بلئے اسرائیل مناپکے وَ نہ ایں
اسرائیلءَ توری تؤ ھر وڑءَ ھراب بہ گُش ئے بلئے آئیءِ یک چیزےءِ توسیپءَ الم کن ئے کہ ابید آئیءَ وتی ایٹمی سلاہانی جوڑ کنگءِ گپءَ ھچ چیر نہ داتگ۔ ھر چی کہ گُشتگ سرءِ جاک گُشتگ۔ ھر چی کُتگ دل مِک کُتگ ءُ درسانی چمانی دیمءَ کُتگ۔ تاکتءَ دلیلءِ زلورت نہ بیت۔ دلیل و نزوریں پیش کن انت۔ نی وَ اینچُکءَ اسرائیل ھم بوریتءَ ارجان جتگ۔ چیاکہ اودءَ چُک چُک زانت کہ ھر وڑیں گامگیجےءَ پد گیش چہ گیش دگہ چے بیت؟
آ (فلسطینی) وتی ڈُر اِتگیں لوگ ءُ چیر تر اتگیں سامانانی ءُ بچ اِتگیں زمینی ٹُکرےءِ رکینگءَ پہ گیلوڑ، ڈوک، لٹ یا پیپُکی زنگی ایں آسِناں گوں جوڑ کُتگیں (پہ نام) راکٹےءَ گوں دیمءَ کاینت ءُ پدا ما گوں ٹینک، میزائل ءُ سمارٹ بمباں آہانی دپاں مں ھاکاں سک کنیں۔
پدا چو پیسریگیں وڑءَ کمو کُکار بیت۔ لہتیں جاہاں کمو زہرشانی بیت۔ ہپتاد ءُ سے سالی بیان پدا لہتیں ملکانی نیمءَ چہ دئیگ بنت۔ ھوریں کومانی گلءِ انسانی ھک ءُ سلامتیءِ یک دیوانے بیت۔ امریکہ اسرائیلءِ گونڈیں کُتگیں ردی یےءَ پہل کنت ءُ گپ ھلاس بیت۔
پہ نام مسلمانیں ملکانی مسلمان یک برے پدا دستاں برز کن انت ءُ اسرائیلی بمبانی سڑگءُ رمیزانی ورگءِ دعاءَ لوٹاں ءُ بس۔ غرب اردن ءُ غزہءِ کبرستاناں لہتیں نوکیں کبر گیش بیت۔ پدا داں دیمءِ ھون ریچیں ڈرامہءَ انچش بیت گُش ئے زاناں یک ھرابیں وابے دیستگ۔ دگہ ھچ۔
مئے تہا لہتیں وتی بگلُکاں گوات دنت ءُ انچو وتءَ گمیگ ءُ ھئیران کنت گُشئے زاناں اے وڑ اولی برءَ بوھگءَ انت۔ اڑے مرچی پدا کاپِراں اینچو لوگ پروشتگ۔ اُپ یار زالماں پنچ سالی نُنکءِ سرا رھم نہ کُتگ۔ سبزیں ڈگار ہراِن کتگ انت یار۔۔۔ زلم بلئے زلم۔۔۔۔ گواستانک وانگءِ تھمبل و نہ بیت بلئے اسرائیلءِ ھلاپءَ کُکار کنگ۔ وانگ ءُ لکگءَ چہ ارزان تر انت۔
زاناں بے ھال ات کہ پنجاہ سال ساری اسرائیلی مزن وزیر گولڈا مائر ءَ نہ گُشتگ کہ 'چوش نہ انت پلستینءَ پلستینی جاہمنند بوتگ انت۔ ما چہ ڈنءَ اتکگیں۔ آ گلینتگ انت ءُ وت نشتگ ایں۔ آہانی و وجو نبیتگ ءُ ناں کہ ھست'
اے ھمے ھئیال انت کہ آؤکیں پدریچاں سر بوتگ۔ شما زاناں بے ھال اِت کہ جولائی دوہزار چاردہءَ غربءِ اردنءَ یک اسرائیلی یے آوار جنگءَ پد اسرائیلءِ شش ورناہاں یک سیزدہ سالی پلستینی گونڈو یے زندءُھئیاتی سوتک۔ بلئے انگت ھساب بروبر نہ بیت۔
پدا ھمے اسرائیلی اُردءَ برزءَ چہ ارش کت ءُ سے ہپتگانی تہا غزہءَ کساس ہژدہ سد پلستینی کُشت۔ ءُ پدا یک اسرائیلی پارلیمنٹءِ باسکیں زالبولےءَ وتی فیس بکءَ نبشتہ کُت کہ 'ھر بیم کارءِ پُشتءَ اے وڑیں دگہ بازیں مردین ءُ زالبولیں بیم کار ھست انت کہ آہانی کمکءَ ابید کس بیم کاری کرت نہ کنت۔ اشانی تہا دروگیں شہیدانی مات ھم ھوار انت کہ مرگءَ رند آ وتی بیم کاریں زھگاں گوں پُلاں ءُ گولائش کنگءَ گوں دوزہءَ دیم دئیاں۔ انساب وَ ھمیش انت کہ ھمے مات ءُ پت ھم انچو کُشگ بہ بنت۔ ءُ آہانی لوگ ھم پروشگ بہ بنت کہ اودءَ اے بیم کار رودین انت۔ آہانی کُشگءُ لوگانی ڈرینگ المی انت تاکہ دگہ بیم کار پیداگ مہ بیت'
ھمے زالکو(آئلت شاکد) یک لس زالبولے نہ انت۔ بلکیں سافٹ وئیر انجنیر ٹیکساس انسٹرومنٹس ءَ مزنیں عہدگےءِ سرا بوتگ۔ دوہزار سیزدہ داں ہژدہءَ اسرائیلی پارلیمنٹءِ باسک بوتگ۔ دوہزار پانزدہ داں نوزدہءَ انساپءِ وزیر ھم بوتگ۔ ءُ یک دینی سیاسی تپاکی گلےءِ (یمنا الائنز) باسکے ھم۔ اگاں اسرائیلی چاگردءَ مزنیں مردمانی پگر اے بہ بیت گڑا اشانی سرا ھئیران بوھوکانی سرا ابہکہ بوھگی انت۔
ءُ یروشلمءِ کدیمی ایں میتگ شیخ جراح ءِ جاہمنندیں اربانی کشگءُ ادا اسرائیلی آباد کاراں آباد کنگ ھم نوکیں چیزے نہ انت۔
اے پیسلہ و گولڈا مائر ءِ وزیریءَ نوزدہ سد ءُ ہپتاد ءُ سےءَ بوتگ کہ رو دراتکی یروشلم ءُ روایرکپتی یروشلم نیست۔ یروشلم ایوک یکے ءُ آ اسرائیل ءِ راجدپتری بنجاہ انت۔ ھمے ھاتر ھمروچی ایں کٹیٹائیءَ ھلاس کنگءِ یکیں راہ انت کہ پلستینی بیم کارانی نود درسد آبادی ءِ کم کنگءُ سی درسد کنگ ءُ اسرائیلی آباد کارانی آبادی ہپتاد درسد کنگی انت۔
پمیشکہ گوستگیں پنجاہ سالانی تہا یک لک پنجاہ ہزار پلستینی گلینگ ءُ کشگ بوتگ کہ نی آ قانودی دروشمءَ اتک ءُ آباد بوت نہ کن انت۔ آہانی جاگہاں دو لک یہودی آباد کنگ بوتگ۔ نی اے کساس ہپتاد درسد ءُ سی درسدءَ سر بوتگ۔
ءُ اے کہ غزہءَ یازدہ تپکی ماڑی ءَ الجزیرہ ءُ اے پی ءِ ھوار بازیں اھوالکاری ادارگانی کارگسانی تباہ بوھگءَ رسانک درءَ موتکے سرا زُرتگ ۔ پرچہ چُش؟
زاناں اے پراموش انت کہ مارچ دوہزار سےءَ ھمے غزہءَ باھوٹیانی گدانانی پروشگءَ اسرائیلی بلڈوزر اتکگ اتاں۔
انسانی ھکانی کارندہ باھوٹی گدانانی رکینگءَ پہ بلڈوزرانی دیمءَ میلانک بوت انت۔ یک بیست ءُ سے سالی امریکی کمکارے ریچل کوری ھم ھمودءَ بیت۔ آ بلڈوزرانی دارگءَ پہ شِرچینگ بیت ءُ ساہ دنت۔
آ وھداں ریچلءَ لیمبو زردیں واسکوٹے گورءَ بیت تاکہ آ دورءَ چہ پجارگ بہ بیت بلئے آئیءِ اے پجار ھم ھچ کارءَ نیتک۔ اگاں ریچلءِ وڑیں امریکہءِ دگہ جاہمنندے دگہ ملکےءَ اے وڑ کُشگ بوت ایں گڑا بچار ات کہ چون بوتگ ات؟
اشییءَ چہ پد اے گپ ھچ کار نہ دنت کہ اسرائیلءَ زانتگ کہ غزہءِ مِکیں اے یازدہ تبکی ماڑیءَ "ال جالا ٹاور" ءَ کجام میان استمانی اھوالکاری ادارگانی کارگس ھست آں۔
اسرائیلءَ اے ماڑیءِ سرا اُرش کنگءَ کلاکے پیسر ھال داتگ۔ اشییءَ چہ دو روچ پیسر غزہءِ دگہ یک ماڑی یےءِ سرا اُرش کنگءَ پیسر ھم اسرائیلءِ چیریں ادارگاں ماڑیءِ ھالیگ کنگءِ ھال داتگ کہ اگاں یک کلاکےءِ تہا ماڑی ھالیگ کنگ نہ بوت گڑا آ جانی تاوانءِ زمہ وار نہ انت۔ اشییءَ چہ گیش اسرائیل دگہ چے بکنت؟
امریکہ ءِ دیمپانیءِ وزیر لائیڈ آسٹنءَ ھم اسرائیلءِ اے گامگیج کہ ارش کنگءَ پیسر ھال دنت، ساڑاتگ۔ اے وڑیں ساڑائگءَ پد انگت کسی یے ءِ دلءَ اسرائیلءِ ھلاپ جُستے ھست؟
No comments:
Post a Comment