گیدی کسہ ءُ کوْھنیں شائری ءِ سرا ترانے

 گیدی کسہ ءُ کوْھنیں شائری ءِ سرا ترانے

ھونک غیبیؔ         توار: جاوید مولابکش

یک ءُ دو گونڈیں گپ جناں۔ تچکیں گپ ایش انت کہ من پہ زانت بلوچی کوْھنیں شائری ءَ کلاسیکل ءِ لبز کارمرز نہ کتگ۔ چی ءَ کہ ھر کوْھنیں شئیر کلاسیکل ءِ تہ ءَ ھوار کنگ نہ بیت۔ اے ھوالہ ءَ منیر مومن ءِ نبشتانکے ھست کہ آئی ءِ کتاب "گیدی ءُ ساچشت" ءُ اوتاک مکران ءِ تاکبند "اوتاک" ءِ کلاسیکل شائری ءِ نمبر ءَ ھم چھاپ بوتگ۔ اود ءَ اے چیز گیشینگ بوتگ کہ کلاسیکل شائری کجامی ءَ گوْش اَنت۔ اسل ءَ کلاسیکل کجام انت ءُ کجام نہ انت۔ اے بارہ ءَ ٹی ایس ایلیٹ ءِ نبشتانکے ھم ھست کہ اود ءَ آئی ءَ پہ اے بن گپ ءَ تچکین ءُ جوانیں گپ جتگ۔ 

  من کوھنیں شائری ءِ بارہ ءَ ھمنچو گوْشاں کہ کوھنیں شائری بہ بیت یا گیدی کسہ۔ اے دوئیں چیز ھر دمگ ءَ بدل اَنت۔ اگاں باور نہ بیت گڑا اوگانستان ءِ پٹ ءُ پولکار ولی محمد رخشانی ءِ رِد ءُ بند داتگیں کوْھنیں شئیرانی کتاب ءَ بچار اِت۔ اود ءَ شئیر چَٹ دگہ وڑ اَنت۔ 

نوں من مکرانی یا سلیمانی گالوار ءِ مردمے آں۔ من ھُد بکناں کہ واجہ ولی محمد رخشانی رد انت ءُ تھنا من راست آں۔ گڑا بزانکہ من لبزانک ءِ تہ ءَ سکیں کسانیں سکیں کم علمیں مردمے آں۔ چی ءَ کہ من اسل چیز ءِ روتگاں سر بُوّگ ءِ جھد کنگ ءَ نیان ءُ تچک ءَ وتی گپ ءَ جَنگ ءَ آں۔ لبزانک ءِ تہ ءَ زوراں سری ھچ نہ بیت۔ اد ءَ کسے گوْش اِیت کہ من پہ زور وتی گپ ءَ مَنّاریناں۔ لبزانک آئی ءَ شھمات کنت ءُ ڈن ءَ کشّ اِیت۔ 

دنیا ءُ جھان ءِ گیدی کسھاں بچار ات۔ بازیں کسہ یک انت بلے آوانی بامرد جاھے ھَرے، جاھے تولگے، جاھے روباھے، جاھے مارے، جاھے گُرکے۔۔۔۔۔ ءُ جاھے انگت دگہ چیزے۔ من اپریکہ، ھندوستان، چین، یوروپ، امریکا، آسٹریلیا ءُ اے دمگانی سکیں کوْھنیں کسہ ونتگ انت۔ آوانی تہ ءَ باز ءِ روتگ یکین انت بلے ھما دمگ ءِ دودمانانی ھساب ءَ بدل بوتگ انت۔ من بگوْشاں کہ تھنا منی دمگ ءِ راست انت ءُ اے دگہ دمگانی رد انت۔ گڑا بزانکہ من ءَ انگہ وانگی انت ءُ چیز سرپد بُوّگی انت۔ 

اے پڑ ءَ مردے بوتگ لیوی اسٹراس کہ آئی ءَ وتی زند ءِ 59 سال گوں پٹ ءُ پولی کار ءُ ھمیشانی وانگ ءَ گوازینتگ۔ آئی ءَ گیدی کسہ ءُ "اساطیرانی" سرا کار کتگ ءُ پدا آ "ساختیاتی" لیکہ ءِ رِد ءَ چار اِتگ اَنت۔ لیوی اسٹراس گڈسر ءَ اے گپ ءَ جنت کہ "اساطیر آفاقی" اَنت ءُ اے انسان ءِ ذھن ءِ ساز اتگین انت ءُ اے یک راجے ءِ نہ انت۔ 

نوں گپ کہ گیدی کسہ ءُ شئیرانی بیت اے ھر دمگ ءَ ھر ملک ءَ بدل اَنت۔ من وت اپریکا ءِ بازیں کسہ دیستگ انت کہ آ کسہ بلوچانی کِرّ ءَ ھست انت بس کمو بدل اَنت۔ نوں من بگوْشاں کہ اپریکا ءِ کسہ رد اَنت یا بلوچانی رَد اَنت؟ اے وَ علمی گپے نہ بیت۔ 

نوں گپ بلوچی ءِ کوْھنیں شئیر ءُ گیدی کسھانی بہ بیت۔ اے ھر دمگ ءَ جتائیں رنگے ءَ انت۔ ھمے وڑ ءَ بتلاں بچار۔ ھر دمگے ءِ بدل ھم جتا جتا انت۔ بلوچستان مزن انت۔ بلوچ راج ھم بازیں دمگاں شنگ ءُ شانگ انت۔ ھر دمگ ءِ مردمانی وتی تبے۔ گیدی کسہ ءُ کوھنیں شائری ھم دمگ ءِ ھساب ءَ کمو کمو بدل بنت۔ 

چاکر ءُ گوھرام ءِ شئیراں بچار مکران ءَ دگہ رنگے ءَ رواج گپتگ انت ءُ ھما گالوار ءَ کہ نبشتہ کنگ بوتگ انت آ گالوار سلیمانی انت ءُ آوانی گالوار ءَ اے شئیر دگہ رنگے ءَ انت۔ نوں آ بگوْش انت کہ مکران ءِ رد اَنت؟ اے وَ علمی گپے نہ بیت۔ 

نوں ایشانی بنزہ ءِ شوھازگ ءُ در جَنگ علمی پٹ ءُ پولے لوٹیت۔ پہ راہ گوزی کوکار ءُ جاک ءَ وت سریں ھبر ءَ ما چیزاں رد کت نہ کنیں۔ 

اے پڑ ءَ مارا "ساختیات" کمک کنت۔ "ساختیاتی" باوستے بہ بیت۔ علمی تران مارا جزباتی بئیگ ءُ کوکار ءُ جاک ءَ نئیل اِیت۔ چیا کہ اود ءَ دلیل ءُ منانک کہ بہ بیت اود ءَ سنگینی بیت۔ سنگینیں چاگرد ءَ کوکار ءُ جاک نارھبندی یے۔

منت وار: باسک ڈاٹ کام پیسبُک گروپ