مھرک ءِ ھیالی اکس

 نبشتہ کار: جاوید بلوچ

ھانی اکرم ءِ جوڑ کُتگیں مھرک ءِ ھیالی اکس ءِ سر ءَ کمنٹس، لیکہ  ءُ فتویٰ آں پد من صلاح الدین بیوس ءِ تامُر دیست۔ تامُر ءِ چارگ ءَ پد گوں بیوس ءَ زبان دات کہ گوں تو تپاک نہ کناں  ءُ جُھد کناں وتی تپاک نہ کنگ ءَ نبشتہ بہ کناں۔ نبشتہ کنگ ءَ پیسر مھرک ءِ دگہ یک ھیالی اکسے نظام اللہ بخش ءِ جوڑ کُتگیں دیم ءَ اتک۔ ھر دو ایں اکس ھیالی انت۔۔۔۔۔ ھیالی اکس چیا گُش انت؟ کجام ھیال ءِ جیڑگ ءِ رزا ھست یا نیست، ازمکار کے ءَ جُست بہ کنت بہ جیڑ ایت  ءُ چے بہ جیڑ ایت۔۔۔۔ اشیی ءِ پسو ءَ ھما ازمکار وت بہ دے انت  ءُ وتی ازم ءِ دروشم ءَ دیگ ءَ اَنت ھم۔ بلے من یک نودربرے ءِ بستار ءَ ادا وتی ھیالاں، گوں بیوس ءَ تپاک نہ دارگ ءِ سر ءَ وتی گپاں نبشتہ کنگ ءَ آں پمشکہ گوں منی گپاں ھم تپاک دارگ ءُ نہ دارگ ءِ ھک ھرکس ءَ ھست۔ 

جیڑہ اے نہ انت کہ ھانی ءِ اکس چنچو مردم ءَ دوست بیت  ءُ چنچوک ءَ نہ بیت۔ کے چی کمنٹ کنت ءُ چون وتی نا دوستی ءَ درشان کنت۔ جیڑہ اِش انت کہ کے چی بہ جیڑ ایت؟ اشیی ءِ سوج ءَ ھم من دیاں۔۔۔۔اے جیڑہ یے۔ 

توہین ءِ مھروک  ءِ فتویٰ یک نیمگے ءُ اے سوج دیگ کہ تو چو بہ جیڑ  ءُ چُش اکس جوڑ بہ کن دگہ نیمگے۔ چوناھا انچش کہ ھانی ءَ وتی ھیالانی رِد ءَ  وتی آرٹ جوڑ کُتگ، ھمے وڑ ءَ بیوس ءَ وتی کسہ گُشی یے وڑ ءَ وتی تنقید کُتگ، انچش من وتی ھیالانی رِد ءَ اے نبشتانک ءَ نبشتہ کنگ ءَ آں، مُلا اعجاز وتی سِتک ءِ رِد ءَ ناگمان ءِ آزمانکانی سر ءَ زھر گِت ءُ ڈاکٹر حنیف شریف وتی آزمانک نویسی ءِ رِد ءَ ناگمان ءِ پلہ مرزی ءَ کنت۔ جیڑہ ھما وھد ءَ سر کشیت کہ من بہ باں یا کسے، دگرے ءَ بہ گُشاں کہ تو ستم چُش ءُ چو بہ جیڑ یا چو بہ کن۔ اختلاف دارگ ھراب نہ انت، بحث ءُ تران یا مکالمہ ھم ھرابیں چیز نہ انت بلے چیزاں متنازعہ کنگ ھراب انت چیاکہ سوشل میڈیا ءِ جنگل ءَ سادگیں، پلینڈ ءُ فیک ایں مردم مُچ انت آ چہ اشیی ءَ نپ زور انت ءُ چیزاں گیشتر متنازعہ کن انت۔ چہ اشیی ءَ یکے ءِ ھراس کنگ، تُرسینگ، ذھنی اذیت دیگ  ءُ ذاتی دژمنی کشوکاں نپ رسیت۔ 

من گوں بیوس ءَ پرے ھاتر ءَ تپاک نہ کناں اگاں کسہ گُش ءَ اے اختیار ھست کہ کسہ ءَ وتی وڑ ءَ بہ گُشیت ءُ کسہ سپر کنان مَٹ بیت کنت گڑا آرٹسٹ ءَ ھم وتی ھیالی اکس جوڑ کنگ ءِ اختیار بہ بیت۔ بوت کنت کہ من بیوس یک کسہ گُشی یے دروشم ءَ دیستگ  ءُ من عادت آئی ءِ کسہ گُشگ رِپک ءُ انداز  ءِ دوست داروکے آں پمشکہ من ءَ مرچیگیں آئی ءِ تامُر ءِ تہ ءَ آ چہ کِسہ گُش یے ءَ گیش یک مُلا یے گندگ ءَ پیداگ اَت کہ آ وتی تران ءِ تہ ءَ فتویٰ دیگ ءَ اِنت کہ ستم ٹائٹل ءَ دور بہ کنت، دومی نیمگ ءَ پد ءَ ھمے بقول ءِ بیوس ءِ وتگڑیں مھرک ءِ ھیالی اکس (ھالانکہ ھیالی اکس وت ھمے گُشگ ءَ انت من وتگڑیں ھیالے آں) تھم نِل ءَ جتگ  ءُ نبشتہ کُتگ ”عزت تئی مھرک برھنگ انت“ متلب عزت ءَ را ھم اے ھال ءِ دیگ ءَ دگہ چُشیں اکسے نیست کہ مھرک ءِ عکاسی ءَ بہ کنت؟ 

من سما کُت کہ اے اکس ءَ بیوس انچو کُدینتگ کہ آئی ءِ کسہ گُشگ ءِ انداز مرچی چَٹ بدل بوتگ، آ ھمے لوٹ ءَ کنگ ءَ اِنت اکس کار ءَ توہینِ مھرُک ءِ جرم ءَ کھڈن کنگ بہ بیت کہ آ ٹائیٹل  ءَ بدل بہ کنت۔ ھمے وڑ دگہ لھتیں سنگت ھم سک کُداِتگ یا جزباتی انت۔ اگاں مھرُک ءِ توہین انچش ناقابل ءِ برداشت انت گڑا مُلا وَ توہینِ مذھب ءَ وتی دینی سِتک ءِ بھرے سرجم بنت آ پرچا دھشتگرد، انتہا پسند ءُ دین ءِ ٹیکھدار گُشگ بنت، اود ءَ پرچا ما سیکیولر جوڑ بئیں؟ 

اگاں بلوچ گوستانکی کارستانی کم شرپ ءِ کانودے ھست یا باندہ بلوچ یک آجو ایں ریاستے ءِ واھُند بیت اود ءَ گچین کُتگیں بلوچ ءِ نماھندگ کانودے جوڑ بہ کن انت کہ کس  ءَ بلوچ گواستانکی کارستانی کم شرپ کنگ ءِ رزا نیست چو پاکستان ءِ توہینِ مذھب ءِ کانود ءَ کہ آئی ءِ  استعمال چون بوھگ ءَ اِنت ما شرتر زان ایں۔۔۔۔۔ گڑا بوت کنت کہ بلوچ فلم جوڑ کنوک ھالی وڈ  ءِ کدّ ءَ دیمرھی کنگ ءَ ابید ھم چُش کُت مہ کن انت۔ بلے پہ زور اے گُشگ کہ چو بہ جیڑ، چو بہ کن  ءُ چُش اکس جوڑ بہ کن، داں چنچک ءَ بیت؟ 

مھرک ءِ اکس اے بیت نہ کنت، اے ھرابیں گپے نہ انت۔ بیت کنت یکے ءَ مھروک ءِ دگہ اکسے وتی ھیالانی تہ ءَ جیڑ اِتگ بلے پہ زور مھرک ءِ جاگہ ءَ اے گُشگ کہ چُش گڑا باندہ یکے پِلاں راجی راھشون ءِ اکس ءَ یا پلانی ءِ مات ءِ انچیں اکسے جوڑ بہ کنت۔۔۔۔گڑا تو چی گُش ئے؟ اے جملہ پہ زور یک چیزے ءِ متنازعہ کنگ انت۔ زاناں راجی راھشون ءِ راجدپتر ءَ چُشیں ذکرے ھست یا پلانی ءِ مات ءِ بابت ءَ چُشیں کسہ یے راجدپتر ءِ بھر اِنت کہ آ کور ءَ جان شُدگ ءَ شُتگ  ءُ سک شر رنگے بوتگ؟ پد ءَ آئی ءَ وتی ملگور ءَ گوں وت ءَ چیر داتگ؟ اگاں نیست گڑا زور آرگ ءُ ادا پِر کنگ نا انساپی یے۔ 

نی گپ اش کہ مھرک کور ءَ جان شودگ ءَ شُتگ تھنا گشان ئے کشتگ، یا سرجم ءَ پُچ ئے کشتگ انت یا نِزر کنگ ءَ مُرتگ یا آپ ءَ بُڑ اِتگ اے دُرسیں اختلافاں ھور کن یک چیزے پدر انت کہ مھرک کور ءَ جان شودگ ءَ شُتگ۔ مھرک ءِ کد ءُ بالاد چون بوتگ، گُد کجا ایر ئے کُتگ انت، موسم زمستان بوتگ یا گرماگ، گُد سُھر بوتگ انت یا زرد اے آرٹسٹ ءِ کار انت۔ آ بزانت آئی ءِ ھیال البتہ اگاں اے رَد انت گڑا جنکانی لُنٹ  ءُ بالاد یا ناگمان ءِ آزمانک  ءُ دگہ شعر  ءُ شاعری مُلایانی چماں رَد بوھگ ھم ھراب نہ انت۔۔۔۔۔۔۔ آ ھم کدّ ءِ وت، وتی سِتک ءِ رِد ءَ وانندہ اَنت۔ جاہ یے ما سیکولر بئیں جاہ یے بلوچ۔۔۔۔۔۔

گُڈ سر ءَ پد ءَ اے وضاحت ءِ کنگ کہ اکس ھراب انت یا شر، مھرک انت یا مھرک نہ انت، من اے بابت ءَ ھچ نہ زاناں من اے رویہ ءَ دوست نہ داراں کے کسے  ءِ چُش گُشگ کہ ستم چُش بہ جیڑ، چُش اکس جوڑ کن۔ اگاں مُلا فتویٰ دنت آ انتہا پسندے بلے من بلوچیت ءِ نام ءَ کسے ءَ کھڈن کناں گڑا آ بلوچ روایت  ءُ ربیدگ انت۔ 

ھئیر اے پیسلہ ءَ وھد وت کنت کہ آؤکیں وھداں وھدے بلوچی فلم انڈسٹری دیمرھی کنت، یا بلوچاں ھالی وڈ ءَ فلم جوڑ کُت گڑا اود ءَ ھم اللہ بخش الیف  ءُ سرفراز برقعہ  سر ءَ کن انت  ءُ مھرک، ھانی یا مھناز ءِ کارستاں پیلو کن انت یا اشانی جاگہ یاں جنک بنت، بیت کنت کہ دیمتر ءَ مھرُک ءِ اے اکس ھم جیڑہ یے مہ بیت یا اے اوں بیت کنت کہ مئے ریاست ءَ توہین  ءِ مھرک ءُ ھانی ءِ یک کانودے پاس بہ بیت  ءُ اشیی ءِ بگیری ءَ مردم درنجگ ءُ کُشگ بہ بنت۔