دلوتّانی دوارجاہ ءِ سرا چمشانکے

 دلوتّانی دوارجاہ 

(Animal Farm) 

ءِ سرا چمشانکے

                          سجاد اَسد

جورج اوروِل ءِ نوزدہ سَد ءُ چِل ءُ پَنچ (1945) ءَ چھاپ ءُ شِنگ بیتگیں گیدی کِسّہ "Animal Farm" بزاں دلوتانی دوارجاہ وَنت۔ وش نبشتگ ءُ دائم ءَ برجم بئوکیں اے گیدی کِسّہ جناور رنگیں بنی آدم ءُ بنی آدم رنگیں جناورانی کسہ اِنت۔ بنی آدم کہ وتی جناوراں پہ وتی متلب ءُ پائیدگ ءَ بے کساس کار گیپت، ورد ءُ وراک نہ دنت ءُ لٹ ءُ کُٹ اِش کنت۔ ھمے جناور روچے یکجاہ شور بنت ءُ وتی بنی آدمیں واجہ ءَ جن اَنت ءُ گلین اَنت ءُ اَھد کن انت کہ مرچی ءَ رند آ وتی واجہ وت اَنت. بنی آدم ءُ بنی آدمءِ کارمرز بئوکیں ہمک چیز پہ آہاں دژمن ءُ ھرام اِنت۔  اے آجوئی ءِ جنگ ءَ درستیں جناورانی بَہرے مان اَت ۔ھمے دلوتانی دوارجاہ ءِ توامیں جناورانی راہشون ءُ واجہ ھوک (pig) اِنت۔ 

ھوک واجہ اِنت پرچاکہ آجوئی  ءِ سوج ھوک ءِ بوتگ. ھوک واجہ اِنت کہ ھوک ءَ گُشت ھرکس کہ چو بنی آدم ءَ دوپاد تَرّیت آ مۓ دژمن اِنت. ھوک واجہ اِنت کہ ھوک ءَ جار جت کہ ھرکس چو بنی آدم ءَ تُرْندآپ نوش اِیے آ جناورانی دژمناں ھساب کنگ بیت۔ واجہ سور ءَ اے ھم گُشت کہ نوں توامیں جناور وتی وس ءَ کار کن انت ءُ کس پہ گژن نہ مریت۔

واجہ ءَ گُشت کہ ما ھچ بر دژمنی گوں وتی بنی آدمانی واستہ نہ دار اَنت۔  واجہ ھوک ءَ جار پِرّینت کہ دْراھیں جناور برابر اَنت۔ 

ماہ ءُ سال گْوزان بیت اَنت ۔ جناور درس گل ءُ شادان اِتنت۔ توامیں جناور کار کنگ ءَ اِتاں. ھرکس سیر ءِ لاپ اَت۔

وھد ءِ ہمرائ ءَ موسم مٹاں بوت اَنت ءُ موسم ءِ ہمرائ ءَ واجہ ھوک  ءِ گپ ءُ کار ھم مَٹان بیت انت ۔ واجہ ھوک نو کار نہ کنت، واجہ ھوک نوں ترُّندآپ ہم نوش اِیت، واجہ ھوک ءَ نوں چار کُچِک پہ وتی ھپازت ءَ گون اَت. واجہ ھوک نو جناورانی چارگ ءَ ھم نئیت، واجہ ھوک جناواراں ورگ کم دنت ءُ برے نہ دنت اِش. واجہ ھوک وت ٹیٹ ورگ وارت ءُ پُشت ئےِ رودینتگ ئےِ. واجہ ھوک نوں وتی باگ ءِ سبزی  ءُنیوّگاں گوں بنی آدم ءَ بہا کنگ ءُ زر ءِ کمائینگ ءِ ارادگ ءَ کنت. واجہ ھوک نوں جناوراں لَٹ ہم دئیائین ایت. واجہ نوں جناوراں کُچک ءِ دست ءَ وارین اِیت. 

واجہ ھوک  نوں دوپاد تَرّیت ۔ واجہ ھوک ءَ جار پِرّینت؛ 

"جناور درس برابر اَنت. بلئے لہتیں جناور چہ برابر ءَ بُرزتر اَنت"۔

چہ جورج اورول ءِ اے گیدی کِسّہ ءَ در برگ بیت کہ زورآور ھرکس بہ بیت شر آ بشر بہ بیت شر جناور آ دائم ءَ وت ءَ گوں درستاں یک نہ کنت ۔ برےآ وت وت ءَ چہ دومی ءَ شرتر ءُ بُرزتر لیک اَنت ءُ بَرے آوتی آؤکیں اوبادگاں پہ وت ءَ واجہ کار سماہ کن اَنت.