جنکوءِ سورءِ گُدانی دوچگریں پِت

 جنکوءِ سورءِ گُدانی دوچگریں پِت

                                        گوادر ءِ توار

بلوچ تمنی ءُ مردینی چاگردءَ گُد ءُ پُچءِ دوچگ پہ مردیناں گیشتر ایبے زانگ بیت بلے شالءِ جاہمنندیں حفیظ اللہ ناں ایوک دوچگرے بلکیں وتی جنکوءِ سورءِ گُداں ھم دستءِ وت دوچگءَ انت۔

دوچگر حفیظ اللہ گوں بی بی سیءَ گپ کنانءَ گُشیت کہ "منءَ وتی جنکو دلءَ دوست اِنت

پمیشکہ من لوٹاں کہ آئیءِ درستیں پُچاں گوں وتی دستاں بہ دوچاں،

اے پہ آئیءَ سوگاتاں ھم ءُ

آئیءَ مدام منی ترانگاں ھم گیج اَنت"

دوچ بلوچ چاگردءَ جنین آدمانی زیبائیں پوشاکے کہ بلوچ دود ءُ ربیدگءِ زندگیں ءُ مھکمیں بھرے۔  اشیءَ ابید تنگدستیں ءُ گُشنگیں بلوچ چاگردءَ دوچ ءِ ہنر بلوچ زالبولانی مستریں روزگار ھم زانگ بیت بلے اے ہنر پہ مردیناں ایبے زانگ بیت۔ ءُ اگاں یک بچکے یا مردینے دوچگری بکنت گڑا آئیءَ وڑ وڑیں گپ گُشگ بیت۔

"دوچ منی شوک انت، منءَ ھُب ھست دوچگءِ۔

راستیءَ اے پہ مردیناں مئے چاگردءَ ایبے،

کسانیءَ چہ من اے کارءَ کنگءَ آں

مردم وڑ وڑیں گپ کن انت بلے اے منی ہنر اِنت پمیشکہ من ایب نہ کناں" حفیظ اللہ

حفیظ اللہ وتی جنکوءِ آروسءِ پُچاں ھم وت دوچگءَ انت۔ حفیظ اللہ گُشیت "من وتی جنکوءِ سورءِ گُدانی تہا کہ مئے رواج انت،

بیستءَ گیش.  اشانی تہا دہ، دوازدہ من وتی دستاں گوں دوتکگ"

حفیظ اللہ دوچءِ نہیادءِ بابت گُشیت "مرچاں ارزان تریں دوچ ھم ہپت ہشت ہزار انت،

ءُ ھمے وڑءَ پنجا شست ہزارءَ تک ھم اشانی نیاد بیت"

حفیظ اللہ وت یک دکانےءَ کارءَ انت ھم ءُ شپءَ دمبرگءَ گوں لوگءَ واتر کنت بلے ھردیں آئیءَ لوگءَ آئیءِ جنکو گوں بچکندگءَ وش آتک کنت گڑا آ وتی دمبرگءَ بے ھال کنت۔ حفیظ اللہ گُشیت "من دکانےءَ کار ھم کنگءَ آں،

کارءَ چہ دَم ھم براں

بلے وھدے شپءَ من واتر کایاں

جنکو منی دیمءَ نندیت، بچکندیت، من وتی دمبرگءَ بےھال بَں.

ءُ آئیءِ کاراں گوں ھم کار بَں"

منت وار: بی بی سی