لیاری ءُ اِستان ءِ جْوڑ کرتگیں پالیسی
لیاری کراچی ءِ رونق اِنت ،براه اِنت- لیاری "مدَر آف کراچی" اِنت- لیاری بلوچ گُلزمین ءِ هما بَهر اِنت کہ اُود ءَ بلوچ راجی زُرمبِش ءِ بُن هِشت ایر کنگ بوتگ-لیاری بلوچستان ءِ زور گِپتَگیں هَما جاه انت کہ اودا بی ایس او جوڑ کنگ بوتگ- هَمے لیاری ءِ تہ ءَ 1929ءَ بلوچ لیگ ءِ بُن هِشت ایر کنگ بوتگ ایشی ءِ بابت ءَ میر غوث بخش بزنجو ءَ وتی یک گُلگِدارے (interview) تہ ءَ گْوش اِیت کہ اے اولی بلوچ جماعت بوتگ -
بلوچ راجدپتر ءِ تہ ءَ لیاری بَلاهِیں اَرزِشتے دَارِیت- وهدیکہ نواب اکبر خان بُگٹی ءِ سرا لشکرکُشی کنگ بوت آئی شهیدی ءَ پد مستریں روانک ءُ زهرشانی لیاری ءَ بوتگ همے زهرشانی ءِ تہ ءَ چَہ یک چارده سالِی ایں ورناهے رینجرز اِنسپِکٹر ءِ دست ءِ پستول ءَ زوریت وتی دلبند ءِ سرا دار ایت گوش ایت کہ گولی چلاؤ-- هنچو گْوش اَنت کہ بلوچستان ءَ چہ چِست بوتگیں زُرمبِشت ءِ ترس چہ لیاری ءِ مردماناں دور دارگ ءِ واست ءَ اِستانی واکداراں کُشت ءُ کشاری ءِ چاگردے ودی کرتگ-تاں کہ اِد ءِ مردم اود ءِ چست بوتگیں زرمبشت ءَ بیگانگ بہ بنت-
وهدیکہ 1973 ءَ بلوچستان ءِ تہ ءَ فوج کُشی ، زوراکی بندات کنگ بوت گڑا اِستان ءَ همے تُرس هست ات کہ لیاری بلوچ گَہگِیری زُرمبِشت( بلوچ مزاحمتی تهریک) ءِ بنجاه جوڑ مہ بیت گڑا همے ترس ءِ سَوَب ءَ اِستان ءَ لیاری ءَ را چاگردی سلکاری ءُ جُرم آنی بُنجاه جوڑ کرت- چَرے سوب ءَ فوج ءَ لیاری گینوارانی دست ءَ دات- هما لیاری اودا هرچ گلی ءِ تہ ءَ اودا ناکو فیضُک ءِ سوتانی توار ات- اودا فٹ بال ات --- سائیکلنگ ات ------باکسنگ ات ----- مارشل آرٹس ات------ اے رنگءِ لئیبانی واست ءَ نامدار ات بلے مرچی ناکو فیضُک ءِ سوتانی بدل ءَ تیرانی توار کئیت ، مرچاں لیاری منشیات ، غیر قانونی تجارت ، اسلحہ ءُ اسمگلنگ ءِ بنجاه جوڑ کنگ بوتگ -
لیاری هَمَا لیارِی اِنت کہ اود ءَ بلوچ لبزانک ءِ بُن هشت ایر کنگ بوت،لیاری کماش خیر بخش مری ، عطااللہ مینگل ءُ غوث بخش بزنجو ءِ سیاست ءِ بنجاه بوتگ- غوث بخش بزنجو گْوش اِیت لیاری منی راجکاری ءِ بُنجاه بوتگ- لیاری سنٹیں گُلزمینے نہ بوتگ- اے ڈَگار ءَ مُلکار ودی کرتگ- اے ڈگار ءَ لبزانک کار ،لچّہ کار ودی کُرتگ،اے جاه کہ لیاری گْوشگ بیت- اِدا زانت ءِ کمّی نہ بوتگ- اے ڈگار ءَ زانتکار ، کوّاس فُٹ بالر ءُ باکسر ودی کرتگ- اے ڈگار ءَ لالہ لعل بخش رند ءُ یوسف نسکندی ودی کرتگ،اِدا شاعر ودی بوتگ - دگہ وشیں گپے کہ اِے ڈگار ءَ بلوچ راجدوستی ودی کرتگ - اے ڈَگار ءِ سرا حاجی رزاق ،اسلم بلوچ ،حکیم بلوچ ودی بوتگ اَنت -ادا غلام محمد ءُ شیر محمد ءِ سیاست ءِ بُنجاه بوتگ - ادا نمیرانیں استاد صباء دشتیاری ءِ جاه بوتگ- لیاری زَانِش ءُ لبزانک ءِ چیدگ بوتگ، فُٹ بال ءُ باکسنگ ءِ جاه بوتگ- هَمُک گلِی ءِ تہ ءَ وانگ ءُ زانگ ءِ جاه بوتگ، پمیشکا قاضی صاحب گْوش اِیت،،
لیاری ءِ دمگ منا چو ساه ءِ پیم ءَ دوست بنت بلے مرچاں لیاری آ لیاری نہ انت،مرچاں لیاری تُرس ءِ چیدگ جوڑ بوتگ،مرچاں ناکو فیضُک ءِ لیوا ءُ سوتانی توار ءِ جاه ءَ تیرانی توار کئیت - منشیات ءِ بنجاه جوڑ بوتگ - مَرگ ءِ ترُس هست ،گارءُ بیگواه بوهگ ئے تُرس هست،اغوا برائے تاوان ءِ تُرس انت، ادا مرچاں لبزانک ءِ گپ نہ بیت - ناں اِدا وانگ ءِ ٹوک بیت، لیاری ءِ هرچ هَند ءَ آه ءُ زاری انت آ کَلّرِی بِہ بِیت یا سِنگْولین بِہ بِیت ،چاکِیواڑَه بِہ بیت ، مَولامَدَد بِہ بِیت یاں کہ کلاکوٹ ءُ بغدادی بہ بنت اَنچو سَماء بِیت کہ جَهندَم لیاری ءَ انت،لیاری سوچگ ءَ انت ،تباه انت،اِستان ءِ سرشون گیش تباهی ءِ نیمگ ءَ بَرَگ ءَ انت ئے - ریاست ءَ لیاری ءَ گینگ جوڑ کُرتَنت -
پدا ایشان ءَ سلاه ءُ ازباب داتَنت،ریاست ءَ وتی مول ءُ مقصد ءِ واست ءَ بابا لاڈلہ ءَ سلاه ءُ اوزار دات،اِستان ءَ عُزیر بلوچ ءَ فِری هینڈ دات ،پاکستان پیپلز پارٹی ءَ عزیر بلوچ ءَ را کُمَکّ کُرت،زَر ءُ مَڈّی دات،همے رنگ ءَ ارشد پپو را هَم ریاست ءَ پَلّہ مَرزِی کُرت،بلوچ راج ءِ نسل ءِ هلاس ءُ وَلگْوج کنگ ءَ ریاست ءَ گینگ وار جوڑ کُرت اَنت، گینگ وارانی نام ءِ سرا ریاست ءَ لیاری ءِ ورناهانی جنئگ ءُکوشگ بندات کرت، ریاست ءَ هَمُک روچ ءَ لَس مَهلوک ءِ سرا آپریشن کرت پدا همے گْوشت کہ گینگوارانی سرا آپریشن کرتگ،ریاست ءَ لیاری ءِ چاگرد ءِ تہ ءَ منشیات هام کرت،پدا گینگ واراناں وت ما وت ءَمیڑینت،پدا وتی مقصد ءِ هاترا یکّ یکّ ءَ دَزگِیر کنان کُرتَنت، کوشان کُرتَنت ،لیاری ءِ هَما چاگِرد کہ اودا لبزانک ءِٹوک اَت،اودا راجی آجوئی ٹوک اَت،بلوچ راج ءُ بلوچستان ءِ بابت ءَ ٹوک اَت،هما چاگِرد ریاست ءَ مسخ کرت،مروچی اودا نہ رَاجی جُنز ءِ ٹوک بیت ناں لبزانک ءُوانگ ءِ،،،،،،،،
یک رند ءِ پد ءَ اِستان گْوستگیں جاوراں آرگ لوٹگ ءَ اَنت- اِستان لیاری ءِ جاورانی هراب کنگ ءَ اے رندی گوں نوکیں پندل سرشون آں دیم ءَ آرگ لوٹگ ءَ اِنت- وهدیکہ مردم هستیں جاوراں گوں هورتی ءَ چار ءُ ٹپاس کنت گڑا همےگندگ ءَ کیت کہ لیاری ءِ تہ ءَ پد ءَ یک ترس ءُ بیم ، کُشت ءُ کُشاری یے چاگردے ودی کنگ لوٹگ ءَ انت پرچ ءَ کہ هردیں کہ بلوچستان ءِ جاور مٹ بوهان بنت آیانی سان الم ءَ لیاری ءِ تہ ءِ نشتگیں مردمانی سرا کپ اَنت، عزیر بلوچ ءِ کیساں چہ آجو کنگ، منشیات ءَ هام کنگ، دُهمی نیمگ ءَ لیاری ءِ راجکاری ، ایش کُلیں چیزانی سرا رِیس ءُ پرّیس کن ایں گڑا همےشےباندات ءَ گندگ آیگ ءَ اَنت-
لیاری ءِ لس مهلوک ءُ نودربراناں همے گْوشگ لوٹاں پاکستان پیپلز پارٹی ءِ پندلاں ءَ چہ دَر بیا اِت ءُ پی پی پی ءِ مکر ءُفریباں بہ زانت اِت،پی پی پی شمئے
نسل کُشی ءَ کنگ ءَ انت، شمئے ورنا شمئے باندات ءِ چراگ اَنت، ورنا راجمان ءِ کریم انت ، چاگرد ءِ براه اَنت،راج ءِ سِرِین ءِ هڈ گْوشگ بنت،شمے هما چراگاں ،شمے ورناهاں ند ءِ جاه ءَ پاکستان پیپلز پارٹی ءُ ریاست بمب ءُ توپ ، کلاش دست ءَدیگ بوهگ ءَ اِنت ،شمے باندات ءِ چراگاں مَنشِیات ءِ تہ ءَبرگ بوهگ ءَ اَنت شما را گینگوارانی نام ءِ سرا کُشگ ءَ انت،گینگ وارانی نام ءِ سرا شمے نسل کُشی بوهگ ءَ اِنت،انچو کہ بلوچستان ءَ ریاست سرمچارانی نام ءِسرا بلوچ راج ءِ نسل کُشی ءَ کنگ ءَاِنت ءُ همے رنگ ءَشمے هوں نسل کشی ءَ گینگ وارانی نام ءِ سرا کنگ ءَ انت، انچو وهد انت شما را پی پی پی ءَ چے داتگ،ناں جوانیں روڈ ءِ داتگ ناں جوانیں شما پہ نادْرهجاه،، ناں جوانیں یونیورسٹی ،مرچی شما پہ ترمپ ءِآپ ءَ هَبکّہ اِت،مرچی شما را آپ پہ ورگ ءَ نیست ،هفتاد سال ءَ گیش انت کہ شمے تہ ءَ بدلی نہ ایت ،پرچ ءَ کہ شما گلام اِت ،گلام ءَ را کس بستار نہ دنت،تاریخ ءِ تہ ءَچُشیں مثال ءِ نہ رس اِیت ،قبضہ گیر ءَگلامیں راجاں دیمروئی داتہ ،زروآور هچ ایردستیں راج ءَ را دیمروئی نہ دنت،گلام ءَ را وتی جاور وت مَٹ کنگ لوٹ ایت ،شما جُنز اِت،اگاں ما رودپتر ءِ سرا چمشانک دے اَیں مارا همے گندگ ءَ کیت کجام راج ءَجُهد کرتگ آ مرچی وَشهالیں زند ءِ گْوازینگ ءَ اَنت ،شمے اے بزگی ،زِبَهرِی گلامی ءِ داد اَنت،شمے رژناهیں باندات گوں بلوچستان ءَ بندوک انت ، تاکّارحاجی رَزاق ءِ پگْر سرا کار بہ کن ات- استاد صبا صاحب ءِ داتگیں پگْر ءُ لیکہ ءِ سرا کار بہ کن ات-لالہ لعل بخش ءُیوسف نسکندی ءِ پگْر ءِ رندگیری ءَ بہ کن ات-
No comments:
Post a Comment