حال حوال ناں بس ھاموشی
جاوید بلوچ
اے نبشتانک مرچیءَ چہ سے سال پیسر ھمے روچءَ آن لائن تاک حال حوال ءِ بند بوھگ ءِ سرا نبشتہ کنگ بوتگ۔
چوناہا ہر کُجا چندیں انچیں مردُم ھست بنت کہ آ چہ دگہ مردُماں جتا سوچ انت، آہانی پگرءِ تہءَ دگریءِ بیت، بگندئے آ جتا نہ سوچگءَ آں بلے چاگردءِ درستیں مردُم جیڈگءِ تکلیپءَ نہ کن انت ءُ ہرچی کہ بوھگءَ انت بس ھما وڑ انت ءُ ھما وڑ کنگی انت پمیشکہ جتائی، پرک ءُ دگری گندگ نئت بلئے وھدے کسے چہ اے دودءَ در بئیت ءُ نوکیں کارے بکنت گڑا جتا بیت ءُ المءَ دگری کئیت۔
انچو مارا اسکولانی تہءَ ھمے گُشگ بیت کہ ھاموش بئیت، ھما کلاس کہ سُھب داں نیمروچ ھاموش بہ بیت ءُ چُٹھی بہ کنت بزاں ھما ماشٹر درستاں جوانتر ءُ ھما نودربر درستاں گیش لائک ءُ فرمانبردار انت بلئے مئے یک استادے ھست آئیءَ مارا ھاموشیءَ بہ نئیشت گُشت ئے گپ بجن اِت مدام ھمے گُشت ئے کہ ھاموش کنگ سک آسان انت اگاں من بیاآں ءُ یک ءُ دو چکاں شامات پہ شامات بکن آں شُما درس داں چُٹھیءَ ترُک ءُ نُک بہ ات بلئے شمارا گپ پرمایگ اسٹیجءِ سرءَ برگ گران انت اے سک محنت لوٹیت۔
آ اسکولءِ گپءَ نی یونیورسٹیءَ ھم انچیں مہروانے ھست کہ مدام لیکچرءِ میانءَ درائینیت "یار تم بھی کچھ تو بولو" ما پہ شاکارگ ھما نُکّءِ تہءَ گپءَ دیمءَ بَر انت ءُ اشیءَ گیش کہ سرحال چی انت ھمے جیڑ انت کہ من باریں شر گُشگءَ آں یا ھراب۔
ما چون اے گپءَ بگش انت کہ مئے چاگرد توار اوپار نہ کنت ادا ھاموشی میار، جوانی ءُ فرمانبرداری ءِ نشان اِنت، ادا مکالمہ بد اخلاقی ، غداری ءُ بے شرپیءِ نشان انت۔
ادا علمءُ زانت ءُ شعوری گپءُ تران ءِ سرءَ بندش انت، کتاب ، اخبار ءُ سنگتانی دیوان بیمناک انت۔ حال حوال ھچ رنگءَ جائز نہ انت بس ھاموشی ءُ نہ کُٹوکیں ھاموشی...
آن لائن تاک حال حوال بند انت، ھاموش انت ءُ ٹپ مہ ٹپ یکردءَ ھاموش...
ھما رساندر کہ مدام ما ھماہانی زنگءَ جن انت ءُ گلہ کن انت کہ مئے توارءَ سر نہ کنت ھماہانی وڑءَ حال حوال ءِ وڑیں ھمے گُلزمینءِ روتاک ءُ چینل کہ وت سرکاری زرّءِ نہ رسگءِ گریوُک ھم حال حوالءِ بیگواہیءِ سرءَ ھاموش انت... اجب بے تواریءُ صمن بکمنے؟
اے توارءِ بُرزءَ کنگءَ نہ وَ ریٹنگءِ جیڑہ ھست نا چہ ڈی جی پی آرءِ نیمءَ فنڈ برگءِ گڑا؟
ءُ ناں سوشل میڈیا ءَ وانوکانی توار ءُ جُنز ھما کہ مدام سوشل میڈیاءَ ایکٹو انت؟
بزگی دگہ چی انت بس ھاموشی بہ بیت ند(قلم) ھُشک کاگد ھالیگ ءُ پگر وہمی یا بے سما بہ بیت...
"ھچ مہ گُش گُنگ ببو زبان منی"
نو ھچ مہ لک ات، ھچ مہ گُش ات، ھچ مہ کن ات ءُ حال حوال وَ ھچ رنگءَ نہ کن ات۔
No comments:
Post a Comment