رگام ساهب ءُ بلوچ ساهب

 رگام ساهب ءُ بلوچ ساهب

             رگام بلوچ

تو الّم اشکُتگ یا ونتگ کہ " ردی آں درُستاں پیسر هما مردُم ءَ هال بدے کہ آهی ءَ کُتگ اَنت تاکہ آ وتی ردی آں گِهتر کنگ ءِ کوشست بکنت " ـ

اے سکّیں نامداریں گپ یے بلے بژن کہ تهنّا نامدار انت، اے گپ ءِ سرا کار کنگ نیست_

من ءَ یاتیں من کہ وتی اولی نبشتانک اردو ءَ نبِشتگ اَت پدا یدّر ءَ اردو من وتی مارشتانی درنگازی ءِ زبان کُتگ اَت ءُ چُش کہ منی مارشتانی سیادی گوں بلوچ ءُ بلوچستان ءَ اَت پمیشکا اے دوئیں منی لبزانی تہ ءَ اردو زبان ءَ ٹهینٹ چیّک وَرگ ءَ اتاں-

پدا وتسرا جیڑِت کہ رگام ساهب تئ نبشانکانی نیّت وَ هراب نہ اِنت، تو بلوچ ءُ بلوچستان ءِ واستہ نبیسگ ءَ ئے گُڑا بلوچ ءُ بلوچستان ءِ ردی آں تو دری مردمانی زبان ءَ چیا نبیسگ ءَ ئے؟ بائدیں تو بلوچ ءِ جیڑهاں درُستاں پیسر بلوچ ءِ جند ءَ هال دے ءُ همایانی زبان ءَ ھالے دے تاکہ آ سرپد بہ بنت کہ آ چینچوک ءَ تک آپ ءَ اَنت۔

پدا من وتی مَجگ ءَ اے گپ جاگہ دات کہ نبشتانک توسیپ ءِ بیت یا هرابی آنی اولی هّک بلوچی زبان ئیگ انت، نو کلم گوَ وارت کہ اردو یا انگلش ءَ بلوچ ءِ هرابی آں بہ نبیس ایت -

نو بگندے شُما جیڑے کہ رگام مکُٹّیں جاهلے، چے پیمیں گپ جنگ ءَ اِنت... بلے اِے کارے هم پُشدر ءَ بیان کنگ ءَ یاں-

بلوچ دود ءُ ربیدگی روچ بہ بیت یا بلوچ ءِ بے اهساسی، مُردگ پرستی ءُ بے سُدی ءِ کسّہ ، یا بلوچ ءِ شرّیں نیمگ ءَ آهی ءِ زبان، دود، مهمانداری، میارجلّی ءُ اشکی داستاناں بِگر داں پوشاک ما درُستاں دری مردمانی دیم ءَ پیشدارگ ءَ انت کہ اولی ھک بلوچ ئیگ انت ۔

بگندے رگام ساهب ءِ وڑا بلوچ ساهب ءِ نیّت هم هراب نہ انت بلے یک هبرے تَچک انت، بلوچ ساهب اِدا رَد انت۔

دگرے دیم ءَ وتی پجّار، وتی، دود ءُ ربیدگ، وتی جیڑهانی بارا ءَ گپ جنگ شر انت ایشی ءَ چہ دل سُبَکتِر بیت، چار مردُم پجّا کاریت بلے جیڑه گِش ءُ گیوار کنگ نہ بنت، ربیدگ زندگ کنگ نہ بیت، دری مردُم بس تئ گپ ءَ گوشدارنت تئ گم ءَ هوار بنت آ پرتو دگہ زھمے نجن اَنت۔

چونائیگا همے کارانی سوَب ءَ مرچی بلوچ ءَ وتی راجدپتر، وتی راجی هستی آنی بارا ءَ هِچ سرپدی نیست چیا کہ هما زمانگ ءَ کہ آیانی مجگ ءَ اے گپّانی جاگہ دیئگ ءِ وهد بوتگ آ وهد ءَ سرپدیں بلوچ دری مردُمانی دیم ءَ وتی ربیدگ ءُ میارجلّی ءِ کسّہ آنی آرگ ءَ گیش نہ بوتگ اَنت پورا دری مردُماں پہ مارا انچیں دردے مان۔

گپ ءَ تچک تِر کناں -

دود ءُ ربیدگ ءِ دارگ مول ءُ مراد اگاں وتی راجی مڈّی آنی پهازگ اِنت گُڑا دری مردُم مئے مّڈی آں پهاز اَنت؟

اگاں بلوچ ءِ جیڑهاں دری مردُماں هال دیئے گُڑا اے پکّا اِنت کہ بلوچ ءِ جیڑهاں دری مردُم گِشّین اَنت؟ 

اگاں اِنّاں گُڑا استیں بلوچ وتی دود ءُ ربیدگ ءَ #سِمبولک پرچا کنگ ءَ اَنت؟ پرچا مرچی بلوچ ورناه آنی تہ ءَ مزنیں کچّے ربیدگ ءِ روچ ءِ بارا ءَ سرپد انت بلے ربیدگ ءَ جند ءِ بارا ءَ بُچّ یے هم نزانت؟ 

پہ بلوچ ءَ اگاں کسے چیزّے کُت کنت گُڑا آ تهنّا بلوچ ئے جِند اِنت پمیشکا چہ درامداں پیسر وتی مهلوک ءَ وتی جیڑه ءُ وتی دود ءُ ربیدگ ءَ سرپد کنئے ۔

هاوند هم همایانی همراه بیت کہ آ وتی همراه بہ بنت، وتی جیڑه، وتی دود ءُ ربیدگ، وتی راجی هستی آں درُستاں پیسر وتی جند ءِ دیم ءَ آشنا کنائین ئے ۔

وتی راجی ھستی آنی کسّہ آں وتی کستریناں ھال بدی اِت، وتی دودمان ءِ بارا ءَ آیاں سرپدی بدی اِت،وتی جیڑھاں وتی مردُماں سرپد بکنے،  وتی ردی آں آیانی دیم ءَ چیر مدی اِت، ءُ وتی بلوچ بوهگ ءِ هک ءَ ادا بکن اِت -

پدا بگندے بلوچ ساھب ءَ الکاپیں پُشتپدے بہ بیت-