ھنیپ شریپ
رگام بلوچ
 |
| اکس: ھنیپ بلوچ Facebook |
ھنیپ شریپ یا ھنیپ نام اے نام ءَ چہ ھِچ بلوچ نانزانت نہ انت۔ من اولی رندا هنیپ شریپ ءِ جوڑ کُتگیں تامُر " منی پت ءَ برات نیست" چارتگ اَت آ زمانگ ءَ من کسان اِتاں جسمی رنگ ءَ هم ءُ زانتی دروشم ءَ هم ۔ من نزانتگ اَت اے کِسّہ، اے تامُر، اے کتاب چے انت۔
من ءَ یاتیں اے تامُر ءِ ڈائیلاگ آں بِگرداں کِسّہ ءُ کارِستاں انچیں لِزتّ یے مان اَت کہ من هنیپ ءِ شیده بوتاں ءُ پدا منی جُست گوں ھرکس ءَ همیش اَت " هنیپ شریپ کے انت؟ " یا من وتسرا گردِت ءُ هرکسی کِرّا همے تامُر ءِ ایڈورٹائیزمنٹ کُت ۔
اے ھمے میان اَت کہ من ءَ هنیپ ءِ چارگ سک دل ءَ اَت بلے آئی ءِ اکس نیست اَت ءُ وهد ءِ همرائی ءَ منی دل ءِ اے واهگ کُهن بوت، آ جُنون ءِ جند هتم بوت ۔ پدا کم کم ءَ " بلوچستان هوٹل، کریم، بالاچ " من اے درئیں تامُر چار اِتاں ۔ اِدا گپ یے گیش کناں کہ من اگاں اے تامُر آں پدا بِچاراں من سدکّاں کہ منی ھیرانگی انگت ھما پیم بنت کہ پیسرا بوتگ اَنت ۔
ھنیپ شریپ ءَ مروچاں سوشل میڈیا ءَ بلوچ وراناہ آنی سرا مزنیں اثر یے ھست باز مردُم ھنیپ ءَ بدتمیز ءُ بے ادبیں مردُم یے لیکنت ءُ وت ءَ چہ آئی ءَ دور دارنت همے وڑا کہ زمانگ یے ءَ بلوچاں وت ءَ اوشو ءِ کتاباں چہ دور داشتگ!! ھیر آ منی جیڑہ نہ انت۔
من ءَ بس وتی لیکہ ایر کنگی اَنت کہ پہ بلوچ ءَ ھنیپ پرچا ارزشت داریت؟ آئی ءِ زانت ءُ پگر پرچا پہ بلوچاں نوک اَنت؟ یا کول ِ مردُمانیگ ءَ هنیپ ءِ بدتمیز بوهگ بلوچ چاگر ءِ واستہ پرچا لازُم اِنت؟
اگان من بہ گُشاں کہ ھنیپ ءَ لس بلوچ ءِ زندگی ارزان کُتگ منی دل ءَ من رد نباں ۔۔۔۔ من دیستہ یک زمانگ یے بلوچ چاگرد سک تنک بوتگ، امینکدر تنک کہ ساہ زورگ ھم نہ بوتگ ۔۔۔۔ مذھبی چیردستی، لوگی چیردستی، ربیدگی چیردستی آں چہ مردُم گُٹگیر بوتگ اَنت ناں کسے ءَ گپ یے جت کُتگ ناں جُست یے ءُ ناکہ دگے سُر پُر یے بلئے ھنیپ ءَ زوت اے ساد سِست اَنت ءُ وتی همرائی ءَ لس بلوچ هم چہ اے تنکیں چاگرد ءَ کش اِت ءُ علمی چاگردے ءَ آؤرت۔
ھما بلوچ چاگر کہ آؤدا جنین ءُ مردینی آزه یے ءِ نام ءِ گِرگ گیرت جیڑه اَت هنیپ ءَ وتی هرچ گُشتانک تہا همے آزه آنی نام گِرگ ءَ گوں اے چیز هم نارمل کُت انت۔
ھما سیکیولریں بلوچ چاگرد کہ باریں کئی پندلاں چہ تنک بوتگ اَت کہ آؤدا ھرچ کسان ءُ مزنیں جیڑا جنین ءِ گُٹ ءَ لوپ کنگ بوتگ اَت، هما تنکیں بلوچ چاگرد کہ آؤدا یک ردی یے سزا مرگ جوڑ بوتگ اَت، ھما تنکیں بلوچ چاگرد کہ آؤدا دُگنیا ءُ جہانی Myths هست اِتاں، هما تنکیں بلوچ چاگرد کہ آؤدا تمیز ءُ وانندئی ءِ چیدگ هاموش بوهگ ءُ سر ءِ جہل کنگ اَت، هما تنکیں بلوچ چاگرد کہ آؤدا جُست کنگ بداِکلاکی یے منّگ بوتگ اَت، هما تنکیں بلوچ چاگرد کہ آؤدا زاہ یے سزا هاندانی جنگ اِتاں ۔۔۔۔۔۔ ھنیپ ءَ هما تنکیں بلوچ چاگرد پدا مٹ کُتگ۔
مرچی ھنیپ ءِ گُشتانک هرچ بلوچ هندانی تہا گوشدارگ بنت آیانی سرا همل کنگ بیت ۔ ھندانی پیر ءُ کماش بہ بنت شر یا ورناہ، زالبول بہ بنت شر یا مردین ھنیپ پہ شوک گوشدارگ بیت۔
بہ گند اِت کس یے بہ جیڑیت کہ اے بدلی یا نارملکی سک دیریں ءُ دگے بلوچ وانندا آنی سوَب ءَ اتکگ انت گُڑا اے گپ ردیں چیا کہ بلوچاں دیریں کہ ڈگری یاپتہ اَنت بلے کس ءَ بلوچ چاگرد ءِ تنک بوهگ سماه نہ کُتگ یا بہ گند اِت کُتگ اِش بلے کار یے نہ کُتگ پمیشکہ ھنیپ من اے سرَپ ءَ پیسر کُتگ۔
بلوچ بهر ءُ بانگ ایں بلے مرچی کوه ِ سلیمان ءَ بِگرداں کش ءُ گوَرءِ هرچ بلوچ دمگاں هنیپ ءِ توار ءَ بلوچ یکجاه کُتگ اَنت یا کم چہ کم آیانی میان ءِ کمیونیکیشن گیپ هتم بوتگ۔
الّم نہ ایں کہ ھرکس منی گپ آں گوں تِپاک بہ کنت بلئے هنیپ ءَ بلوچ چاگرد ءِ هرچ لس بلوچ ءَ بْگر داں سیاسی مردُم، نودربر، چاگردی مردُم، کماش ءُ ورناه جنین ءُ مردین درُست اے سرپدی داتگ اَنت کہ بلوچ گیشتر تنک بوت نہ کنت، بلوچ ءَ گیشتر وت ما وتی جنگ اوپار نہ بیت، بلوچ ءِ هرچ جیڑه گیرت ءِ نہ ایں، بلوچ ءَ کسان کسانیں گپ ءَ یک ءُ دومی ءِ گُٹ گِرگی نہ ایں بلکیں بلوچستان ءَ دگہ کار لوٹیت، بلوچ ءَ دگہ کار لوٹیت، بلوچ زمین ءَ دگہ کار لوٹیت۔
پمیشکا هنیپ ءَ ارزشت هست، پمیشکا آئی ءِ زانت ءُ پگر پہ بلوچاں نوکیں ءُ ۔۔۔۔ پمیشکا آئی ءِ بدتمیز بوھگ بلوچ ءِ واستہ لازُم ایں۔
بکولِ هنیپ ئیگ ءَ ۔۔۔۔۔۔ سلامت باتے، هرچ کُجائے بلوچ یے باتے ۔
No comments:
Post a Comment