علی وتکشی کَنَگ لوٹ ایت
من اسل ءَ کِسّہ آرگ نزان آں ءُ نئیکہ من کدی کِسّہ آرتگ من ءَ بے یات نہ کنت کہ من کدی جیڑیتگ کہ کسّہ اوں آرگ بیت۔ ھو مردم گُش اَنت کِسّہ وت ساچ کنگ بنت ！
تو زان ئے ؟ ما دگرانی ساچشتگیں کِسھانی بَھر اِنت آیاں اے کسّہ آرتگ اَنت، آیاں وتی کسہ مئے سرا موشتگاں، آ لوٹ اَنت ما ھمایانی کِسّہ ءَ چہ ڈن ءَ مرو ایں۔۔۔۔！
چوشیں مردمے ھَم نیست کہ مارا مئے کِسّہ ءَ بہ گُش اِیت بَلے اِے درائیں کسّہ ھمایانی پیروکاں آرتگ اَنت۔ اِے مئے کسّہ نہ اَنت ！
اِے کسّہ کہ راوان اِنت کس نزانت کئے ءَ نویستگ؟
مئے بازار ءِ تہ ءَ ھرکس ءَ یک کسّہے اَست آیانی پیروکاں نزاناں کُجا چہ اِے کسّہ آرتگ اَنت بَلے مئے پیروک ءَ کسّہ گون نہ بیتگ！
بلکیں اوں گون اِش بیتگ بیت کنت بے ھال اِنت نی ھچ نہ گُش ایت اگں بے ھالیں گُڑا پت ءَ الم کسّہ یے گُشتگی！
بلُّوک گُش ایت پت ءَ سَکّ جُھد کُتگ کہ پہ مارا یک کِسّہ ے بہ ٹھین ایت بَلے کسّہ آرگ ءَ سوبیں نہ بوتگ ھما اِنت مئے کرا ھچ کِسّہ نیست ما دگرانی کِسّہے سرا زندگ ایں۔
بلُّوک اے ھَم گُش ایت وتی کّسہ شریں کہ ھرابیں بَلے وتئیگیں بس بَلُّوک وتی نام گِرگ ءَ نیل ایت ھردے کہ من جُست کُتگ اَت کہ گُڑا تو چیا کسّہ نیارتگ؟ گپ گُڑا تَرّینگ اَت بَلّوک ءَ کہ منی دگہ کار باز بیتگاں ！
چوش مہ بیت آیانی آرتگیں درائیں کسّہ ھمایانی بلّوکاں آرتگ اَنت پہ نام ءَ پیروک دیم ءَ ارتگ انت ئے ءُ پدا اِے گپ ءَ بلّوک اوں شر سرپد ایں۔
یک روچے من بلُّوک ءَ گُشت کہ من علی ءِ ئے کسّہ ءَ کار آں بُّلوک ھیران بوت ！
کُجام علی؟
ھَما علی کہ وتکشی کنگ لوٹ ایت من گُشت！ "بُّلوک ءَ زانت علی وتکشی نہ کنت ءُ منی کسّہ اوں سوبین نہ بیت"
من باز جُھد کُت علی وتکشی یے بہ کنت اگں وتکشی نہ کنت گڑا وتکُشی کنگ چیا لوٹ اِیت من ءَ ھچ جواب نہ رس اِت منی کِسّہے تہ ءَ بس تھنا علی وتکشی کنگ لوٹ ایت بَلے اِے گپ ءَ علی ئے جند اوں نزانت کہ پرچا آ وتکشی کنگ لوٹ ایت！
No comments:
Post a Comment