سید ظہورشاہ ہاشمی ۔ گوادر ءِ توار

 سید ظہورشاہ ہاشمی

                                     عبدالحلیم

21 اپریل بلوچی زبان ءِ نامئیں ادیب، شاعر، زبان زانت، پَٹ ءُ پولکار ءُ بلوچی لبز بلد سید گنج ءِ واھند واجہ سید ظہورشاہ ہاشمی ءِ نود ءُ پنچمی بوتن ءِ روچ اِنت۔ پہ بلوچی زبان ءُ ادب ءِ بے مٹیں ھزمت ءِ ھاتر ءَ سید ءِ نام باز بُرز لیکھگ بیت۔

سید ءِ کھول ءِ سیادی چہ روبرکتی بلوچستان  ءَ انت۔  سید ءِ پت ءُ پِیرُک دشتیاری ءِ دمَگ چوکاٹ ءِ جا منند بیتگاں۔ گوشنت کہ سید ءِ بُن پیرُک رکل شاہ ءِ ادیرہ انگت ہمودا اِنت۔ چہ ہمودا سید ءِ پت ءُ پیرُک لڈیتگ دیم پہ مکران ءَ اتکگاں۔ گوادر ءِ جا مِنند جوڈ بیتگاں۔ سید 26 اپریلءَ 1926 ءَ گوادر ءَ ودی بیتگ۔ 

انچوش گُشنت کہ سید ءَ بندات ءَ اردو ادب کار مَرز کُتگ بلے رند ءَ سید ءَ وتی ماتی زبان ءِ نیمگ ءَ دلگوشی زُرتگ۔ سید ءَ پہ بلوچی زبان ءَ گوں ہمنچوک اِشک بیتگ کہ شب ءُ روچ پہ بلوچی زبان ءُ ادب ءِ دیمرئی ءِ واست ءَ کار ءِ کُتگ۔ پہ بلوچی زبان ءِ دیمرئی واست ءَ سید ءَ گوں نگیگیں جاور ھالا ہچ ھند ءُ دمگ نیشتگ۔ سید بلوچی زبان ءِ اولی لبز بلد بزاں سید گنج ءِ ہم واھند اِنت۔ 

سید ءَ بلوچی اِملا بزاں سیاھگ ءِ راست نبیسگ ءِ وانگی ہم دیم ءَ آورتگ ءِ۔ اے وانگی مرچی ہم بلوچی اِملا ءِ جوانیں وانگی ءِ زانگ بیت۔ سید ءَ وتی شِیرانی تھا آؤکیں جاور ھالانی پیش بندی ہم کُتگ۔ سید ءِ شاعری ءِ گیشتریں بھر فلسفیانہ سوچ ءِ درانگازی کَننت۔ انچوش کہ سید ءَ وتی اے شِیر ءِ تھا گوادر ءِ آؤکیں وھد ءِ جاور ھالانی اے وڈ ءَ دَر انگازی کُتگ۔ مرچی گوادر کجام جاور ھالانی تھا گوزگ اِنت۔ اے شِیر دلگوش کَنگ کَرزیت، 

بے سریں راج ءُ بے سریں سودا 

جھندم چہ بادگیر ءَ کاپر شت 

آتکگ باریگ لج بریں زر ءِ 

دوستی ءُ مھر ءِ دور آسر شت 

شال پیسر سگار ھرجان اَت 

دیناں بے سیت ءِ گنجیں گوادر شت

راستی ءِ بام ءَ جورکاں داتگ

مال شت ملک ءُ مھتریں سر شت 

وژدلیں جارے کپتگ مرت سید 

موتک دستونکاں راھدربر شت

سید ءِ کلام راجی فکر، چاگردی ءُ شعوری بیداری ءُ مھر ءُ مھبت ءِ درانگازی ءِ مانزامان اِنت۔ سید ءِ کلام ہر دور ءَ باریگ ءَ گوں بندوک اِنت۔ سید ءِ کلام ہر وھد ءُ آئی ءِ جاور ھالانی ترجمانی کننت۔

گال نام منی، نام تئی، نام ھدا ءِ 

بے گال ءَ من ءُ تو ھداوند مُجاں گار 

گال بنگش اِنت ھرچیزے ءِ گال آسر اِنت دْرست ءِ 

گال میانجی ءِ توجیل اِنت ءُ سرکاری ءِ گردار 

بے گال ءَ نہ بیت گپت، نہ بیت گپت نہ بیت کرد 

گال اَنت کہ گپتار بنت، گپتار بنت کردار

سید آیوک ءَ پہ نہ بلوچی زبان ءَ سر ءَ دسترس بیتگ بلکیں سید ءَ ہر وڈیں زبان ونتگ ءُ دَر بُرتگ کہ آیانی تھا اردو، فارسی، عربی، انگریزی اور سنسکرت ھوار اَنت۔ سید ءَ اے شرپ ہم رستگ کہ آئی ءَ بلوچی زبان ءِ اولی ناول "نازُک" نبشتگ کُتگ۔ اے ناول پی ٹی وی بولان کوئٹہ ءَ ڈرامہ سیریل کنگ ءُ پیش دارگ بیتگ۔

سید ءِ بازیں وانگی چھاپ ءُ شِنگ کنگ بیتگاں کہ آیانی نام اِش اَنت۔

1-سستگیں دستونک (شعری مجموعہ) 

2-بلوچی بنگیجی (بلوچی کی بنیاد) 

3-بلوچی سیاھگ ءِ راست نبیسگ (بلوچی املا کا درست طریقہ کار) 

4-جُز,, عمّ بلوچی (قرآن مجید کے آخری حصے کا بلوچی میں ترجمہ) 

5-میرگند (بلوچی زبان میں مختصر کہانیاں) 

6-بلوچی اردو بول چال 

7-انگر ءُ ترونگل (بلوچی شعری مجموعہ) 

8- بْرتکگیں بیر (بلوچی شعری مجموعہ) 

9-تْراپکنیں تْرمپ (بلوچی شعری مجموعہ) 

10-نازک (بلوچی زبان کا اولین ناول) 

11-سیدگنج (بلوچی زبان کا اولین لغت) 

12-سچکانیں سسّا (بلوچی شعری مجموعہ) 

13-شکّلیں شھجو (شعری مجموعہ) 

14-گسد گْوار (بلوچی شعری مجموعہ) 

15-سید نمدی (خطوط) 

16-بلوچی زبان و ادب کی تاریخ (ایک جائزہ)

17: شھلچہ کار (ملا فاضل کی زندگی اور فن پر لکھی گئی کتاب) 

18: چکاسنگ. (ایک تحقیقی جائزہ) 

اشاں چی ابید سید ءِ چھاپ نہ بوتگیں وانگی ہم است اَنت۔  بلوچی دربر، پاپولر پوئٹری آف بلوچ، گورکی ءِ مات ءِ بلوچی، زوت گر ءُ دیر ھِلّ، گمے تالان کناں، اوِستا ءِ بلوچی، ھنکین، سستگیں دستونک (اردو)، شھگوستن شاھار، بلوچی دلپسندیں لچھکاری ءُ گاریں کلدار. 

سید ءَ چہ ھکومت ءِ پاکستان ءِ نیمگ ءَ پہ آئی ءِ بے مٹیں ادبی کارانی ھزمت ءُ مُز ءِ پِڑ ءَ"حسن کارکردگی" ءِ داد ہم دیگ بیتگ۔

انچوش گوشنت کہ سید ءِ زِند نگیگیں جاور ھالانی دیمپان بیتگ۔ آئی ءِ زِند ءَ کس ءَ آئی پلہ مَرزی نہ کُتگ۔ بلے سید ءَ کَس کُمار نہ کُتگ ءُ وتی جھد پہ بلوچی زبان ءُ ادب ءِ دیمرئی ءَ برجا داشتگ۔ اے سید ءِ جھدانی برکت اِنت کہ بلوچی زبان ءُ ادب ابدمان اِنت۔

ہچ باج نہ بارت اچ من ءَ گفتار ءِ سکندر 

من کورشاں گالانی نیاں پُرشتگیں دار یوش۔

@haleemhayatan