بلوچ تهنّا زمین پرستاں| گوادر ءِ توار|

 بلوچ تهنّا زمین پرستاں

                                  رگام بلوچ

بلوچ راجدپتر ءِ کہ گپ بیت گُڑا باز جُست چست بیت همے جستانی تہ ءَ یک جُستے بلوچ مزهب ئیگ انت کہ لس مهلوک ءِ زهن ءَ چِست بیت. 

ماں 1974 ءَ شوهاز بوتگیں دودہ مان مہرگڑھ ایشیاه ءِ انسانی چاگرد ءِ بُنجاه منّگ بیت چیا کہ اے چہ هراک ءُ تُرکی ءِ دودہ مان ءَ چہ هم کُهن تریں۔

اے گپ ءَ ادا تچک کناں کہ اے دودہ مان ءَ تهنّا بلوچ آباد نہ بوتگ اَنت بلکیں مرچیگیں ایران، افغانستان، هندوستان ءُ ایشیاه ءِ دگے بازیں هندانی راجاں وتی سر همے دودہ مان ءَ چہ چِست کُتگ بس چاگردی بدلی Social Evolution ءِ سوَب ءَ چہ مردُم کش ءُ گوَرے دمگاں آباد کناں بوتگ اَنت بلے اے گپ پکّا انت کہ بلوچ ھم ھمے دودہ مان ءَ چہ درتکگ ءُ روچ ءِ مرچیگ ءَ تہ همے زمین ءِ سرا نشتگ۔    

مہرگڑھ ءِ پشتکپتگیں آثار آهی نزّیک ءُ گوَرے دست کپتگیں جنینی بُت ( مجسمہ) آنی بارا ءَ فاروق بلوچ ءِ گُشگ انت کہ مہرگڑه ءِ مردُماں زمین ءُ جنین یکّیں بستار ءَ شرپ داتگ اَنت چیا کہ زمین ءَ آیاں گلّا ءُ دان داتگ ءُ جنین آں آ چُک پمیشکا زمین ءُ جنین سک پاک ءُ شرپمند منّگ بوتگ انت ۔ فاروق بلوچ ءِ گُشگ انت کہ مہرگڑھ ءِ مردُماں زمین ءُ جنین دوئیں سُجدگ کُتگ انت بلے جنین ءِ بت آنی جوڑ کنگ ءِ مکسد زمین ءِ سُجدگ کنگ بوتگ ءُ جنین چونائیگہ شرپمند ءُ پاک منّگ بوتگ پمیشکا پہ زمین ءِ سُجدگ کنگ ءِ نیّت ءَ آیاں جنین آنی بُت جوڑ کُتگ انت۔

جنینانی بُت بلوچستان ءِ شهر خضدار، نال، کوئلو، آوران، نڑ، کوئٹہ ءُ بولان ءِ آثار ِ کدیمہ ءَ چہ دست کپتگ اَنت ءُ اگاں گیشتر پٹ ءُ پول کنگ بہ بیت اے پیمیں بُت بلوچستان ءِ کُنڈ کُنڈ درکپیت ۔ فاروق بلوچ ءِ گُشگ ءِ رِد ءَ اے بُت آ وهد ءَ لوگ لوگ ءَ ایر بوتگ اَنت۔

اِے گپ اے گوائی ءَ دیینت کہ بلوچ ءَ مزهبی نیّت ءَ درُستاں پیش زمین سُجدگ کُتگ بلے وهد ءِ همرائی ءَ بلوچ آبادی ءِ مزنین کچّے ایرانی بلوچستان ءَ نندیت ایرانی دوده مان ءِ هخمانشی امپائر ءِ اهد ءَ بلوچ زرتِشتی / آس پرست بنت، آهی ءَ پد بلوچ هندوهزم ءِ منّوک هم بنت چیا کہ بلوچستان ءِ تہ ءَ اے مزهبانی آثار اَست انت۔

همے رنگ ءَ خلیفہ راشدین ءِ وهد ءَ بلوچ ءِ مزنیں کچّے اسلام ءَ کبول کنت همے رِد ءَ شاه محمد مری گُشیت کہ  بلوچ مرچی ھرچ مزھب ءِ اِزت ءَ همے هاتر ءَ کنت که اے درئیں مزهبانی یک وهدے ءَ بلوچ منّوگِر بوتگ-

 اے درئیں چیز یک گپے ءِ گوائی ءَ الّم دیینت کہ مہرگڑھ ءَ چہ سرچست کنوکیں راجانی تہ ءَ بلوچ یکّیں راجیں کہ مرچی ءَ تہ زمین ءَ وتی مات لیکیت، زمین ءَ پاک ءُ سُجدگ کنگ ءِ لائک سرپد بیت۔ اگاں شما بلوچ راجدپتر ءِ تاکاں وانان بکنے تاں گندے کہ بلوچ وتی زمین ءِ پهازگ ءِ هاتر ءَ بئے چک ءُ پد نبوتگ، اے هاک ءِ واستہ آهی ءَ منگولز، سکندر اعظم، داریوش، پُرتگیز، انگریز ءُ دگے بازیں راجانی گوما کرنی جنگ کُتگ اَنت ءُ وتی جِند ندر کُتگ اَنت۔

 

تو اگاں انگت بلوچے ءَ جُست بکنے کہ اے زمین تئ چی اِنت آهی جواب بیت " منی ماتیں " چیا کہ " زمین ماتیں" ءِ پلسپہ بلوچانی هون ءَ هواریں، اے گپّانی کس نہ منّوک نہ اِنت کہ بلوچ ءِ مهر پہ زمین ءَ بئے کم بنوتگ، مہرگڑھ هتم بوت، برباد بوت، آئی ءِ تہ ءَ باریں چینچو راج دراتک،چینچو زبان ءُ ربیدگاں سر چِست کُت،  مہرگڑھ ءَ وتی وشهالی ءُ بدهالی وت دیستاں، چاگرد بدل بوهان بوتاں، بلے مرچی اینچو کرن رند هم بلوچ همے زمین ءِ هاتر ءَ جنگ ءَ اِنت، اے جنگ کنگ ءِ جزبگ بلوچ ءَ چہ مہرگڑھ ءَ گون اِنت، تو گندے کہ مرچی لس بلوچ ءِ کرّا زمین دوستی ءِ کسہ یے است، زمین ءِ گوما آهی ءِ جُتا ایں مہر یے، جُتائیں سیادی یے۔

بلوچ بگندے تیوگیں کِرسٹ، مسلمان یا هندو یے بوت مکنت بلے یک زمین دوستے الکاپی ءَ بیت -