راست ماجین اِنت راست تھل اِنت
دُرّا پکیر
1979
ءَ یو ایس ایس آر وھدے ماں اپگانستان ءَ پُتِــرت
جھاد ءِ نام ءَ ماں پاکستان ءَ پنڈگ ءِ کار ءَ وتی بُن ھشت ایر کت سال ءُ ماہ گوست اَنت مسیت مسیت لوگ لوگ ءَ پنڈگ ءِ کاروبار ءَ وتی روتگ مھکم کُت اَنت ءُ پدا انجیو جوڑ بوت اَنت
گل جوڑ بوت اَنت.
اے بیماری ءَ سپر کنان سپر کنان وتی سر بلوچستان ءَ کشّ اِت
لبزانک ، راجکاری ، گشندھی ءُ دگہ بازیں پڑ ایشی ءَ وتی سنگر کت اَنت یک نیمگے پہ ادبی گلّے ءَ پنڈگ ءِ چادر پچ بوت اَنت دگہ نیمگے ءَ نادرائیں گشندہ آنی کوپگ سراں وتی پنڈگ ءِ گُرکی اش ٹال کت ...
پہ ھما کار یا پہ ھما مردم یا ازمکار ءِ نام ءَ پنڈگ بوت آھانی زند چو ھما بتل ءَ برجاہ اَت کہ شپ کئیت شام نئیت بلے پنڈوکانی جند روچ پہ روچ ازگار ءُ سیر بوھان بوت اَنت ءُ بوھان اَنت
بازیں پڑاں پروموٹ کنگ ءِ نام ءَ ھما پڑ ءِ ازم ساچیں سر انچوش کم شرپ کنگ بوت اَنت کہ آھاں چرے دنیا ءَ وتی روَگ گھتر زانت .
دو سے روچ پیشتر چم یک گلگدارے ءَ کپت اَنت
بلوچی لبزانک ءِ سریں نامے مسلم حمّل ءَ جُست کنگ ءَ ات کہ چشیں گلّ نیست کہ اے جاور ءَ شمئے کُمک ءَ بہ کنت؟
اجب ایں جُستے
اے ھاترا اے جست اجب اَت کہ ھمے لبزانت بلوچ میوزک پروموٹر سوسائٹی ءِ مستریں گچین تریں باسکے ھم ءُ میوزک ءِ دیم بری ءِ نام ءَ اے گلّ ءَ لکّانی کچّ ءَ زرّ پنڈ اتگ ءُ وتی لاپ ولینتگ بلے اسل کار کہ کنگی بیتگ آ پُشت جتگ
گُشگ ءِ مول اش اِنت
مئے گشندہ گیشتر گریب اَنت بلے پنڈوک نہ اَنت
آھاں پنڈگ مہ دی اِت پر آھاں کار ءُ روزگارے ھم بہ شوھاز اِت
یک روچے وھاب بلوچ ءِ گوما تران بوت کہ تئی نوار کدی کئیت
کندات ئے ءُ گُشت ئے تئی منت وار کہ تو من ءَ یات دات کہ بلوچی زبان ءِ گشندھے آں ... وھاب یا دگہ انچیں نیزگاریں گشندہ ھست اَنت کہ پرآھاں دو وھد ءِ نان ھم جنجالے . . .
استاد ھلیم بلوچ کہ بلوچی زیمر ءِ زانشی ایں زیمر کارے آ کجام جاوراں زند گوازینگ ءَ اِنت اے ملک ءِ سرکار سردار یا زردار ءُ ھماھانی پنڈوکانی گوشاں مورے نہ وارت
باید اے وڑیں گوھر پھازگ بہ بنت
وھاب گشیت من پہ چاپراسی ءِ کار ءِ ھاترا وتی کاگد جم کتگ اَنت ھم من ڈالچار بوتگ اَنت ھلیم بلوچ گش ایت من ءَ اگاں کمو وس بہ بیت من دگہ روزگارے کناں کہ دو وھد ءِ نان بہ رس ایت . شوکت ساھر بہ بیت کہ اسلم اسد ، یا آدگہ باید ایشانی نام ءَ پنڈگ ءِ بدل ءَ ھمیشان ءَ روزگارے دیگ بہ بیت داں وتی نوارے کت بہ کناں.
No comments:
Post a Comment