اکسکاری چی ے؟ گوادر ءِ توار

 اکسکاری چی ے؟

                                        کمانچر بلوچ

اکسکاری بلائیں دُنیا یے اے دُنیا ءِ تہا  ہرکس وتی بور ءَ تاچینگ ءَ اِنت ہر کس پہ ندارگانی شوھازگ ءَ تَچ ءُ  تاگ کنگ ءَ اِنت من ھم ھمے سپر ءَ گوں کپتگیں مساپرے آں کہ انگت سپر ءَ آں 

یکروچے من واجہ برکھا بلوچ ءِ پَٹّ ءَ پولی کتاب ( جست ءَ پُر اِنت کازماس ) ھمشی ءَ وانگ ءَ اِتاں  اے کتاب ءِ تہا یک جاگھے ءَ نبشتہ اَت کہ دنیا ءِ تہا اوّلی رند ءَ اوّلی اکس پرانس ءَ 1826 ءَ کشّگ بوتگ 

ءُ اے اکس کشّ ءِ نام واجہ جوزف ناٹسپور نیسپے بوتگ کہ اوّلی رند ءَ آئی ءَ اوّلی اکس کشّگ ءَ 8 اَدار جَتگ ،، بزانکہ آئی ءَ 8 گنٹھ لَگ اِتگ پہ اوّلی اکس ءِ کشّگ ءَ 

ءُ پدا  آ 1833 ءَ بیران بوتگ

اے بے دروریں اِزم  چہ پرانس ءَ بندات بوتگ مرچی آئی ءَ درائیں دُنیا پتاتگ  دُنیا ءِ پتاھگ ءِ ھمرائی ءَ آئی ءَ بلوچستان ھم گپت ءَ گوں بلوچستان ءِ تہا  من ءَ ھوار دگہ بازیں آرٹسٹے ھمے دام ءَ کپتگ  ، اکسکاری باز مزنیں اِزمے منی وَڑیں نزانتکارے ایشی ءِ کابل بوت نہ کنت ، بَلے ہرچی کہ دست ءَ بوھگ ءَ اِنت ما ھمائی ءَ کَنگ ءَ ایں 

اگن کسّے من ءَ جست بہ کنت کہ اکسکاری چی یے ؟ 

گُڑا بگند ءِ  لبز اکسکاری ءَ من چار لبزانی تہا گیشینت مہ کناں 

بلے ھمینچو گُشت کناں  کہ اے ھمے بے  دروریں اِزم ءِ کمال اِنت کہ تو دُنیا ءُ جہان ءِ رَنگاں گندگ ءَ ئے 

دومی نیمگ ءَ اگن تو بہ چار ئے  اکسکاری ءِ کار گوں کیمراہ ءَ اِنت  ءُ کیمراہ ءِ کار گوں لائیٹ ءَ اِنت پرچا کہ کیمراہ تھنا لائیٹ ءَ پجّا کاریت ، کیمراہ ترا گُشیت روچ ،روچ اِنت شَپ ،شَپ اِنت اگن شپ ءَ تو کیمراہ ءِ دیم ءَ لائیٹے ایر بکنے  کیمراہ ترا ھال دات کہ آ اِنت لائیٹے روک اِنت پرچا کہ آئی ءِ کار گوں تھنا لائیٹ ءَ اِنت ، 

اَنچُش کہ یک آرٹسٹے کلراں چہ یک پینٹینگے ڈرا (Draw )کنت  جوڑ کنت 

ھمے وَڑا دگہ آرٹسٹے کیمراہ ءِ لائیٹ ءَ چہ یک اکسے جوڑ کنت آرٹسٹ چہ کیمراہ ءِ لائیٹ ءَ کجام وَڑیں اکسے جوڑ کنت آ نوں ھما آرٹسٹ ءِ سرا اِنت۔