مئے نودربر چے ءَ کریٹیو نہ اَنت؟

 نبشتہ کار : شکراللہ ازیم

دُرستاں چہ پیش ، ما ھمے زان اَنت کہ کریٹیو چے  ءَ  گُش اَنت ؟

کریٹیو انگریزی زُبان  ءِ  لبزے کہ آئی بزانت چو اے وڑا اِنت، 

کریٹیو  ھما مردم  ءَ  را گش اَنت کہ آ را وت یک چیزے ءِ  جوڈ کنگ   ءِ  بسات  ءُ  تاکت بہ بیت   ءُ  وتئ ھیالانی سرا بہ جیڑیت  ءُ نوک نوکیں چیز جوڈ بہ کنت۔

وھدے ما وتئ نودربرانی سرا چمشانکے بدے آں گڈاں مارا گندگ  ءَ  کئیت کہ مئے نودربر چہ دگہ ڈیھ یا کہ میان استمانی نودبراں باز سُست اَنت  ءُ  آھانی نسبت  ءَ  مئے نودربرانی کریٹیوٹی باز کم اِنت۔

کریٹیوٹی چون کئیت؟

  کریٹیوٹی چہ کابلیت، وانگ، چیزانی پھمگ   ءُ  زانتکاری ءَ    کئیت  ۔

بلئے وھدے ما وتئ نودربراں پچاراں آ کریٹیو نہ اَنت۔  ءُ  اگاں ما  میان اسمتمانی ڈیھانی نودربر  ءَ  پچاراں اودا کسان کسان ایں نودربر وتی بسات  ءِ  رِدا   ءَ  شر شریں چیز جوڈ  کن اَنت ، انچوش کہ  کلکولیٹر ، گھڑی ، بلپ، موبائل  ءُ  دگہ نوک نوکیں  چیز جوڈ کن اَنت۔ بلئے مئے نودربر وتئ ھما سبجیکٹ  ءَ  ماسٹر  ءُ  ایم پل کن اَنت بلے آ چیزاں  جوڈ کُرت نہ کن اَنت کہ میاناستمانی  ڈیھانی کسان کسانیں نودربر کُت کناں،

 مے نودربر پرچہ کریٹیو نہ اَنت ؟ 

وھدے اے جُست مئے دل  ءَ  کیئت گڈاں ایشی  ءِ پّسو  ءِ  واستا مارا بازیں سبب گندگ  ءَ  کائینت ۔

دُرستاں چی مستریں سبب مئے ایجوکیشن سسٹم اِنت ۔ آ چو اے وڈا کہ مئے ایجوکیشن سسٹم انچو جوڈ کنگ بوت  ءَ  کہ نودربر یکے دومی   ءَ  گوں مکابِلہ کن اَنت کہ من چہ وتئ ھم تبک  ءَ چکاس  ءَ  گیشتر لمبر بگر آں ،  ءُ  ھر کس بگوش ایت کہ ایشی ءَ  گیشتر لمبر گپتگ  ءُ  یہ وانگ  ءَ  سک زَبر اِنت۔

بلئے اَسِل ءَ  چوش نہ اِنت ۔ کہ آ  نودربر گیشتر لمبر گیت لازُم نہ اِنت کہ آ وانگ  ءَ  شر بہ بیت ، بازیں نودربر ھست اَنت کہ وانگ ءَ  ھم شر اَنت ، چکاساں جونیں لمبر ھم گِر اَنت ، بلئے دُراھیں نودربر اے وڈ نہ اَنت۔ بازیں نودربرے چہ چیٹنگ متلب نَکِل  ءِ  وجہ ءَ  گیش لمبر گیت  ءُ  بازیں  نودربرے  چہ  سپارِش  ءِ وجہ ءَ  گیش لمبر گیت۔ اگاں مئے ایجوکیشن سسٹم اے وڈ بہ بیت کہ ھر کس پہ لمبر  ءَ  بہ وان ایت گڈاں مئے نودربر ھچ وڈا کریٹیو جوڈ بوت نہ کن اَنت ۔ اے نودربرانی میار نہ اِنت کہ آ پہ لمبر  ءَ  وان اَنت ، میار مئے چاگِرد  ،مئے رھشون  ءُ  مئے ایجوکیشن سسٹم  ءِ گشگ بنت۔۔

 نودربر وھدے گند ایت کہ  مئے ایجکیشن سسٹم  وانگ ءُ سِکک  ءَ  چہ گیش لمبر  ءَ  ارزِشت دنت گڈاں آ  زاھر ءَ  وانگ ءُ سِکک چہ گیش    لمبر  ءِ  نیمگ ءَ توجہ  دنت ۔

نودربر وھدے  اے گند ایت کہ مئے چاگِر ءِ  تھا ھما نودربر ازرِشت دیگ بنت کہ آ چکاساں اولی  ءُ دومی پوزشن  ءَ  گِر اَنت   مردم آھاں اپریشیٹ کن ، اَنت گڈاں نودربر ھمے چیز  ءَ  چاریت  ءُ  لمبر  ءِ  نیمگ  ءَ  گیش توجہ دنت ۔ اے اِدا مئے چاگِرد ءِ  مردمانی میار اِنت ۔  وھدے نودربر اے گندیت کہ کِلاس   ءِ  تھا  رھشون ھما  نودربراں گیش چار اَنت کہ آھاں گیش لمبر گپتک نہ کہ اے چار اَنت کہ کُجام  نودربر  چیزاں چنچو سِکک ءُ پھمگ  ءَ  اِنت ۔  

دومی مئے کورس انچو نبیسگ بوتگ اَنت کہ ، اگاں دو سے سال   ءَ  ساری کورس  ءِ  تھا چیزے بوتگ گڈاں آ نوک کنگ نہ بوتگ ھمے ھاتر  ءَ  مئے نودربرانی سونچ ھم ھمے وڈا نوک نہ بیت  ءُ آ کوھنیں سونچ ءِ مالک بنت ھمے واستا آ کریٹیو جوڈ بوت نہ کن اَنت ۔ بائدیں کہ مئے کورس ھر سال  ءِ  سرا چمشانک دیگ بہ بنت   ءُ  اپ ڈیٹ کنگ بہ بنت۔  

سیمی وجہ ایش اِنت کہ مئے کورس مئے مادَری زُبان  ءَ  نہ اَنت ۔ یہ دُرستاں چہ سنگینے جیڑہ یے ۔ ما اگاں مرچی بودناکیں ڈیھاں بچاراں گڈاں مارا اے گندگ  ءَ  کئیت کہ آھاں کورس وتئ مادَری زُبان ءَ رُجانک کُتگ ، ایشی پائدگ ایش اِنت کہ کسانی  ءَ  زھگاں ناں دگہ زُبان   ءِ  سِکگ  ءِ  زَلورت نہ بیت  ءُ  آ چہ کسانی  ءَ  وتی  کورس  ءَ گوں شریں وڑے  ءَ  وان اَنت   ءُ  چیزاں شریں وڈے  ءَ  پھم اَنت۔ اے دُراہ مئے ایجوکیشنل آفیسرزانی زمہ واری اِنت کہ اے جئڑہاں گیش ءُ گیوار بکن اَنت ۔

اگاں مرچی بلوچستان  ءِ  دمگاں دُرستیں کورس بلوچی  ءَ  وانینگ بہ بنت بازیں نودربرے ایشاں گہتر پھم اِت کنت۔ ایشی  ءَ  چہ نودربر سمارٹ  ءُ  کریٹیو جوڈ ببت۔ 

اگاں ما وتئ اے کمی اں پورا بکن اَنت  ءُ وتئ 

ایجوکشن سسٹم  ءَ  ھمے وڈا جوڈ بکن اَنت کہ اے چیز دور بہ بنت  ءُ  نودربرانی ذھن ھمے بہ بیت کہ مارا چیز پھمگ  ءُ سککی اَنت نہ کہ بس لمبر گِرگی اِنت ، نہ کہ چاگِرد  ءِ   چماں  شر زانگ بہ بنت یاکہ رھشون من  ءَ  گیش ارزشت بدے اَنت ، گڈاں مئے نودربر کریٹیو جوڈ بنت  ءُ  مئے کوم بودناکی کنت۔