لیکہ یا راستی گُٹ گیر چون بیت؟

لیکہ یا راستی گُٹ گیر چون بیت؟

جاوید بلوچ

باز برءَ شما دیستگ کہ یک ہند ءُ دمگےءَ مہلوک ءُ مزنیں کساسےءَ مردم یک جیڑہ یا بُن گپےءِ سرءَ جیڑگءَ انت کہ اناگتہ دگہ جیڑہے سر کشیت ءُ لس مہلوک زانت ھم کہ چُش نہ انت کہ چُش کنگ بوئگءَ اِنت بلے پدا ھم ھمے وڑ کنت بزاں آ جیڑہ ءُ توارءِ نرم نرمءَ ھاموش کنگءَ ھمے لس مردم وتءَ لاچار کنت ءُ ھما دومی توار ءِ بھر جوڑ بیت۔ دومی توارءَ وتی توار سرپد بیت ءُ پدا ھمے سمجھ ایت کہ من رداں ءُ آ پیسری توار وت ھاموش بوتگ۔ زان ئے چوش وت نہ بیت بلکیں کنائینگ بیت؟ ءُ اے رسانکءِ تہا مردمانی پگر ءُ لیکہءِ سرءَ باج برگءِ یک مزنیں منسوبہے۔ ءُ ھمے کار رسانکءِ تہا یک مزنیں لیکہے۔

اھوالکاری یا رسانکدرءِ وانگءِ وھدءَ لہتیں تیھوری ھم وانینگ بیت کہ آہانی مول ءُ مراد ھمیش بیت کہ میڈیا یا رسانک چون کار کنت؟ مہلوک چون جیڑ ایت؟ یا اے کہ چے بجیڑ ایت؟ بزاں مہلوکءِ پگر ءُ ھیالءِ سرءَ باج برگءَ بگر داں انچیں چاگردے پیداگ کنگ کہ مہلوک ھمائیءَ وتی سرجمیں راستی بزانت۔۔۔۔ یا راستءَ دروگ سرپد بہ بیت یا راست ءُ دروگءِ پجارءَ زانگءَ ابید ھم کم کمءَ وتی زانتگیں راست یا وتی ھیالءُ لیکہءَ وت نِزور بکنت ءُ گڈ سرءَ ھمے رمءَ یا رُمبءَ گوں ھوار بہ بیت کہ ہرچی گُشگ بوئگءَ انت گڑا الم راستی ھما بیت۔۔۔۔۔

میڈیا ءَ چُشیں بازیں تیھوری ھست انت چوش کہ میجک بُلٹ تیھوری(بزاں کہ رسانک چو ننوکیں زھگاں پگر ءُ لیکہءَ وتی چاروک، وانوک ءُ گوشداروکانی گمانءَ بارت ءُ مان کنت یا چو سوچن بزاں انجکشنءِ وڑءَ وتی لیکہءَ لس مہلوکءِ پگر ءُ ھئیالءِ تہا مان کنت) ءُ آئیءَ پد two step flow تیھوری بزاں دو نمیگی ایں لیکہ کہ اشی ءِ ردءَ ایوک رسانک مہلوکءِ سرءَ اسر نہ کنت بلکیں چاگردے تہا ھما کارست کہ ھمے گپانی گوشدارگ ءُ کنگءَ پد ھم بار بار ھمے بُن گپ ءُ سرھالاں دیمءَ بیار انت تاکہ لس مہلوک ھم ھمے وڑ بجیڑ ایت کہ اے ھمے چیزءَ پدر کن انت مردمانی لیکہءِ سرءَ میڈیا چون اسر کنت یا مردم میڈیاءِ شنگ کاریانی پدءَ وتی لیکہءَ چون مٹ ءُ بدل کن انت۔۔۔۔

ھمے وڑءَ رسانکءِ بازیں لیکہانی توکءَ یکے اسپائرل ھاموشیءِ لیکہ انت بزاں یک انچیں چاگردےءِ ودی بوئگ یا ودی کنگ کہ اودءَ تؤ بنداتءَ بزان ئے کہ راستی چے انت؟ یا یک برمشےءِ اِشکُنگءَ گوں تو بزان ئے کہ چے بوئگءَ اِنت۔۔۔۔ بلے سک باز کُکار ءُ جاک بہ بیت یا ہر نیمگءَ تؤ ھمے یکیں چیزءَ بگندئے کہ تئی لیکہءَ راست نہ انت یا کم چہ کم چُش نہ انت کہ چُش پیشدارگ بوئگءَ انت یا اے دروگ بند کہ گُشگءَ انت ھچ وڑءَ راست بوت نہ کنت یا اے دُز، ڈُنگ ھچ وڑ راستیءِ جنگءَ گون بوت نہ کنت۔۔۔۔۔۔ اے درستاں تؤ زان ئے سرپد ئے ھم بلے رسانک یک انچیں چاگردے ودی کنت کہ تؤ لاچار بہ بئے ءُ وتی لیکہءَ مَٹ بکن ئے ءُ ایوک بوئگءِ ترسءِ آماچ بہ بئے ءُ گُڈ سر ھمے رُمبءَ یا رمءَ ھوار بہ بئے کہ رسانک آئیءَ ترا بار بار پیش دارگ لوٹیت۔۔۔۔۔

اے یک انچیں اسپرنگےءِ درور انت کہ آ بُنءَ تنک ءُ امینچو کہ بُستر روان کنت پراہ تِر بوہان کنت، بزاں تئی راستیں ءُ زانتگیں لیکہ چیر بہ تر ایت ءُ تو ھم ھما جیڑگءَ پہ زور ھوار بہ بئے کہ پر ھمائیءَ چاگرد سازگ بوتگ۔۔۔۔ تؤ ھم وتءَ یک کِرّ کنگءِ بدلءَ وتءَ ھوار بکن ئے تاکہ ایوک بوئگءِ بیم چہ بہ رَک ئے۔۔۔۔۔

اے پراہ روانیں ھاموشی لیکہ میڈیاءِ یک مزنیں سلاے اے وھدءَ یا اے دَہرءَ کہ اشییءَ پنچمی پدریچی جنگ ءِ دہر گشگ بیت ادا ہر ھما مردم چاگردی رسانکءِ یک سلابندیں سپاہیے ھما کہ چاگردی رسانکءَ کارمرز کنت، یا وَ آ وت پہ جنگی مولمانی واستہ جوڑ کنگءُ دارگ بوتگ یا آئیءَ ھمے ھاموشیءِ لیکہ وت دیمءَ کار ایت اگاں آ یک جُتائیں لیکہے داریت ءُ راست انت بلے آئیءَ گُشت نہ کنت کہ ایوک انت یا کساسءَ کم انت گڑا آ وتءَ کم کم ملامت کنت ءُ ھمے جیڑگءَ بندات کنت کہ گیشتر مہلوک وَ چُش گشگءَ انت ءُ چُش کنگءَ انت۔۔۔۔ گڑا الم انچش بیت بزاں آ زانت کہ ادا برمش کنگیگ انت کُکار انا۔۔۔ بلے رسانکءِ چاگرد یا ھما گیشتریں لیکہ ءُ داب کہ کَش ءُ کرّا جاک کنگءَ انت اے گوں ھمایاں ھور بیت ءُ جاک کنت تاں ایوکیءِ تُرسءِ آماچ مہ بیت۔۔۔۔۔ ءُ وتی جیڑ اتگیں لیکہءَ گُٹ گیر بکنت ھما وڑ بہ جیڑ ایت کہ آ وڑ آ دگہ گیشترین جیڑگءَ اَنت۔