نبشتہ کار اکرم راز
جارج آرویل یک انگریز ھوالکار ، رِدانکار ءُ گِدار نویسے بوتگ ۔ آ نوزدہ سد ءُ سئے ءَ ( 1903) بَنگال ءِ شھر موتی ہاری ءَ ودی بوتگ ۔ وتی پیداک بوھگ ءَ چہ پَد آئی ءِ ھاندان انگلستان ءَ شُتگ ءُ نشتگ۔
اے گِدار، آیوکیں زمانگ ءِ آشوبانی پیشگُوئی ءِ سماہ بیت۔ باز کَس اے گِدار ءَ سویت یونین ءِ سوشلسٹ اِنکلاب ءِ آیوکیں وھد ءِ پریڈکشن سَر پد بیت ۔
اے گِدار مارا ھمے پیشداریت کہ جَزباتی ایں آشوب اِنفرادیت ءَ را ولگْوج کنت ۔
من ءَ اے گِدار ءِ وانگ ءِ وھد ءَ ژاں پال سَارتر ءِ ایگسسٹنشلزم ءُ آئی ءِ مارکسی لیکہ پہ جُوانی ءَ سماہ کپتگ ۔ سارتر مارکسی لیکہ ءَ فَردی (Individialism) بُنیاد ءَ چارگ ءُ تَپّاسگ ءِ جُھد ءَ کَنت ۔ سارتر ءِ گُوْرا فَردی آجوھی مزنیں بِستارے داریت پرچہ کہ ھَر بنیادم ءِ وتی جِتاھیں بُنکی لُوٹ ءُ واھِشت بَنت بلے سارتر ءِ زمانگ ءِ مارکسی لیکہ فردی لُوٹاں چہ گیش اجتماعی دیمروی ءِ سَرا جُھد کَنت ۔ سارتر بنی آدم ءِ بازیں لُوٹاں ابرمی سَرپد بیت بلے آ زمانگ ءِ مارکسٹ دُراھیں جیڑہ آں گُوں معیشت ءَ بَندوک کن اَنت۔
سارتر ءِ گُوْرا فردی آجوئی ءُ آئی ءِ ذاتی واھِشت ءُ لُوٹاں مزنیں ارزشتے بوتگ بلے دُومی نیمگ ءَ آ زمانگ ءِ مارکسٹ آں فردی آجوئی ءَ را پہ اجتماعی سیت ءُ نَپ ءَ تاوانے پہم اِتگ ۔ اے گدار ءِ تہا آشوب کارانی اُوگام ”آجوئی گُلامی یے “ پہ دَرور جُوانی ءَ ھمے شون ءَ دَنت کہ پارٹی ءِ تہا زاتی آجوئی ءُ واھِشت ھِچ مھنا نہ دارنت بلے دومی نیمگ ءَ چیروکائی ھَرکس وتی لُوٹانی پیلو کنگ ءِ رَند ءَ اِنت ۔۔
اے گِدار ءِ سِٹ اَپ آشوب کاریں مُلک اُوشیانا ءِ تہا اِنت ءُ دومی نیمگ ءَ اُوشیانا ایسٹ ایشیا ءِ ھِلاپ ءَ جَنگ ءَ اِنت ۔ اوشیانا ءِ مَردُماں ھمود ءِ آشوب کاریں گَل ھَر وھدا باور کنائین اَنت کہ اِنکلاب ءَ چہ پیسر مَردُومانی زِند بے کِساس ھزاب بوتگ بلے آشوب ءَ چہ پَد مَروچی آ چنچو ایمن اَنت ۔۔ گِدار ءِ کارست” ونسٹن“ آشوب کاریں گَل ءِ تہا کار ءَ اِنت ۔ یک روچے ونسٹن کار ءَ چہ پَد واتری ءَ وتی کُوٹی ءِ نیمگ ءَ روان بیت تاں آ ھرنیمگ ءَ دیوالانی سَر ءَ چِل سالی مَردے ءِ اَکس ءَ گِندان بیت ءُ پدا آئی ءِ کَش ءَ نبشتگ ”مزنیں برات ترا گِندگ ءَ اِنت “ (Big brother is watching you)۔
اے اکس ءُ نبشتگیں گال ونسٹن ءِ مجگ ءِ تہا ایر روان بَنت نی آئی ءَ ھنچوش سما بیت آ ھرنیمگ ءَ رؤت اکس ھم ھمائی ءَ چاران اَنت ۔ وھدے ونسٹن وتی کُوٹی ءِ تہا سر بیت تاں کُوٹی ءِ تہ ئے ٹیلی اِسکرین ءَ سما کَنت کہ آئی ءِ تہا ھمروچیگیں جاورھال شِنگ بَنت ءُ پَد ءَ ھمے ٹیلی اسکرین وتی دیم ءِ نِندوکیں مَردوم ءِ تامُراں اُوں گِپت ءُ بارت آشوب کاریں گَلاں سَر کَنت ۔
بِگند ئے اے دُرائیں اکس ءُ ٹیلی اسکرین ونسٹن ءِ واستہ نوک نہ اِتاں بلے مَروچی آ گُش ئے گیش ونسٹن ءَ جیڈگ پَرماھِگ ءَ اِتاں ۔ بازیں سُر ءُ پِراں رَند ونسٹن چیزے نبشتہ کنگ ءِجُھد ءَ کَنت ۔ آ وتی رودپتر ءِ بِنداتی تاک ءِ سَرا چار اَپریل نوزدہ سد ءُ اشتاد ءُ چار ”1984“ نبشتہ کَنت ءُ پَد ءَ نویساں بیت ۔۔
ونسٹن وتی رودپتر ءِ تہا ھمے نبشتہ کنت کہ من مرچی سنیما ءَ شُتگاں تامُر ءِ چارگ ءَ بلے دُرستیں تامُرانی تہا جَنگ ءُ کُشگ ءَ چہ اَبید دِگہ ھِچ من نہ دیستگ ءُ پَدا سنیما ءِ تہے نِِندوکیں مَردوم ھم ھمیشاں پہ جُوانی ءَ دُوست دارگ ءَ بوتگاں ۔ ھمے ساھتاں تہنا یک زالبولے ءَ گوشْتگ زَھگاں اے وڈیں تامُر پیش مداریت ھمے دمان ءَ پولیس ءَ آ چہ سنیما ءَ چہ دَر کُتگ ۔ گُونڈیں ساھتے ءَ ونسٹن وتی کلم ءَ ایر کَنت پَدا وتی رودپتر ءَ نبشتہ کنت ”مزنیں برات مُردہ باد “
ھمے دمان ءَ کسے وسٹن ءِ کُوٹی ءَ ٹُکّیت آ بازیں چار ءُ بِچار ءَ رَند دَروازگ ءِ نیمگ ءَ رؤت بلے پَد ءَ وتی ڈائری ءِ نیمگ ءَ چاریت داں آئی ءِ نبشتگیں گال ساپ زائر اَنت ھَرکس آیاں دیست کَنت بلے سیاھیانی ھُشک نہ بوھگ ءِ سُوب ءَ ڈائری ءَ بَند نہ کَنت وتی دِل ءِ سَر ءَ سِنگے ایر کَنت ءُ دروازگ ءَ پَچ کَنت داں گِندیت آئی ءِ سَنگت ”پارسنز “ اِنت ۔ ھمےدمان ءَ پارسنز ونسٹن ءَ زوریت وتی لُوگ ءَ بارت ۔ پارسنز ءِ لُوگ ءِ سَربوھگ ءَ آئی ءِ زھگ وتی نَقلی پِستولاں ونسٹن ءِ نیمگ ءَ ٹال کَن انت ءُ گوْش اَنت ۔ ”تؤ غدّارے ئے“ ءُ پَد ءَ ھمے زاگ ونسٹن ءَ گُلیل ءِ سَر ءَ سِنگے جَن اَنت ۔ نی ونسٹن ءَ سما بیت کہ جزباتیت پہ بنی اَدم ءَ چنچو تاوان اِنت ھمے ساھتاں آئی ءِ گَل ءِ اُوگام گیر کئیت ”نا بِزانتی طاقتے “
اے گِدار ءِ کارست ونسٹن وتی واھگ ءِ پَد ءَ ھِچ کار کُت نہ کَنت ءُ اگاں کنگ بلوٹیت ھم آئی ءَ ٹیلی اسکرین ءُ تنظیمی سَنگت بہ گِند اَنت تاں الم ءَ پاھُو ءَ بَر انت ۔ ۔ ھمے تنظیمی کارانی نیام ءَ ونسٹن ءَ گُوں ”جولیا“ نامیں جنکے ءَ گُوں اِشک بیت بلے گَّل ءِ پابندی ءِ سُوب ءَ گُوں یک دومی ءَ دُچار کپگ ءِ ھاتر ءَ برے یک نیمگے وکشی بَنت ۔ھمے بَندِشانی سوب ءَ ونسٹن ءُ آئی ءِ دُوستدار جولیا گُوں دِگہ لھتیں سَنگتانی ھواری ءَ ھمے شور ءُ سلاہ ءَ کَن انت کہ گَل ءِ ھِلاپ بئیں ءُ آئی ءَ پروش دئیں ۔
اے گِدار ءِ تہا آشوب کاریں گَل وتی ھَستیں وھد ءَ گُوں پارسائی ءَ پیش دار اَنت ءُ گُوست ءَ (اِنکلاب ءَ چہ پیش) سَک ایر جَن اَنت بلے راستی چوش نہ بیت ونسٹن بازیں کماش ءُ پیر مَرداں گُوں نِندیت تاں آ ھمے گُوْش اَنت کہ گوست چوش نہ بوتگ کہ چوش پیشدارگ بوھگ ءَ اِنت ۔گُوست ءِ بابت ءَ ھَرچ وڈیں سرپدی یے کِتابانی تہا درکئیت تاں زُوت ءَ مَٹ کنگ بَنت ءُ نوکیں رنگے ءَ دیم ءَ آرگ بَنت ۔ اگاں کسے ھم ایشانی ھِلاپ ءَ توار چِست کنگ ءِ جُھد ءَ بکنت تاں الم بیگُواہ بیت ۔
ونسٹن آشوب کاریں گَلانی ھِلاپ ءَ وتی جُھد ءَ بَرجاہ کنت بلے یکروچے اناگہی گُوں جولیا ءَ ھوار دزگیر کنگ بَنت ۔ ونسٹن آزار جاہانی تہا بَندیگ کنگ بیت ۔زِندان ءَ ونسٹن بے کساس اذیت ءُ آزارانی تہا آ مُدام ودار ءَ بیت کدی من ءَ گُوں پِستول ءَ بِرسٹ بکن اَنت ۔ یکروچ ءِ زِندان ءِ آزار دیوکے ونسٹن ءِ گُوْر ءَ کئیت گُشیت ” تَرا یاتیں تو گُوشتگ آزاتی ءِ بِزانت دُو جمع دو = چار اِنت (2+2=4) بلے تَنظیم ءِ تہا چوش نہ اِنت اگاں تنظیم گُوشیت دُو جمع دو پَنچ اِنت ترا منّگی اِنت ۔ ونسٹن وھد وھد ءِ سَر ءَ آزار دیگ بیت آئی ءَ را پہ زور منّینگ بیت کہ دو جمع دو چار نہ بَنت بلکیں پَنچ بَنت ۔
گُڈ سَرا آزار جاہ ءِ تہا ونسٹن چہ پیشیگ ءَ کمے آسودگ تِر بیت ۔آئی ءَ وھد وھد ءِ سَر ءَ ورگ دیگ بیت ءُ ونسٹن ءِ پِگر ءُ مارشت ھم بدل بیان بَنت نی آ ھمے جیڈیت کہ پارٹی ءِ ھِلاپ ءَ ھِچ وڈیں گَپ کنگی نہ اِ نت ۔ اِجتماعی پِگر کَدی ھم رَد بیت نہ کَنت ۔ یکروچے آ وتی دیم ءِ ایریں پِنسل ءَ زوریت ءُ پارٹی ءِ اُوگام ءَ نبشتہ کَنت ”آزادی گُلامی یے ءُ دو دو پَنچ بَنت “ بلے ایشی ءَ چہ پیش آ کدی ھم اے مَنّگ ءَ تیار نہ بوتگ ۔
گُڈسَر ءَ ونسٹن کوٹی نمبر 101 ءَ برگ بیت بلے آؤد ءَ تیر ءَ ونسٹن ءِ جِند ءَ نہ جَن اَنت بَلکیں آئی ءِ پِگراں جَن اَنت پمشکہ آ پارٹی ءِ ھَرچ وڈیں گپّانی منّگ ءَ تیار بیت ۔۔۔۔۔۔۔۔
No comments:
Post a Comment