گزروان ءِ چاپڑہ

 گزروانءِ چاپڑہ! 

    وہاب مجید

مرچی مُدّتےءَ پد من وتی کسانیءِ میتگ "گزروان"ءِ ہما چاپڑہءِ دیمءَ اوشتاتگ اِتاں کہ اُودا منی کسانیءَ بِزاں کہ ہشتادءِ دھکّءَ ھُدامُرزی کاکارسول بخش توکلءَ چہ میداں مدگ زُرتگ ءُ ٹامبانی تہا پیک کناہینتگ اَت۔ غلام قادرپیریءِ لوگءِ دیمے اے ہمے چاپڑہ اَت کہ ایشیءِ رودراتکی نیمگءِ تیابءِ لمبّءَ ما ہمک عیدءِ شپاں ھِکیّ پُٹ بُن داتگ اَت ءُ عید وش اتک کُتگ اَت۔ اے ہمے گزروانءِ دیمی زِرءِ تیاب اَت کہ ما کسانیءَ جان شُشت ءُ کسانیں ماہیگ  شُّور گیت ءُ سماتءِ سرا پتک ءُ ہمودا وارت اَنت. 

مرچی من گزروانءِ ہما راہءِ سرا اوشتاتگ اِتاں کہ کسانیءَ من ہمُک  سُہبءِ سرا "آغا خان پراہمری اسکول"ءَ چمدا چی "مارچ پاسٹ" کُت ءُ شُت ءُ اتکاں۔۔۔ ءُ اے ہمے دَمک ایت اَنت کہ ادا چی ہمُک روچ سیٹھ لعل بخش، ناکومرادبخش، وش روہیں قادربخش کِیاّ ءُ دگے بازیں کماش ے مُلا کریم دادءِ قلندری مسیتءَ پہ نمازءَ شُتگ ایت اَنت۔ مرچی اے دُراھیں واجہاں کوڑھیں دُنیا یلہ داتگ۔ 

وھدءَ بانزُل پِر بیت۔ مرچی دوہزار بیست ءُ یک اِنت ءُ من گزروانءِ کاکارسول بخش توکلءِ ہما چاپڑہءِ دیمءَ اوشتاتگ اِتاں. بلے مرچی ادا ناں مدگ ٹامب بیگءَ اِنت ءُ ناں کہ مرچاں عیدءِ شپاں دیمی زِرءِ تیابءِ لمبءَ ہیکی پُٹ بُن دیگ بیت اِنت۔ 

مرچی گزروانءِ تیابءِ لمبءَ چین ءُ پاکستانءِ سرکار " ایسٹ بے ایکپریس وے" دَگّ ے جوڑ کنگءَ اِنت۔ اے سڑک کوسٹل ہاہی وےءَ گوادر پورٹءَ گوں ھوار کنت۔ اے سڑک سی پیکءِ پروجیکٹ ے۔ 

مرچاں کاکا رسول بخش والا چاپڑہ پُرشتگ۔ اِدا دو کسانیں کوٹی جوڑ بیتگ۔ ءُ دیر اِنت سرکارءَ گزروانءِ دریاورداں پہ کاکا عُثمان قادربخش کِیاّءِ لوگءِ دیمءَ دگے چاپڑہ ے جوڑ کُتگ کہ اُودا مید وتی روگاں سِراچ اَنت ءُ سوشلاہز ءُ بیگاہءَ گِند ءُ نِند کن اَنت۔ ہمے چاپڑہءِ دیمءَ ڑنیّ گاڑ اوشتاتگ اَنت کہ سداں سال گزروانءِ جاہ منندیں دریاورداں دریاءِ روگ ءُ آھگءِ وھداں آھانی پجاّرءِ جُستءَ کن اَنت۔ 

ایسٹ بے ایکسپریس وے جوڑ بیگءَ گوں گزروان ءِ تیاب دپی دُراھیں لوگانی دیوال کِریک بیتگ اَنت ءُ دگے یک ھرابی ے ایش بیتگ کہ لوگ ءُ پسیلانی ہما آپ کہ پیشءَ دریاءَ شُتگ اَنت مرچاں سڑکءِ جوڑ بیگءَ گوں اوشتاتگ ءُ گٹر جوڑ بیتگ اَنت۔ 

من چاپڑہءِ دیمءَ اوشتاتگ ءُ پِگر کنگءَ اِتاں کہ "میگا پروجیکٹ" ءُ "میگا ترقی" پدمنتگ ءُ بے علم ءُ ہنریں راجاں گیشتر پدمنتگ کن اَنت پرچا کہ پہ میگا ترقیءَ ترا "میگا ہیومن ریسورس" ءُ "میگا ہیومن کپیٹل" لوٹ اِیت۔ ءُ ھستیں وھدءَ اے ہیومن کپیٹل گوادری ءُ بلوچءِ کِراّ نیست پرچا کہ سرکارءَ دریاورد ءُ شوانگیں بلوچءِ چُکءَ پہ ناں شاہ دربرجاہ ے داتگ ءُ ناں کہ آہیءَ پہ جوانیں ٹیکنیکل انسٹی ٹیوٹ ے جوڑ کُتگ ے۔ پمشکا اے میگا ترقی ءِ پاہدگاں ہندی ءُ گزروان ءِ دریاوردیں بلوچ چِست کُت نہ کنت ۔ بلے ڑنّی ءُ درامد چرایشیءَ زرور پاہدگ ِزیراَنت پرچاکہ آھانی گورا علم، ہُنر ءُ کاروبارءَ پہ زر ہم است۔ 

دُنیاءِ فلاحی ریاست اے وڑیں میگا پروجیکٹانی بُنگیج کنگءَ چہ پیش یا  پجیگءَ وتی ورناہاں ہما علم ءُ ہنر دینت کہ آ اے دیمروہیءِ چیلنجانی مقابلہءَ کُت بکن اَنت ءُ اے دیمروہیءَ چی اودے لس مھلوکءَ پاہدگ بہ رسیت۔ بلے بژنی گپ ایش اِنت کہ مہے وڑیں مُلکاں لس مھلوکءِ پاہدگ دُرستاں چہ آخرءَ چارگ بیت اِنت۔ 

گوں بے تاھیریں پِگر ءُ ھیالاں وھدے کہ من گزروانءِ چاپڑہ یلہ دات ءُ رھادگ بیتاں۔ مناں منی کسانیءِ سنگت حسن دوچار کپت۔ آہیءِ سرءِ گیشتریں پُٹ وھدءَ چہ سر اسپیت تریتگ ءُ پیشانی کِرچکءَ چہ پُر اَت۔ من جُست کُت "چون اِنت گزروان؟ دراہینت ے " تہی گزروان شُت"۔۔۔ نِی تو نہ گُشے عیدءِ شپءَ ہیکی پُٹ بُن دیاں۔۔۔ سماتءَ شُوّر پچاں۔۔۔ بلے شر کُت تو اے سڑکءِ جوڑ بیگءَ چہ سر شُتے۔۔۔ مارا دگے ہچ راہ ءُ در نیست۔۔۔ ما بزّگ بیت اِنت۔۔۔