ھانی اکرم ءِ آرٹ "ازت ءِ مہروک" ءُ بلوچ زانتکار

 نبشتہ کار: ماران بلوچ

دو ءُ سئے روچ بیت کہ "ازت ءِ مہروک" ءِ نام ءَ یک آرٹے کہ ھانی اکرم نامیں آرٹسٹے ءَ جوڑ کُتگ سک باز وائرل بوتگ۔ آئیءِ ازم ءِ سر ءَ سک باز گپ ءُ تران بوھگ ءَ انت، جُست چِست بوھگ ءَ انت۔

بیا اِت ما ھم چندے گپ کنیں۔۔۔

اِزم سر ءَ گپ کنگ یک شریں عملے، باھدیں ھر چیز ارتقا ءِ عمل ءَ چہ بہ گوزیت تہ چیزانی تہءَ شری اتک بہ کنت۔۔۔۔گپ ءُ تران کہ نہ بیت گڑا چیز وتی بنکی جاہ ءَ اوشت انت ءُ دیما نہ کِنز انت۔۔

منی نِزّ ءَ ھانی اکرم ءِ آرٹ سر ءَ ھمے ھاترا ڈیبیٹ الّم انت، چیا کہ آئیءَ اے آرٹ تاریخ ءِ ریفرنس ءَ گوں جوڑ کُتگ۔۔

باھد وَ ھمیش اَت کہ بلوچ زانتکار بیات کین انت ءُ اے آرٹ ءِ سر ءَ یک intellectual debate ئے بندات بہ کُت ایں۔۔من وَ ھیران آں ھمیشاں کہ ما دانشور گوْشیں، اے لس مردم ءِ  ڈول ءَ کاینت یک کوکارے دینت ءُ پدا پُشت ءَ کِنز انت۔۔

مھے زانتکار ءُ کَوّاس چو لس مردم ءِ ڈول ءَ کیت ھانی اکرم ءِ پلمرزی ءَ کنت، بلے آئیءَ اے شرپ ءَ نہ بَکشیت کہ آئیءِ اے شھکار ءِ سر ءَ ڈیبیٹ بہ کنت۔۔کم ءَ کم زانتکار ءُ کَوّاس لس مردم ءِ ڈول ءَ چیزاں مہ چار انت۔۔اگاں ناں ما ھمے سرپد بہ ئیں کہ اے مردم ھم زالبولاں تھنا یک Tool ئے سرپد بنت۔۔

باھد وَ ھمیش ات کہ مھے دانشور ءُ سرپدیں مردماں آرٹ ءِ سر ءَ گپ بجتیں۔ بلے بژن ایش انت آ نشتگ انت لس مھلوک ءِ نفسیات ءِ سر ءَ  گپ جَنَگ ءَ انت۔۔گڑا لس مھلوک ءُ دانشورانی تہءَ چی تپاوت؟

زالبول پرچہ تنقید کنگ مہ بنت؟

چندیں سرپدیں مردم ءِ گپ ھمیش انت کہ اے آرٹ جَنک ءَ جوڑ کُتگ ھمے ھاترءَ تنقید کنگ مہ بیت۔۔آیانی گُشگ انت کہ تنقید ھم ھمے ھاتر ءَ بوھگ ءَ انت کہ آرٹ یک جنک ءَ جوڑ کُتگ۔۔

منی نِز ءَ اے ھما مردمانی گپ انت کہ آ نہ لوٹ انت کہ جنینانی کار ءُ کِرد برابریں چم ءَ چارگ بہ بنت۔۔اگاں چاگرد ءِ تہ ءَ جنین ءَ برابر چارگ لوٹ ءِ گڑا آئیءِ  سر ءَ ھم مردین ءِ رنگ ءُ دُروشم ءَ گپ ءُ تران بہ بیت۔۔۔آیاناں فیور دیگ آیاناں نزور کنگ ءِ راہ ءَ گیش مھکم کنت۔جنین ءُ جَنِک ءِ کار ءُ کِرد اِرتقا ءِ عمل ءَ چیا مَہ گَوْز انت؟ کم ءَ کم آیاں اے فیور دِیگ مہ بیت کہ آ زالبولے۔۔

ھانی اکرم ءِ آرٹ "ازت ءِ مہروک"

منی زات وَ اے آرٹ ءَ گوں تپاک نہ کنت، ھمے واستا کہ اے آرٹ تاریخ ءَ رَد کنگ ءَ انت۔۔چیا کہ "ازت ءُ مہروک" ءِ داستان چوش نہ انت، ھانی اکرم  وتی داتگیں کییپشن ءَ وت رَد کنگ ءَ انت، تو کہ کیپشنے داتگ گڑا ترا وتی کیپشن ءِ پابند بوھگی انت، اگاں یک چیزے پٹ ءُ پول ءَ رَند دیما اتکگ ءُ تو آ چیز ءِ اسل وجود ءَ وتی آرٹ ءِ پُشت ءَ مسخ کنگ ءَ اِت، گڑا شُمے ھیال ءَ آئیءِ سر ءَ گپ مہ بیت؟ اے آرٹ ھما پولکارانی پولکاری ءِ سر ءَ جُست پیداک نہ کنت؟ گڑا گپ پرچا مہ بیت؟ بلے البتہ اگاں ھانی اکرم  ءَ وتی آرٹ یک آرٹسٹک سرھالے بداتیں گڑا بوت کُتگ اَت آئی ءِ سر ءَ گپ ءِ جواز پَشت مہ کپتیں۔۔اے گپ ءَ کس رَد کت نہ کنت کہ آئیءِ آرٹ سک شوک انت۔۔بلے پدا ھم گپ وَ شریں چیزے، نگدکاری ھرابیں عملے وَ نہ انت، گپ کہ بیت چیز شوکتر بنت۔۔

باھدیں نگدگاری لس مردم ءِ زبان ءَ چارگ مہ بیت، بلے ھما تاریخی ریفرنس کہ است انت آیانی رِد ءَ گپ الّم انت۔۔۔آرٹ، سک باز اَسر کنوکیں اِزمے، آئیءَ چہ مردم سک باز سان زور انت، ھمے ھاتر ءَ ایش ءِ سر ءَ گپ ھم الم انت۔۔گپ بہ بیت!!