دی "پی" کمپنی

دی "پی" کمپنی

رگام بلوچ             

مرد وکالت کنگ ءَ اَت وتسرا بھپار کنگ ءَ لگ اِت پدا کّم کّم ءَ کمپنی یے جوڑ کنگ ءِ واب یے دیست ۔۔۔۔ کمپنی ءِ جوڑ کنگ ءِ واب ءَ وکیل ساهب ءِ واب بُرت، بیڑی پہ بیڑی، شراب پہ شراب مرد ءَ بهئی واب نیئتک۔

دور اِش کُت بهپار ءِ میدان ءَ، اینگو آنگو دروگے بست ءُ مزنیں کمپنی ءِ مینیجِگ ڈائریکٹرزاں وتی گپ یے رسینت ءُ گُشتے " واجہ شما مزنیں کمپنی ءِ پُشت ءَ وت ءَ سیر کُتگ مارا ھم وتی مزنیں کمپنی ءِ کش ءَ کسانیں زمین ءِ ٹُکّرے بدی اِت گوں داں وتی کمپنی ءَ جوڑ کُت بِکناں " ۔

مزنیں کمپنی ءِ مینیجگ ڈائریکٹرزاں چارِت اے نو باز چاپلوسی کنگ ءَ اِنت بزّگ بوتے ءُ پسّہ یے دات " ھیر بیت پُل، ترا وڑے کناں "۔

وکیل ساهب ءَ ڈائریکٹرزانی بوٹانی سپاه کنگ ءُ واجہ واجہ کنگ گیش کُت اَنت پدا کہ دلجم بوت کہ کمپنی ءِ جُگاڑ پکّا اِنت گُڑا اناگہ ءَ جیڑِت اِش " کمپنی چلائینگ هم لوٹیت ءُ چُشیں پروڑکٹس ءُ موادے مارا نیست چُش مہ بیت کہ کمپنی جوڑ بوھگ ءَ دو کلاک رند دیم پہ چیر بہ بیت "-

وکیل ساھب ءِ واب پدا شُت پدا یکروچے جیڑ اِت اِش " همسائگیں جاڑیگیں کمپنی اگاں مئے کمپنی ءِ گوما هوار بہ بیت گُڑا وڑ یے بیت " ـ

همسائگیں کمپنی هم مزنیں کمپنی ءِ چیردستی ءَ اَت ءُ آیانی گیشتِریں مردُماں وکیل ساهب ءِ نوکیں کمپنی ءِ جوڑ کنگ ءِ لوٹ نہ من اِتگ اَت ۔

وکیل ساھب ءَ چار اِت اے وڑا منی کمپنی ءِ دیم سیاه بیت گُڑا نو باز کوشست یے کُت کہ ھمسائگیں کمپنی ءِ مزنیں مردُمے سنگت بہ کنت۔

زوت وکیل ساھب سوبمند بوت ءُ همسائگیں کمپنی ءِ ( سی، ای، او) وتی سنگت کُت اِش پدا ( سی، ای، او) ءَ وکیل ساهب ءِ نوکیں کمپنی ءِ جوڑ کنگ ءِ گپ دوست بوت ءُ گُشت ئے " مئے کمپنی ءِ پالِسی یے هست " همسائگ ءُ امب ءِ سائگ " تو مئے نوکیں همسائگ بئے گم مکن من پہ تو ھرچ وڑیں کُمک ءِ هاتر ءَ ساڑی آں۔

وکیل ساھب ءَ چار اِت شکار همیش انت نئیل اِت  کہ برو ۔ وکیل ساھب ءَ همسائگیں کمپنی ءَ روّآ گیش کُت اَنت دیر نہ بوت ( سی، ای، او) ءَ وکیل ساهب وتی کمپنی ءِ پرسنل وکیل جوڑ کُت نو وکیل ساهب ءُ (سی، ای، او)  ءِ سنگتی چو وِجے ءُ ویرو ءِ وڑا بوت ھروھد کہ وکیل ساهب (سی، ای، او) ءِ کِرّا شُت گُڑا آئی ءِ سرا پُل ریچگ بوت۔ (سی، ای، او)  ءَ وکیل ساهب ءِ گُهار انچُش دوست اَت کہ یک لکھ ءِ آریے سوگات کُت ئے۔

( سی، ای،او )  تهنّا سنگتی کنگ ءَ اَت آئی ءَ نزانت کہ وکیل ساھب ءِ نیّت ساپ نہ اِنت ۔

ھیر! وھد ءَ رند کہ مزنیں کمپنی ءَ بھپار سیر کُت گُڑا وکیل ساھب ءَ پدا مینیجگ ڈائریکٹرزانی گوما نزّیکی بِنا کُت ءُ همسائگیں کمپنی ءِ ( سی، ای، او) دلجم اَت کہ مزنیں کمپنی ءَ رند آئی ءَ وتی کمپنی ءِ وتواکی پدا رسیت بس کمّو کاگدی کار کنگی انت ۔

(سی، ای، او)  ءَ وتی کمپنی ءِ کاگدی کارارنی زمہ واری وکیل ساھب ءَ دات اَنت کہ ترا چہ لائکتریں وکیل نیست ءُ پدا تو منی برات ناکیں سنگتے ئے۔

وکیل گل بوت کہ ھُدا آئی ءِ همراه اِنت ۔ 

مُدّت گوَست اَنت وکیل ساهب ءَ وتی کمپنی جوڑ کُت بلے همسائگیں کمپنی وتواک بوئگ ءَ نہ اِشت ءُ وتی کمپنی ءِ گوما هوار کُت۔

(سی، ای، او)  ءَ زاناں سک ساپ دِِلی ءَ گوں سنگتی کُتگ اَت ءُ زاناں هُدا ءَ هم وکیل ساهب ءِ دگابازی دوست نہ بوت ۔ بزّگیں وکیل ساهب ءَ نوکیں کمپنی ءِ ( سی، ای، او) بوهگ ءَ دو سال سرجم نہ اَت کہ دل ءِ نادرائی ءَ گِپت گُهار ءَ کمپنی ءِ ایمبولنس والا گوانک جتاں کہ بیا اِت شمئے واجہ نا جوڑ اِنت۔ نادرهجاه ءَ برت اِش بلے ایمبولنس گارا۔۔۔۔۔ دیر نہ بوت وکیل ساھب کوڑئیں دُگنیا ءَ چہ رُکست بوت ۔

پدا کہ ایمبولنس ءِ جُست ءُ پُرس کنگ بوت گُڑا هال اتک کہ کمپنی ءِ گارڑاں ایمبولنس ءِ پیٹرول کش اِتگ بوتگ اَنت۔

ھُدا وکیل ساھب ءَ بهشت ءَ جاگہ بِدنت کمپنی ءِ مردُم آئی ءِ منت واراں ءُ تنیگت وکیل ساهب ءِ کارداب (دگابازی) ءِ سرا کمپنی ءَ چلائینگ ءَ اَنت۔