جنین ءِ زند ءُ بُن دپتر

جنین ءِ زند ءُ بُن دپتر

سلال ساوڑ

جنین ءِ بُندپتر ءِ درگت ءَ گوْشگ بیت کہ آ بنداتی ءُ پیشی ایں وهد ءَ ماں انسانی چاگرد ءَ ماتی هاکمی ''مادرانہ نظام" برجاه بیتگ،  چہ مؤرخ ءُ بُن دپتر نویسانی وانگ ءَ رند مالوم بیت آ ماتی هاکمی (مادرانہ نظام ) ءِ دؤر ءِ تہا مرد جنین ءِ تابع ءُ زیردست بیتگ  جنین هچڈؤلیں کار کنگ ءَ چہ پادبند نہ بیت بلکیں هرچی کنگ ءَ آجو ءُ وتواک بَنت،  آیاناں انسانی تہذیب ءَ دیمروہی دئیگ ءَ جُوانیں رنگے ءَ وتی بودناکی و صلاحیتاناں کامرز کتگ ءُ پیش داشتگ.

چہ آرکیالوجسٹانی درجتگیں قدیمی آثار ءُ نشانیانی کُمک ءَ اِے گپ پدّر ءُ دریافت بیتگ کہ کِشت ءُ کِشاری (زراعت) ءِ بُنیاد ءَ جنین اِیر کنت، آئ ءَ پہ ورگ ءَ وردن ءُ وراک تیار کُتگ ءُ چہ کرپاس ءَ گُد ءُ پُچ ءِ اڈ کنگ بنا کنت، دوچگ ءُ گُلکاری و سہت ءُ زیوراں چیں زیبائیں ڈول ءُ نمونگ جوڑ کنگ جنین ءِ تخیل ءُ سنج ءِ برورد اِنت، رزان ءُ ہیران جنین ءِ جوڑشت اِنت،  گوشت ءُ گلّہ ءَ را پَچگ ءِ هاترا آس اوں جنین روک کنت ، گوک ، پس ، میش ءُ دلوتانی والینگ ءِ کار جنین ءَ بنا کُتگ

 آیاں چہ ڈنّ ءَ چیں آرتگیں شکار وت ماں بہر کُتگ اَنت ءُ بؤکیں میڑانی هم سلاه کُتگ.

آ دؤر ءُ باریگ کہ '' مادرسری نظام '' ءِ دؤر گوشگ بیت  تاریخ دان ءُ دانشورانی نِزّ ءَ  سُکون ءُ آسائیشت ، امن ءُ امان ، مساوات ءُ بروبری ، رُژنا پگر ءُ اِنسان دوستی،  جمہوریت ءُ سوشلزم ءِ ماڈل ءِ زمانگے بیت.   چرایشی ءَ رند ماں تاریخ ءَ پدا کم کم ءَ  مردانی حاکمیت '' پِدرسَری '' ءِ دؤر دیم ءَ کئیت ءُ '' مادری نظام''  ایرجیگ بیان بیت ءُ دیم پہ زوالی ءَ رؤت کہ جنین  مردانی زیردست جوڑ بَنت، آیانی مستری پچگرگ بیت ءُ آیاناں قید ءُ بَند کنگ ءُ تهنا وتی ذاتی مڈّی ءُ چُک پیداک کنگ ءِ وسیلہ زانگ بیت کہ اِے دؤر ءَ تاریخ دان جاگیرداری دؤر ءِ بنداتی زمانگ زاننت-   جنین ءِ بستار چہ انسانے ءَ چیں کاپینگ بیت ءُ بس ملکیت ءِ بیت

اَچ گوْستانک ءَ چہ جنین ءَ وتی زندمان ءَ بازیں زُلم ءُ زوراکی، هزاب ءُ بزّگی دیستگ تاں روچِ مروچی هم مئے پَدمنتگیں مرداں سری چاگرد ءَ غُلام ءُ لاچاری ءِ ساه ءَ کشّگ ءَ اِنت،  ذیادتی ءُ ناروائ سگگ اِنت، واهگ ءُ واهشت ئِے پامال اَنت ، گویاک ءُ توار اِش گُٹگیر اِنت،  تنیگتہ اوں بس آئ ءَ گوں سِکس ءُ وپت ءُ وابی ءِ واهشت بستگ اَنت- انگت هم مئے پدمنتگیں گُمان ءَ جنین هما اِنت کہ لوگ ءِ تہا اندیم اِنت  کسّ ئےِ مہ گِندیت، گوں نامهرم ءَ گپ مہ جَنت، دائمی سریگ ئےِ سرا ءُ دیم ئےِ هجاب اِنت ، چہ ایندگہ راجی، چاگردی کار ءُ چِست ءُ اِیراں لاتعلق اِنت ءُ بس ماں چاردیواری ءَ مرد ءِ حُکمانی ماتحت اِنت. 

 جنین سرجم ءَ یک انچیں انسانے کہ یک مردینے_ آ هم هما زندگی ءَ گوازینگ ءِ حقدار اِنت مردین ءِ حق اِنت -  جنین ءِ حقوق ءُ آزاتی ‎ءِ دیم ءَ غیرت ءُ حیاء ءِ جیڑه چِست کنگ اُگبال زیری ءُ زُلمے  آئ ءَ را کمتر ءُ جتائیں صنف ءُ بہرے لیکگ بَد اِنت ءُ جبر ‎ءُ ناانساپی یے شُمار کنگ بیت- -  انساپ، غیرطبقاتی ءُ بروبری ءِ چاگرد تاں هما وهدی جوڑ نہ بیت جنین چہ تیوگ ایں حقوقاں بےبہر اِنت ءُ یک پیم ایں مردُمے ءِ بستار دئیگ مہ بیت..