آ چین اِنت۔

 

چین ءَ دنیگا پاکستان ءَ سی پیک ءِ سر ءَ بیست ءُ شش 26ارب ڈالر جَتگ بزاں کہ  سرمایاکاری کتگ (سی پیک نام ءَ زُرتگیں وام اے ھساب ءَ نہ یا اَنت)۔

وتی منّاں اے درگت ءَ گیشتر سرمایاکاری پاور جرنیشن ءِ کار  ءِ سر ءَ بوتگ ءُ ھکومت ءَ گوں اے   پروجیکٹانی سر ءَ سرمایاکاری کنوکیں چینی کمپنیاں  بےسریں ھساب ءَ لین ءِ گیرگ ءُ  کیپیسٹی پیمینٹسانی سودا کتگ۔ بزاں کہ مُپت ھدا وام گون اِنت ئِے۔ ءُ کارپد اد ءَ نہ اوشت اَنت 6.5 ارب ڈالر کیمتیں سٹریٹیجک اہمیتیں داریں  ایم ایل ون ءُ دگہ لھتے منسوبہ ھم منّگ نامہ ءِ گڈسر ءَ سر اَنت۔ ھمے منّگ نامھانی(معاہدہ) دیری ءُ پاکستان ءِ نیزوریں معیشت ءَ سوب ءَ چین وت دل جَنگ اِنت۔

ھمے وڑ   چہ سی پیک پروجیکٹاں  ابید 2023 ءَ کراچی ءُ چشمہ  نیوکلیئر پاور پلانٹ  ءَ پہ نوکیں ریکٹرانی ھاتر ءَ  بَیوکیں 3.4  ءُ 4.8  ارب ڈالر ءِ منّگ  نامہ (معاہدہ) (زانگ نہ بیت کہ اے وام اَنت یا سرمایاکاری بوتگ) ھمے پیم چاردہ ارب ڈالر ءَ اڈّ بیوکیں دیامر بھاشا ڈیم ءِ زَر ءِ مزنیں بھرے ھم چہ چین ءَ وام ءِ سورت ءَ زورگ بوگ ءَ اِنت۔

یات بہ بیت کہ پاکستان ءِ پاور جنریشن بزاں کہ (بجلی پیدا) کنگ ءِ پیلڈ ءَ چین یک مزنیں کلاڑی یے جوڑ بوتگ ءُ تھنا سی پیک  پروجیکٹانی رد ءَ 8000 میگاواٹ  کیپیسٹی ءِ منسوبہ سرجم کتگ ئِے۔ اگاں ما بچاریں چہ دھکاں آ توری انوگیں وھد 90 درسد بہ بیت یا گوستگین پاکستان ءَ اڈّ بیوکیں انفراسٹرکچر منسوبہانی ٹیکہ چین ءَ دست ءَ  اَنت ءُ بوتگ اَنت۔  توری اے منسوبہانی تہ ءَ چین ءِ وتی فنانسنگ ءِ مزنیں بھرے ھوار مہ بیت انچش کہ  داسو ہائیڈرو پاور پروجیکٹ ءُ تربیلا ڈیم ءِ گیشیں بھرانی اڈّ کنگ۔ پاکستان ناں تھنا پہ وتی انفراسٹرکچرانی اڈّ کنگ ءِ ھاتر ءَ بلکیں وتی وامانی دیگ ءُ بجٹ ءِ پورو کنگ  ءِ ھاتر ءَ ھم چہ چین ءَ کوروکائی وام زیر ایت۔

یک پٹ ءُ پولے رِد ءَ پاکستان ءَ چہ 2011 ءَ بگرداں 2021  ءِ سالاں ھمک سال  وامانی دیگ ءِ ھاتر ءَ ءُ توازن ءَ چہ دباؤ ءَ رکینگ ءِ ھاتر ءَ لازم چہ چین ءَ  یک ناں یک ایمرجنسی بیل آؤٹ وامے زُرتگ۔ انگت چہ ایشاں پیسرگیں واماں اے ھساب ءَ نہ یا اَنت۔

اے وھد ءَ پاکستان ءِ ڈَنّی وام کساس 130اَرب ڈالر بنت،ءُ چہ اشاں کساس 30% چین ءِ ئیگ اَنت بزاں کہ 39اَرب ڈالر چین ءِ ئیگ اَنت اے وڑ چین پاکستان ءَ مزنیں وام دیوکے  جوڑ بوتگ۔ سہی بِہ بئیت کہ اد ءَ ما تھنا چین ءِ وامانی گپ ءَ اِنت۔ ءُ ایشی ءَ ابید چین ءِ پاکستان ءَ  تچکیں سرمایاکاری اوں ھست اَنت۔

پاکستان اے چینی واماں نہ تھنا انفراسٹیکچر، بجٹ پورو کنگ ءُ چہ بھران(بحران) ءَ رَکّگ ءِ ھاتر ءَ  بلکیں اشاں دگہ یک اہمیت داریں چیزے  ءِ سر ءَ ھم کارمرد کنت۔ شما کدی جیڑ اتگ کہ اے ملک وَ کنگلائی ءِ شُلیں تلمب ءِ  سر ءَ اوشتاگ بلے ایشی ءِ سئیں لشکرانی کرّ ءَ یکشلہ نوک نوکیں چین ءِ سلاہ ءُ ٹوپ  چے پیم آیگ اِنت؟ ءُ چہ آیاں لھتے پوجی سسٹم ھمنچو نوک بزاں کہ جدید اَنت کہ آ پاکستان ءَ کدی وتی واب ءَ ھم چہ یورپ ءُ امریکہ ءِ کرّ ءَ دست نہ کپ اَنت۔ باز کم مردم زانت کہ پاکستان ءِ  پوج ءَ صلاحیتانی رد ءَ معیاری ءُ مقداری دوئیں  سورتاں گوستگیں یک دَھُکے ءَ کہ اِنکس دیمروئی کتگ آ ملک ءِ سرجمیں گْوست ءَ نہ کتگ ءُ اے دُرست چین ءِ منّت ءَ بوتگ اَنت۔

 زاھر اِنت کہ اے درگت ءَ مارا سرکاری کچ ءُ ھساب وَ دست نہ کپ اَنت بلے اندازگے جن اَنت کہ پاکستان ءَ چہ دوھزار پانزدہ ءَ چین ءِ گور ءَ نوکیں آپی جنگی گراب، بالی جنگی گراب، آپدُز ، بمب گاڑی ، وڑ وڑیں میزائیل ، ریڈار ، ڈرون ءُ دگہ الیکٹرونک جنگی سامان کہ 17 /20 اَرب ءِ   ڈالرانی بنت آ وام ءِ سورت ءَ زرتگ اَنت۔ ءُ شر بزان اِت کہ اے دراھیں چیز انچش گوات  ءِ سر ءَ ایر نہ بنت پہ اشانی چارگ ءُ ھیالداری ھاتر ءَ  چینی انجینئر ءُ ٹیکنیشنیر رونت ءُ کاینت۔ ءُ سلاھانی پوہ بوگ ءِ ھاتر ءَ چین ءِ ءُ پاکستان ءِ پوج ءَ بازیں بر ءَ  پوجی مَشق ھم کتگ۔ شر بزان اِت کہ چہ اے مشق ءُ پوجی ٹریننگ پروگراماں نہ تھنا پوجی رپک یک ءُ دومی سوج دیگ بنت بلکیں چہ اشاں سیاسی سیادی ھم گیش بیت۔ راستیں کسّہ ایش اِنت کہ پاکستان ءِ ایٹمی ءُ میزائیلی پروگرام  چین ءِ منّت ءَ برجاہ اَنت ءُ نی ما گْوشت کنیں پاکستان ءِ سرجمیں پوج ھمک ھساب ءَ ھمے چین ءِ منّت ءَ اوشتاتگ۔

نُو چین پاکستان  ءِ سر ءَ انچش مھربانی ھدا ءِ نام ءَ کنگ ءَ اِنت ءُ ناں پہ سنگتی ءُ دوستی ءِ نام ءَ۔ اے دُرستیں سرمایاکاری ءُ وامانی دیگ  ءِ پُشت ءَ چین ءِ مزنیں منافع گرگ ءِ مکسد ھست اَنت بلے مئے چارگ ءِ شبین  ءِ ھساب ءَ اے گپ اہمیت دار ایت  کہ چین شر زانت کہ پاکستان گوں وتی نیزوریں معشیت ءَ کدی ھم وھد ءِ سر ءَ چین ءِ واماں دات نہ کنت۔ھمے سوب اِنت چین پاکستان ءَ ھمک آؤکیں روچاں وام دنت ءُ آئی ءِ پیسرگیں واماں رول اوور کن اَنت۔ (بزاں کہ وامانی سر ءَ سود گیشتر بَیان بنت)۔

 گڑا چین پرچا اے دراھیں چیزاں کنگ اِنت؟ 

 بنیاتی سوب ایش اِنت کہ چین ءِ گور ءَ پاکستان ءِ اہمیت  آئی ءِ سٹریٹیجک شری اِنت  ءُ زرباری ایشیا ءُ اَرب زِر ءَ چین ءِ یک ارزشتی ھمراھے۔ چین چہ درستاں پیسر وتی الاکائی سٹریجیٹک دژمن، انڈیا  ءَ آئی  ءِ روکپتی باڈر ءِ نیم ءَ گَٹّ کنگ ءِ  ھاتر ءَ پاکستان ءَ یک پوجی کاونٹر ویٹے ءِ ھساب ءَ کارمرز کنت ءُ چین داں بازیں ھدّ ءَ اے کار ءَ سوبین اِنت۔ انڈیا ءِ شاونسٹ دانشورانی پاکستان ءِ نیزوریں معشیت  ءِ ھلاپ ءَ مزنیں ٹاکوراں پد اوں زمینی ھکیکت ایش اَنت انڈیا ءِ زمینی لشکر ءِ 4/3 ءُ آپی ءُ آزمانی لشکر ءِ 4/2 بھر آئی ءِ روکپتی باڈرانی نیم ءَ اِنت۔

ھمے وڑ  سی پیک ءُ گوادر ءِ بندن پہ چین ءَ پیسر ءَ معاشی ناں بلکیں آئی سٹریٹیجک منسوبہ اَنت۔ چین ءِ خام تیل ءِ سپلائی ءِ یک مزنیں بھرے چہ پارس ءِ کلیج ءَ ءُ بنگال کلیج ءِ زرباری رودرآتک ءَ ھستیں تنگ مالاکا سٹریٹ ءَ گوز اَنت ءُ چین ءِ زرباری زِر ءَ سر بنت۔ ناوشیں ھالتانی سوبب ءَ کجام ھم وھد ءَ امریکہ ، انڈیا ءُ آسٹریلیا ءُ آدگہ اے سٹریٹ ءَ بند اَنت ءُ چین ءِ سپلائی روٹ ءَ پروشت کن اَنت۔چیزے وھد پیسر اھمر زر ءُ اَدن ءِ کلیج ءَ چہ یمن ءِ حوثیانیانی نیم ءَ واپار کنوکیں مزنیں لانچانی سر ءَ اُرش ءُ دزگیر کنگ  ءَ پد گمان ھمیش اِنت کہ آوکیں وھد ءَ  دگہ کُوَت ھم چشیں کار کنگ ءَ ھچ چک ءُ پد نہ بنت۔ 

 کجام ھم ناوشیں ھالتانی تہ ءَ گوادر پورٹ ءُ سی پیک ٹرانسپورٹ روٹ پہ خام تیل ءِ چہ پارس ءِ کلیج ءَ چین ءَ سر کنگ ءِ یک دومی راھے بیت۔اگاں ما گیشیں بچاریں کہ انوگیں وھد ءَ چین ءِ ھچ وڑیں آپی لشکر یا آپی جنگی گراب مارا گوادر ءَ گندگ ءَ نَیت۔بلے چین آوکیں وھد ءَ گوادر ءِ پورٹ ءَ پہ ارب زر ءُ پارس ءِ کلیج ءِ مانیٹرنگ ءِ  ھاتر ءَ کارمرد کت کنت بلکیں چین اے کاراں چہ پیسر ءَ ھم کنگ اِنت۔

برز ءَ کُرتگیں باوستانی رِد ءَ ما اے گپ ءَ شری  ءَ سرپد بہ ایں کہ چین ءَ پاکستان ءِ  وڑیں کنگلائیں ملک چے پیم وام ءُ سرمایاکاریانی  ٹَٹْاں ماں اڑینتگ ءُ نُو چین وتی احسانانی مٹ ءَ پاکستان ءَ چے ڈول وتی سٹریٹیجک مُپادانی ھاتر ءَ کارمرد  کنگ ءَ اِنت۔گوادر ھم ھمے سٹریٹیجک پالیسیانی برکت ءَ یک زندانے جوڑ بوگ ءَ اِنت۔ 

سامراجی ءُ نوآبادیاتی پالیسیانی پیژگاہ 

پاکستان نہ وپاکے(وفاق)،ءُ نہ اد ءَ چشیں رھبند ھست کہ آئی چمّاں دُرست برابر اَنت۔نہ چشیں بیرکے ھست کہ آئی  ءِ  ساھگ ءَ ما دُرست یک اِیں۔ اد ءَ پاکستانی سِیْریں مردم امریکہ ءُ آدگہ سامراجانی دست  ءِ چیر ءَ اَنت۔ سُتک ءَ سر وتی کرّ ءَ ھستیں راجانی واستا وت یک سامراجے ءِ  دروشم ءَ اِنت کہ آئی  ءِ شریں درور بلوچستان اِنت۔ 

کلات ءِ ریاست ءِ سر ءَ اُرش ءُ آئی  ءَ پہ زور گوں پاکستان ءَ ھوار کنگ ءِ وتی بنداتی روچاں بلوچ سیاست دو بھر ءَ کتگ یکے پارلیمانی سیاست ءُ دومی گوریلہ جنگ،اے نبشتانک ءِ  تہ ءَ پارلیمانی سیاست ءِ گپ کنگ نہ بیت،پرچا کہ سرجمیں پاکستان زانت کہ بلوچ چاگرد ءَ پارلیمانی سیاست  ءِ سر ءَ باور کنگ یل داتگ ءُ آ پارلیمنٹ  ءِ نیم ءَ نہ چار ایت ءُ دومی نیم ءَ سلاہ بندیں جھد اِنت کہ ما آئی مسلح جھدوجھد گْوشیں۔ گوستگیں ھپتاد ءُ پنچ 75 سال اِنت کہ بلوچستان ءِ مال ءُ مڈّیانی لٹ ءُ پُل ءُ راجی ھکّانی نہ دیگ سوب ءَ بلوچ ورناھانی تہ ءَ پاکستان ءِ ھلاپ آیانی دل ءَ یک آسے بن داتگ۔ پاکستان ءِ اڈّ بوگ ءَ رَند بلوچستان ءَ نہ پیکٹری ءُ صنعتے جَنگ بوتگ نہ انفراسٹرکچر ھست ءُ نہ بنیاتی آسرات ھست۔ استمان چہ مادنی مڈّیاں پُر اِنت۔ بلے پاکستان ءِ ریاست اے مال ءُ مڈّیاں الاکائی چانوگرانی کوپگ  ءَ نشتگ ءُ پُلگ ءُ برگ ءَ اِنت۔

ھمک وڑیں مال ءُ مڈیانی پُلگ ، زند ءِ بُنیاتی آسراتانی نیستی  ءُ راجی ھکّانی نہ رسگ بلوچ ورناھانی تہ ءَ ریاست ءِ  ھلاپ  ءَ یک کدرتی نَپرتے پیداگ کنت۔ ھمے ھاتر ءَ بلوچستان ءَ جتا جتائیں وھداں تپنگیں جھد دیم ءَ اتکگ انت کہ اشانی وتی یک مزنیں گوستانکے ھست۔  

گوریلہ جنگ ءِ ھستی وڑے ناں وڑے برجاہ بوتگ۔بلے بیست ءُ یکُمی کرن ءِ بندات بوتگیں گوریلہ جنگ دنیگہ برجاہ اِنت۔ بیست ءُ یکمی کرن ءِ گوریلہ جنگ چہ نوزدہ سد ءِ گوریلہ جنگ ءَ لھتے سورتاں مٹ اِنت۔ پرچا کہ اے وھد ءَ گوریلہ جنگ ءِ رھشونی چہ نواب ءُ سردارانی دست ءَ در آتکگ ءُ مڈل کلاس بلوچ ءِ دست ءَ آتکگ۔

بلے دگہ یک گپے شر بزان اِت کہ نَود ءِ دھک ءَ بیوکیں گوریلہ جنگانی تہ ءَ مارا سویت یونین ءِ ھستی  ءِ سوب ءَ دیمروئی پَسُند رُجھان رس ایت بلے اے وھد ءِ ملسح جھدوجھد ءِ  تہ ءَ مارا دیمروئی پَسُند رُجھان گندگ ءَ نئیت۔ پیشیگیں تھریکاں سرجم ءَ بلوچستان گپت نہ کتگ۔بلے اے تھریک ءَ چہ کوھلو ، ڈیرہ بگٹی ءَ بگر داں گوادر ءَ وت ءَ تالان کتگ۔ ایشی ءَ چہ کوچگ ءُ  میتگاں بگر شھر ءُ بازاراں وتی کارکن پیداگ کتگ انت۔کراچی ءِ بلوچ آباتی ھم اے تھریک ءِ ساھگ ءَ اتکگ اَنت ءُ شھر ءِ لھتے مھنت کنوکانی بھر ھم اے جنگ ءَ ھوار بوتگ۔

اے جنگ دنیگہ برجاہ اِنت۔ نو اے بابت ءَ یک بلوچ راجدوست دانشورے یا ادیبے ءُ جنگ ءِ سروکی کنوکیں مردمے گْوشت کنت کہ گوستگیں بیست سال ءَ بلوچاں ءَ چہ اے گوریلہ وارفیئر ءَ  چے سوبینی زرتگ ءُ چے  گوازینتگ۔بیست سال پہ تجزیہ کنگ ءَ یک مزنیں مُدّتے۔اے جنگ ءِ تہ ءَ بلوچستان ءِ بازیں جاھاں آباتی چہ سر ءُ بن ءَ گار بوتگ۔مردم پہ زور لڈّ ءُ بوج کنائینگ بوتگ انت۔ نوکیں زند ءِ شوھاز ءَ دمک ماں دمک ءَ بزّگ بوتگ اَنت۔ کراچی ، ھبّ ءُ تربت  ءِ ڈولیں شھراں جنگ ءِ بزگیں ءُ چہ آسراتیاں زِبَھریں مردماں گوں وتی کوھنیں یاتاں نوکیں زند بندات کتگ۔ھزاراں ورناہ جنگ ءِ کار  ءَ اتکگ اَنت۔ھزاراں ورناہ پاکستان ءِ زندان ءَ شتگ اَنت ءُ ژانگلولیں جون بوتگ ءُ اتکگ اَنت۔بازیں سیاسی کارکن ماں زنداناں دہ دہ سال اِنت کہ بند اَنت۔ ایشانی لوگ  ءِ مردماں ھبر نہ اِنت کہ اے زندگ اَنت یا مرتگ اَنت۔ پہ وتی کس ءُ ازیزانی یل کنگ ءِ ھاتر ءَ گونڈلانی کسانی ماں پریس کلبانی دیم ءَ زھرشانی ءَ گوستگ ءُ جوانی دمک ءُ چارراھاں گوں بَینراں گوزگ ءَ اِنت۔بلوچستان ءَ اشتمائی کبر دست کپتگ اَنت۔سرجمیں بلوچستان یک پوجی چھاؤنی یے جوڑ بوتگ۔ڈیتھ اسکواڈ ءَ نام ءَ بلوچ بلوچ ءِ دیم ءَ اوشتارینگ بوتگ۔

اے ھون ءُ آس ءِ ھوری ءَ بلوچ چاگرد  ءِ تہ ءَ مزھبی شِدّت پَسُندی ءِ گیش کنگ  ءِ ھاتر ءَ دمک دمک ءَ مدرسہ چو کٹومب ءَ رُستگ اَنت۔ بازیں بلوچ سیاستداناں چہ ریاست ءِ زورکایانی سوب ءَ مُلک یل داتگ۔اے تھنا گْوستگیں پانزدہ ءُ بیست سالانی تہ ءَ جنگ زدیں بلوچستان ءِ ھال اَنت۔اے گپ ءَ وَ ھچ شک نیست کہ اے دُرست ریاست ءِ زوراکی اِنت۔چوناھا ریاست ھکمران طبقہ ءِ دست ءَ مھنت کنوکیں طبقہ ءِ سر ءَ زُلم ءُ زوراکی کنگ ءِ یک اوزارے۔ بہرھال ریاست ءِ اے زوراکیانی ھلاپ ءَ وھد وھد ءِ سر ءَ عوام روڈاں ھم دراتکگ ءُ ریاست ءِ دیم ءَ چو کلات ءَ اوشتاتگ۔

 اے ڈول پرچا بوتگ کہ بلوچ چہ گراؤنڈ  ءِ سیاست ءَ دور/دیر بوتگ۔پرچا بلوچ مات چہ سیاست ءَ تُرس اَنت  ءُ  وتی چُکاں سیاست کنگ ءَ نَیل اَنت۔اے جنگ ءِ تہ ءَ بازیں بلوچ زاتی دژمنی ءَ چاری ءُ مُکبری ءِ نام ءَ بےمیار کشگ بوتگ اَنت۔بازیں بلوچاں وتی شریں باندات ءِ ھاتر ءَ وت ءَ مزلومے کتگ ءُ یورپ ءَ شُتگ اَنت۔چنچش ورناھیں بلوچاں مسلح تنظیمانی ساھگ ءَ بَتّہ زُرتگ۔ بازیں کس تنظیماں پہ زرانی ھاتر ءَ یا تنظیمانی نام ءَ بیگواہ کنگ بوتگ اَنت۔چنکس وت ماں وتی جنگ ءَ مرتگ۔چُنت پدائی شکرورنائی ءَ مرگ ءِ امبازاں شتگ اشاں تھنا سالے پیش تنظیم جوائن داتگ کتگ ءُ  دومی سال ءَ ھال اتکگ پلان جاہ ءَ جنگ ءَ وت ءَ کربان کتگ اِش۔اے درستانی ھساب بلوچ قیادت ءِ  سر ءَ کاینت۔اد ءَ لھتے دانشور گْوش ایت اے جنگ اِنت جنگ نسل لوٹ ایت۔گمان ھمیش اِنت اے دگہ دوسد سال برجاہ بہ بیت۔

بلوچستان ءِ آزادی ءَ ءُ بلوچ راج ءِ وت واجہی ءَ منّ ایں۔بلے اے آزاتی چے ڈولینے بیت ؟ آزادیں بلوچستان ءَ،اوگانستان  ، سند (ھاس کراچی) ایران ءُ پنجاپ ءِ بلوچانی مقدر چے بیت ؟ کہ چہ کرناں آود ءَ جھمنند اَنت۔چہ اے راہ ءَ دگہ ھچ نیست کہ بلوچستان یک سوشلسٹ پروگرامے اندر ءَ آزاد کنگ لوٹ ایت ءُ اے آزادی دنیا ءِ درستیں بلوچ ءُ مزلومانی راستیں آزادی بیت۔

اے کے اَنت کہ آزادی گِر اَنت؟ کے اَنت کہ سامراج ءِ منسوبہانی ھلاپ مھکم بنت؟ 

کے اَنت کہ بلوچستان ءَ  چہ یک پوجی چھاؤنی ءَ یک وشھالیں ڈیھے جوڑ کنت اَنت ؟

گوادر ءِ باڈراں کے ولگوج کنت؟

اے ھمیش بلوچستان ءِ لَکّانی کساس لس مھلوک بنت کہ وتی بقا ءِ ھاتر ءَ جنگ ءَ اَنت۔

 

 دنیا ھال پیسریگین ڈول ءَ نہ اَنت۔چیزے سالاں دنیا ءِ ھمک ملک ءَ یک یک ءَ انکلابی تھریک چست بوتگ اَنت ءُ بنت۔ ھاس چہ کرونا وائرس ءَ پد پاکستان ءَ ھوار سرجمیں دنیا ءَ ما لکّانی کساس مردمانی تھریکاں دست کنیں کہ مردم چے ڈول پادآیگ اَنت،باڈر ءُ ھکمرانانی بھر کنگ ءَ پد اوں مزلوم وتی مزلونیں برات ءُ گْوھار واستا توار چست کنگ اِنت۔ھمے بلوچ چاگرد ءِ ھم راستی اِنت کہ مزنیں وابے ءَ پد پاد اتکگ کہ ایشی ءَ نوکیں رھشون ءِ شوھاز اِنت۔گوادر ءَ یک مولانائی ءَ کہ عام جیڑھانی سر ءَ گپ کتگ گڑا سرجمیں مھلوک ءَ آ آزمان ءَ سر کتگ۔گریبیں دریاورد آئی دست ءَ چُک اَنت ءُ آئی ءَ امباز کن اَنت۔لکّانی ھساب ءَ مردم گوں آئی ءَ مھردرشانی کن اَنت آئی وتی واب ءَ ھم نہ جیڑ اِتگ۔بازیں گانا پہ آئی جوڑ کنگ بوتگ۔سوشل میڈیا ءِ تہ ءَ ھزاراں کساں آ چہ وتی آئی ڈیاں شیئر کتگ۔ آ شیرِ بلوچستان ءِ نام دیَگ بوتگ۔

حق دو تحریک ءِ بندات کنگ ءَ پد ءَ مولانا گند ءُ گسڑیں پارلیمنٹ ءَ شتگ۔مولانا وھدے کہ عوام ءِ توار بوتگ گڑا عوام ءَ سر ءِ بان ءَ کتہ بوتگ،بلے وھدے کہ پارلیمان ءَ شتگ گڑا عوام ءَ آ چہ آزمان ءَ زمین ءَ دَور داتگ۔ نی آ ھمے جنگولیں عوام ءَ جاھل عوام گْوش ایت۔

 

ھمے وڑ بلوچ یکجہتی کمیٹی ءَ بلوچ لانگ مارچ ءِ قیادت ءَ پد باز ستا رستگ  بلوچ لانگ مارچ ءَ پاکستان ءِ مھنت کش طبقہ ءَ ھمایت گون بوتگ ھمے ھمایت سوبب ءَ ریاست ءَ لانگ مارچ ءِ مھلوک سر ءَ زوراکی کنگ داشتگ۔  

ھاس ھما وھد ءَ کہ مارچ اسلام آباد ءَ سر بوتگ۔

بلے جُست ایش اِنت کہ  عوام ءَ کہ ھما قیادت

ءَ مینڈیٹ داتگ آ قیادت یک غیر واضح پروگرام ءُ لائن آف ایکشن ءِ نیستی ءِ سوبب ءَ عوامی مینڈیٹ ءِ شری سر ءَ جارکشّی(ترجمانی) نہ کنگ ءَ اِنت۔ اے قیادت ھم عوام ءِ نیم ءَ چہ ھپتُمی آزمان ءَ زمین ءِ سر ءَ دور دیگ ءِ دیمپانی ءَ کت کنت۔

 ھمے بُنیات ءَ ما اے ھکّیں گپ ءَ جَنیں کہ بلوچ لانگ مارچ ءَ پد بلوچ راج  ءِ شانداریں بگاوت  یک رندے پد ءَ اقوامِ متحدہ ءُ مگربی سامراجانی دیم ءَ کربان کنگ بوگ ءَ اِنت۔نزریاتی نادان دگہ چے کت کناں۔ یک کورے ھم پلستین ءِ بزگیں مھلوک ءِ نسل کشی ءِ درگت ءَ اقوامِ متحدہ ءُ مگربی سامراجانی کردار  ءَ دیست کنت بلے ھما کہ نزریاتی نادانے، چہ آئی ءَ مستریں کوْر نیست۔ یک برے پد ءَ بلوچ راج ءِ لاپ ءَ کارچ جَنگ بوگ ءَ اِنت ءُ شھیدانی ھون بے مراد ءَ ھُشک بوگ ءَ اَنت۔ بلوچ ورناہ چُش پُشت کنزی نہ کن اَنت۔آیاں سرپد بوگی اِنت نہ تھنا بلوچ بلکیں سرجمیں دنیا ءِ مھنت کنوکیں طبقہ آیانی پلگاریں آزاتی ءُ مرادانی زامن اِنت۔ بلوچ ھکمراناں ھوار زالمیں ریاست ءُ دنیا ءِ  درستیں ھکمران طبقہ ءَ ھما جونوار اَنت کہ بلوچ راج ءُ پلستین ءَ ھوار آ دگہ مزلومانی گوشت چُنڈگ ءُ ورگ ءَ زندگ اَنت اشانی دیم ءِ گُلُّڑی ھمے مزلوم ءُ مھکومیں عوام ءِ ھون چُسّگ ءِ برورد اِنت کہ مدام گیش بوان اِنت۔

سلاہ بندیں جھد ءُ عوام ءِ مزاحمت

پدائی سربلند ءَ اگست 2021  ءَ بلوچ وارڈ ایکسپریس روڈ گوادر ءَ چینی انجینئرانی سر ءَ وتکش تراکے کتگ۔باریں اے تراک ءَ چنت چینی مُرتگ، پاکستان ءَ چنچو نُکس بوتگ ءُ چین چنکس تُرس اِتگ!! گْوش ئے ھمے اُرش ءَ رند پاکستان لشکر ءَ گوادر ھاس بلوچ وارڈ ءَ آسگواری ءِ سَنَد رستگ۔مردمانی تُرسینگ، بازار ءَ کرفیو جَنگ،  لوگانی دیم ءَ ڈرون بال دیگ، لوگانی سر ءَ پوجیانی دارگ ، دریاورداں دریا ءِ روگ ءَ سوکیگ کنگ، ھمنچو زلم کہ ریاست ءَ کنگی بوتگ آئی ءَ کتگ۔

نُو اد ءَ اہمیتداریں گپ ایش اِنت کہ اے اُرش ءَ  لس مھلوک ءِ شئور سر ءَ چنچو سان(اثر) کتگ ؟ چے گوادریاں 

ھاس بلوچ وارڈ ءِ مردماں اے ھیرو یے منّ اِتگ ؟

انّاں!! بازار ءَ اے باوست بوتگ کہ اد ءَ انچش سیکورٹی ءَ پد اوں اے چون اتکگ ؟ 

باریں اے پاکستان وت روان نہ داتگ ؟ 

ایشی ءِ پُژدر ایش اِنت کہ ایکسپریس روڈ ءِ اڈّ بوگ ءِ سوب ءَ  چہ رودرآتکی تیاب ءَ زر ءَ ایر آیگ ءِ دو سئے راہ بوتگ اَنت چہ آیاں یکے بلوچ وارڈ ءَ گوستگ۔  جون ءُ جولائی ءِ ماھاں اد ءَ ایران ءِ راہ ءَ واپار بوگ ءَ بوتگ۔

راستیں ءُ اہمیتداریں گپ ایش اِنت کہ اے وھد ءَ بلوچستان ءَ گیشتر ورناھانی تہ ءَ سلاہ بندیں جھد ءِ دوستی شتگ نو سڑکانی سر ءَ زھرشانی ، ھرتال ، دھرنا ءُ مظاھرہ ءِ دروشم ءَ عوامی مزاحمت توان گیران اِنت۔ پمیشکہ بلوچ ورناھاں ریاست ءِ پراپیگنڈا ءُ بے عوام کُوَت رد کتگ اَنت۔ورناہ زانت اَنت کہ اے وتی زندمان ءَ وش کنگ لوٹ اَنت ءُ ورناھانی دست ءَ تُپنگ دیگ اشانی مستریں مکسد اِنت۔اد ءَ یک جستے چست بَیت کہ ما ھما آزاتی ءِ گپ ءَ جنگ ءَ ایں یا ھما آزاتی کہ بلوچ راج ءَ کبول اِنت آ آزاتی ھچ وڑ سرمایاداری بُنیات ءَ نہ بیت۔ بلوچ راج ءِ منَّتگیں آزاتی سوشسلٹ بلوچستان ءِ سورت ءَ بیت ءُ کش ءُ گور ءِ ملکانی سوشلسٹ فیڈریشن ءَ  ھوار بوگ ءَ بوت کنت۔