ھارپ ءِ سرقہ
یلان بلوچ زامرانی
(سرقہ ءُ بلوچ سرقہ) السرقۃ: عربی زبان ءِ لبزے کہ ایشی بزانت دزی انت، چوناھادزی ایوک ءَ زرءُ مالءُ دلت ءِ نہ بیت بلکیں چہ دزاں ھچ چیز پش نہ کپتگ. چہ ھندوستان ءَ تاکے ھم چاپ بیت کہ ھمے نام ءَ انت ءُ آئی ءِ تھا ھماساچشتکار ءُ نبشتہ کارانی نام انت ءُ کارپدانت کہ دگرانی ساچشتاں وتی نام ءَ کن انت،البت ءَ آھانی تھا گیشتریں نبشتہ کاراں سرجمیں نبشتانک دزی نہ کتگ بلکیں آھاں کموکمو دزی کتگ ءُ اے وئیلءَ چہ ھچ زبان پش نہ کپتگ ءُ بوگءَ انت بلے آدگہ زباناں ایشیءِ سرا نبشتہ کنگ بوتگ ءُ اے پیمیں نبشتہ کار ءُ آھانی دزاتگیں ساچشت ءُ اصل ساچشتکارانی نام دیمءَ آرگ بوتگ.
بدبھتیءَ اے چیزاں چہ بلوچی زبان ھم نہ بچّ اتگ ءُ اے ردا مزن مزنیں نام ھست کہ دگرانی ساچشتاں وتی نام ءَ کن انت ءُ چہ وانوک ءُ گوشداروکاں دادءُ واہ واہ لوٹ انت بلے اے پیمیناں دراجیں عمر نہ بیت ماں بلوچی زبان ءَ ءُ اے مردم کہ اے کارءَ کن انت روچے ناروچے الم ءَ پاشک بنت ءُ بلوچیءَ اے بابتءَ دلگوش گورکنگ نبوگ ءِ برابرانت ءُ اے کار سک باز ودّان انت کہ پہ بلوچی بانداتءَ جوانیں شبین یے نہ انت .....
نوں بیا ات پہ ھارپَ Haaarpءَ . ھـــارپ (یک پٹءُ پولی نبشتانکے کہ سئے ماھی رژن کیچ) ءِ نوکترین تاک ءَ چاپ بوتگ ... اے نبشتانک ءِ اسل پولکارءُ نبشتہ کار واجہیں برات ءُ بلوچی ءِ ورنا ءُ نامداریں نبشتہ کار شاہ ابن شین انت. بلے سئے ماھی رژن کیچ ءَ اے نبشتانک سماعیل ساگر نام ءَ چاپ بوتگ.
اے نبشتانک کسہ اے پیم انت.... اے نبشتانک واجہ سماعیل ساگرءَ مناگوادر ءَ گوں وتی مبارکیں دستاں دات کہ لھتے تاکانی سرا نبشتہ کتگ ات ئے(منا اگاں یات بہ بیت من ءُ یاسر آسکانی اتیں). مئے تاکءَ اے وھد ءَ ھم باز گوستگ ات کہ چاپ نبوتگ ات.
ورنائیں سماعیل ساگر ءِ اوپارءِ قدح ھم تقریباً سر ریچ بوتگ ات پمشکا. (نبشتانکءَ پد یکءُ دوبر منا واجہ سماعیل ساگر ءَ حالءُ احوال ھم کتگ کہ شمئے تاک کدی کیت؟
منی نبشتانک ھوارانت یا انا!من گوشتگ اوپارکن تاک سربیت تئی نبشتانک ھم ھوار بیت) شاہ ابن شین ءِ اے نبشتانک چد ءُ پیسر دگہ تاکے ءَ ھم چاپ بوتگ بلے منی دیم ءَ نہ گوستگ دگہ ما الم اے پیمیں ردی ءُ کار نہ کنیں ءُ اے عمل ءَ ایرجنیں کہ بائدانت نبشتہ کار ءُ شاعر دگرانی ساچشتاں وتی نام ءَ مکن انت ءُ پہ تاک ءُ ماھتاک ءُ تاکبنداں روان مکن انت کہ اے یک جوانیں عملے نہ انت.
ءُ سئے ماھی رژن کیچ ءِ شونکار بستار ءَ من چہ واجہ شاہ ابن شین باااز پہلی لوٹاں کہ مارا سرپدی نبوتگ ءُ اے ردا ادارہءَ چہ گیشتریں زمہ وار واجہ سماعیل ساگرانت کہ دگرانی نبشتانکاں وتی نام ءَ کنت(اشکنگءَ واجہءَ دگہ دو نبشتہ کارانی ساچشتاں گوں ھنچوش کتگ)ءُ اے ردا دگہ بازیں نام ھم ھست کہ دگرانی ساچشتاں وتی نام ءَ کن انت. (مئے واھگ بوتگ کہ اگاں بلوچی زبان ءَ یک نوک باھندے درکیتءُ وانیتءُ نبشتہ کنت آئیءِ ساچشت ھوار گیجگ بہ بنتءُ جاگھ دیگ بہ بنت بلے نوک باھند بائدانت کہ وت جھدبکن انت پہ دگرئے نبشتانکءُ کتگیں کاراں کس نام نہ کٹ ایتءُ باج ھم نہ بارت) ءُ ان شاءاللہ آؤکیں سئے ماھی رژن کیچ تاک ءَ ایشی ءِ وضاحت ءَ کنیں کہ نبشتانک ءِ اسل واھند کئے بوتگ.. امیت انت کہ شونکارءَ تو پہل کن ئے......منت وار تئی.
منت وار: یلان بلوچ زامرانی
No comments:
Post a Comment