گوادرءِ کُہنیں ترانگءُ یات

گوادرءِ کُہنیں ترانگءُ یات

رفیق چاکر

                                         

اکس: شاہد مجید گوادر

                    

1999ءِ سال اَتءُ اے وھداں کساس منی عمر ھژدہ سال بوتگ اَتءُ من چہ ڈگری کالجءَ دوازدہ ءِ چکاس پاس کُرتگ اَت.اے وھداں چہ سالےءَ پیسر شہید زاھد آسکانی کہ سیادیءَ منی ناکو زتک اِنت آ چہ پرومءَ دیم پہ گوادرءَ شُتگ اَتءُ ماں گنجیں گوادرءَ آئیءَ "امریکن انگلش لینگوئج سینٹر "ءِ نامءَ انگریزی زُبانءِ یک وانگجاہ ئے پچ کُرتگ اَتءُ کساس سالے بوتگ اَت کہ آئی وانینگ بِندات کُرتگ اَتءُ سالےءَ چہ پد آئی وانوکیں چُکانی کساس گیش بوتگ اَتءُ چہ چُکانی گیشیءَ آئیءَ پہ من کُلوہ راہ داتگ اَت کہ من ھم آئی ہمراہیءَ چُکاں بہ وانیناں.

من چہ باگیں پنجگورءَ وتی بُکچہ بستءُ دیم پہ گوادرءَ پنجگورءِ پیک اپ گاڈیءَ سوار بوتءُ روان بوتاں. اے ھما وھدءُ زمانگ اَت کہ پنجگور تاں کیچءَ سڑک نیست اَتءُ سہبءَ دراتکگیں گاڈی سرشپءَ کیچءَ سر بوتگ اَتءُ چہ دنزءُ دوتاں بیکار ژندءُ پندءُ ھاکءُ پُلکانی تہا کپانءُ گاڈی کیچءَ سر بوتگ اَت.چہ گوارگو، سیدانءُ پدا گورانءُ بالگترءَ چہ پد ہوشابءُ سامیءُ گُڈیءَ کیساکءَ کہ کیچ گِندگ بوت گُڈا مردمانی چم رُوژنا بوتگ اِت اَنت کہ ماوتی منزلءَ سر بوتگاں. سرشپءَ وہدے گاڈی کیچءَ سر بوت گُڈا شہید فدا چوکءَ چہ کمے دیم ھمے راہءِ سرا یک ہوٹلے ھست کہ من وتی بارءُ بُنگ ھمودا ائیر کُرت اَنتءُ وتی باڈہ والا کوٹیءَ پہ شپءِ گوازینگءَ پہ گیگ بوتاں.

 شپ پہ ایمنی گوستءُ سُہبءَ مہلہ شہید زاھدءِ گُشگءِ پدا من جاوید کوچءَ ٹکٹ گِپتءُ سوار بوتاںءُ بس وتی وھدءُ پاساں دیم پہ گوادرءَ رہادگ بوت.چہ کیچءَ تاں گوادرءَ بس بیگاہءِ پنچ بجءَ مُدام سر بوتگ اَت.اے منی دومی رند اَت گوادرءَ بلے من انگت شریءِ سرا گوادرءِ راہءُ رندانی بابتءَ سرپدی نہ داشتءُ ھما رنگءَ کہ منءَ گُشگ بوتگ اَت من بیگاہءِ پنچ بجءَ گوادرءَ سر بوتاںءُ وی آئی پی گفٹ سنٹرءِ شوھازءَ وتی چم گوادرءِ تیوگیں دُکانانی سرا تاچیناں کُرت اَنت کہ ھمے دُوکانءِ منءَ گُشگ بوتگ اَت کہ آمنءَ شہید زاھدءِ لوگءَ سر کناں.آ وھداں ھژدہ سالءِ مردم کسان گُشگ بوتگ اَنتءُ پدا منی جند و گیشتر کہ نابودے بوتگءُ بازیں چلا بلا نہ زانتگءُ چو اسپیت پسءَ بس ھر کُجا مہار کنگ لوٹ اِتگ. پہ بلاہیں تگءُ تاچءُ شوھازگےءَ من وی آئی پی گفٹ سینٹر شوھاز کُرتءُ گوں وتی سیاہ رنگیں نیم چلونگیں دستی بیگءَ ھمے دوکانءِ تہا پُترتاں ءُ گوں دوکانءِ واھُندءَ وتی پجار کُرت ءُ واجہءَ منءَ نزیکءَ جتگیں کُرشیءِ سرا نِندارینتءُ چاہءُ چلیمءُ آپءُ تامءَ چہ پد آئیءَ یک کسانیں چُکے پہ مردمےءَ روان دات کہ برو سرفرازءَ بُگش بیا سرءِ مہمان اتکگءُ برگءُ سر کنگ لوٹیت. 

اے واجکارءَ کہ منءَ دست گِپتگ اَت اسماعیل اَت کہ سنٹرءِ یک جوانیں نودربرے اَت ءُ سرفراز کہ اتکگ اَت من اولی رنداں گوں آئیءَ دُچار کپتگ اِتاں ءُ اے ورنا بلوچی زُبانءِ اِزمکاریءِ مزنیں نامءُ بلوچی تامُرانی بادشاہ سرفراز محمد اَت.سرفراز منی بیگ زُرتءُ ما پدءُ دُمب تاں شہیدءِ لوگءَ سربوتاں کہ آ وتی کلاسءَ وانینگءَ اَت.تاں آئیءِ کلاسءِ ھلاسیءَ منءُ سرفراز نِشتگءُ گپءُ ھبر کُرتگ اَت.کلاسءِ ھلاسیءَ گوں شہید زاھدءُ من دستءُ دُروت بوتگ اِتاںءُ مئے گِندءُ نندءُ گپءُ دیوان پہ مُدامی برجاہ بوت.ھمک سہبءَ مہلہ پاد آیگءُ پہ چُکانی وانینگءَ جاڈیگ بوتگ اَت. شہید زاھد چہ منءَ پیسرآغاخان سکولءَ وانینگءَ اَتءُ آ وھداں دی اوئیس سکول پچ نہ بوتگ اَت.منی آیگءَ گوں دومی روچءَ من ھم آئی ہمراہیءَ آغا خان سکولءَ ھم شُتاںءُ گوں سکولءِ پرنسپل واجہ منصور صاحبءَ دُچار کپتاں کہ آ یک سیاہ تابیں نیم عمرے  مردمے اَت کہ باز وشدلءُ وش کندگے اَت.چاہءُ تامءَ چہ رند آئی گوں دگہ مولابخش نامے یک اُستادےءَ منءَ باز جُستءُ پد کُرتءُ منءَ پہ وانینگءَ داشتءُ منی پگار 2100کلدار ائیر کنگ بوت. منءَ دومی کلاس کہ دیگ بوت آ چہ سکولءَ کمے گستا اَت.

من اولی کلاس مُدام ھمدا گِپتگ اَتءُ چُک وانینتگ اِتاں.اے کلاسءَ چہ ابید منءَ مزنیں کلاسانی ڈرائینگ دیگ بوتگ اَت کہ من پینٹنگءُ ڈرائنگءَ بلد اِتاںءُ منی جُستءُ پدءِ وھداں وھدیکہ من گُشتگ اَت کہ من ڈرائنگءَ بلد آں گُڈا واجہ پرنسپل منصورءِ چم رُوژنا بوتگ اِتاں کہ منءَ ڈرائنگ ٹیچر نیستءُ چہ دومی کلاسءِ وانینگءَ چہ ابیدمزنیں کلاسانی ڈرائنگءَھم چُکانءَ سرپدی بہ دیاں.بیگاہءَ منءَ دو کلاس دیگ بوت کہ آیانی تہا یک کلاسےءِ چُک کمے کسانءُ دومیءِکُل یازدہ نودربر اِتاں کہ گیشتر چہ منءَ مستر اِتاں ءُ گیشتر وت سرکاری اُستاد یا دگہ فیلڈاں چہ آیانی سیادی اَت.منءَ وتی بیستءُ دو سالءِ تہا وانینتگیں گیشتر نودربر انگت یات اَنتءُ بازءِ نامءَ زاناںءُ بازیں اگاں انگت دیم پہ دیمءَ بہ گِنداں من شریءِ سرا آیاں پجاہ کاراں. کسانیں کلاسءِ تہا حفیظ،حبیب، خلیل، سرفرازمحمد، جمیل فیض،جہانزیب،عارف،دگہ یک مزنیں واجکارےاَت کہ ھنوں بنکءَ امین جمعہ، جاوید،شہید احمد دادءُ دگہ بازیں ہوار اِتاں کہ ھمے کلاس ءِ نودربرانی کساس وَدّان بوتءُ تاں چلءَ سر بوت.

مستریں کلاسءِ سروکیءَ مولانا قاسم کہ جماعت اسلامیءَ چہ سیادی داریتءُ دارالعلوم ءِ پرنسپل اِنت کنگءَ اَت کہ اے کلاسءِ تہا واجہ ہاشم سرور، ماسٹر انور،رفیق فیض، محمد حنیف پورٹ والاءُ دگہ لہتیں ھوار اَت.

سکولءِ دومی کلاس کہ منءَ دیگ بوتگ اَت آ چُکانی تہا لہتیں گونڈل انگت یات اَنت کہ آیانی تہا ڈاکٹر انیسہ عزیز، ثناء،انیتہ جلیل، یاسرءُ دگہ باز است اَت کہ نوں من شموشتگ اَنت.

( روان اِنت )