راجہ داہر، سند ءِ اسل راجی راہشون
راجہ داہر سندءِ گُڈی بکالیں (ہندو) سروک بوتگ۔راجہ داہر 663ءَ الور سند (ھستیں روہڑی سندھ) ءَ پیداگ بوتگ۔ واجہ داہر ءِ واجئیں کماشءِ نام چچ بوتگ کہ آ ھم سندءِ راہشون ءُ سروکے بوتگ۔ کماشءِ بیران بوھگءَ پد واجہ داہر سندءِ سروک نامینگ بوتگ۔ واجہ داہر ءِ سیادی چہ ہندو برھمن ءَ بوتگ۔
واجہ داہر ھما وھدءَ یک وشھالیں ریاستےءِ واھند بوتگ کہ آ وھدءَ اے دمگاں سند یک سیر ءُ ازگاریں ڈیھے بوتگ۔
واجہ داہر 695ءَ سندءِ ھاکم بوتگ۔
اے ھما وھدءِ گپ انت کہ عراقءَ امیہ خلافتءِ حجاج بن یوسف گورنر اَت۔ حجاج سکیں زالم ءُ ایش ءُ نوش کنوکیں ھاکمے بوتگ۔ آئیءِ دہرءَ عراقءَ کُشت ءُ کوش ءِ گوازی بوھگءَ اَت۔ مہلوک سکیں لاچاریں زندے گوازینگءَ اَت۔ ھمے جاوراں شاہی کٹھمءِ لہتیں مردم کہ آہانی تہا جنین آدم ھم ھوار اتاں چہ عراقءَ جِست انت ءُ سندءَ باہوٹی بوت انت۔
حجاج ءَ اے ھبر دوست نہ بوت ءُ آئیءَ سندءِ سرا اُرش کنگ ءِ جار جت۔ حجاجءَ یک لشکرے دیم پہ سندءَ دیم دات کہ آئیءِ سروکی آئیءِ برازتک کنگءَ اَت۔ اے ارشءَ چہ اے پدر بوت کہ حجاجءَ ایوک جستگیں مردم دزگیر کنگی نہ اِت انت بلکیں آئیءَ سند ءُ لسبیلہءِ دمگ زور گرگی ات انت۔
اے جنگءَ را روا دئیگءِ ھاترءَ اسلامءِ نام کارمرز کنگ بوت۔ آئیءَ عراقءِ تہا اے دروگ شنگ کُرت کہ سندءِ زِرءَ مئے یک لانچے پُلگ بوتگ ءُ مردم بندیگ کنگ بوتگ انت کہ آہانی تہا زالبول ھم ھوار انت۔
یک مزنیں لشکرے دیم پہ سندءَ اُرش کنگءِ ھاترءَ ساجو کنگ ءُ دیم دئیگ بوت۔ لشکرءِ سروکیءَ محمد بن قاسم کنگءَ اَت۔ اے لشکر عراقءَ چہ دراتک ءُ بلوچستانءِ دمگ کنڈ ملیر(ضلع لسبیلہ)ءَ ایر اتک۔ آ وھداں لسبیلہءِ جُتائیں دمگاں جُتائیں کُٹھم جاہمنند اتاں کہ ھر کُٹھمءِ وتی سردار ءُ سروک ھست ات انت۔ اے سرداراں وتی وسءُ واکءَ اے لشکرءِ مکابلہ کُت بلئے بے سوب بوت انت ءُ محمد بن قاسمءِ لشکر ادا سوبمند بوت۔ دروگیں اسلامءِ نامءَ جوڑ بوتگیں اے لشکرءَ ادا باج برگءَ پد ڈُنگی کُت ءُ زالبول ءُ زھگ وتی بندیگ کت انت ءُ دیم پہ سندءَ رہادگ بوت۔ دیمءَ ھر جاگہءُدمگے اتک آہاں جنگ ءُ پُلگ برجم داشت تا سندءَ سر بوت انت۔
سن 712 ءَ واجہ داہر ءَ اسلامی لشکرءِ آئگءِ ھال سربوت گڑا واجہ داہرءَ ھم وتی اُرد پہ جنگءَ ساجو کُت۔ سندءِ کورءَ دوئیں لشکر دیم پہ دیم بوت انت ۔
محمد بن قاسم ءِ لشکر سک مزن ات۔ بلئے انگت ھم واجہ داہرءَ نزوری نہ من اِت۔ جنگ بنا بوت گڑا واجہ داہر گوں وتی لشکرءَ گوں دلیریءَ دژمنءَ جنگ دئیان بوت۔ سندءِ اے اسل راہشون وتی ھونءِ گُڈی ترنپءَ داں پہ وتی گُلزمینءِ پہریزگءَ گوں درآمدیں لشکرءَ مڑان بوت۔
واجہ داہر گوں وتی لشکرءَ دژمنءِ مکابلہءَ جنگ کنانءَ شہید بوت انت ءُ سندءِ سرا محمد بن قاسمءَ اُرش کُت ءُ زورگیری کُت۔ درآمدانی اے لشکرءَ شھر سوتک انت ۔ ہندوہانی ابادت جاہ آس دات انت۔سندءِ راجدپتر بیگواہ کُت ءُ پدا واجہ داہر یک ڈُنگے کُت ءُ پیش داشت ءُ عرب لشکر اسلامی ءُ ایماندار نبشتہ کُت۔
بدبھتی اے بوت کہ رندی پدریچاں ھمے وانینگ بوت کہ راجہ داہر یک زالمے بوتگ ءُ درآمدیں محمد بن قاسم ءُ حجاج بن یوسف بامرد لیکگ بوت انت۔ بلئے راستی اشییءِ چپ اِنت۔ وانندہ ءُ زانتکاریں مردم مرچی ھم سندءَ راجہ داہرءِ شہید بوھگءِ روچءَ برجم دار انت ءُ وتی گواستانکءِ اے مزن نامیں راہشونءِ سرا پہر کن انت۔
اے مئے بد بھتی انت کہ مارا دینءِ نامءِ سرا امینچو نز چار جوڈ کنگ بوتگ کہ ما یک بامردے واجہ داہر زالم ءُ بے دینے لیک اتگ ءُ یک مسلمانیں ڈُنگے وتی راہشون جوڈ کُتگ۔ ءُ راستیں راجدپترءَ چہ وتءَ گِستا کُتگ۔ یک دروگیں راجدپترےءَ منگءَ انت۔
No comments:
Post a Comment