ہاں اڑے تؤ ایتھیسٹے جوڑ بوتگ ئے؟ اناں کمیونسٹے!

 ہاں اڑے تؤ ایتھیسٹے جوڑ بوتگ ئے؟ اناں کمیونسٹے

                                  رگام بلوچ

ما باز براں لهتے هیالانک ءُ لیکہ آنی بارا ءَ باز هبر اِشکناں یا واناں کہ پلاں مردُم اتھیسٹ یے جوڑ بوتگ، پلانی سوشلسٹ یے، بلے اے بارا ءَ یک ٹِکّیں سرپدی نہ بیت ءُ ما بکڑ بئیں ۔ ءُ اے هیالانک یا لیکہ آں ھوار کنیں پدا آیاں رد سرپد بئیں۔

جَھلا من چہ اردو نبشتانک یے ءَ همے هیالانک ءُ لیکہ بلوچی ءَ ترینّتگ اَنت اگاں شمارا ردی یے گندگ ءَ اتک گُڑا الّم راست یے کنت گوں۔

اتھیسٹ: 

ایھیسٹ ءِ گال انچیں مردُمانی واست ءَ کارمرد بیت کہ آ ھُدا ءِ هستی ءِ نہ منّوک بہ بنت ءُ هُدا ءِ هِچ جاگہ ءَ هستی ءَ چہ رزا مہ بنت ۔ اے مردُم ھِچ عقیده یا دگہ مزهبی رسم آنی منّوک نہ بنت۔

اے گال چونائیگہ یونانی گال یے کہ  " ایتھیوز " ءَ چہ زورگ بوتگ کہ بزانت اِش " هُدا ءَ ابید " اِنت۔

اگناسٹک: 

باز براں مردُم اگناسٹک ءُ اتهیسٹ ءَ هم بزانت سرپد بنت بلے راستی ءَ چُش نہ انت ۔ اگناسٹک ھما مردُماں گُشنت کہ آ ھُدا ءِ بوهگ یا نہ بوھگ ءِ سرا "من نزانی " ءِ لیکہ ءَ دارنت ۔ متلب کہ آ سرپد بنت کہ ھُدا ءِ بارا ءَ زانگ ناممکن انت ۔ 

تھیسٹ: 

تھیسٹ ھما مردُماں گُشنت کہ آ باز ھُدا ءِ منّوک بنت یا تهنّا یک یے ءِ منّوک بنت۔ اے مردُمانی منّگ اِنت کہ کازماس کس یے ءِ ساچشت اِنت ءُ اے گپ ءِ سرا سِتک کن انت کہ آ ھستی ھُدا اِنت یا ھُدا اَنت ۔

اے مردُمانی مزهبی بوهگ الّم نہ انت، اے مزھب ءِ نہ منّوک هم بوت کن اَنت۔ بوت کنت آ مزھب یے ءِ منّوک هم بہ بنت ءُ مزهبی هُکم آں پیلو بہ کن اَنت یا بوت کنت وت یک مزھب یے جوڑ بہ کن اَنت/یا بہ کنت  ءُ اے هم ممکن اِنت کہ آ مزھب آنی منّوگِر مہ بنت۔

تیھسٹ ءِ هُدا مزهبی هُدا یے هم بوت کنت ءُ بوت کنت آیاں چہ جُتا بہ بیت۔ ھرچ چیز گوں اے مردُمانی لیکہ آں کار داریت۔

ڈیئسٹ: 

ڈیئسٹ ھم ھُدا ءِ هستی ءِ منّوک بنت بلئے مزهب آنی منّوک نہ بنت۔ اشانی لیکہ اِنت کہ ھُدا ءَ اے کازماس یا دُگنیا جوڑ کُتگ ءُ رندا ابرمی کانود جوڑ کُتگ کہ دُگنیا ابرم ءِ کانود ءِ هساب ءَ گُزر بہ کنت ۔ اے مردُم ایویلیوشن ءِ منّوک بنت۔ اشانی رِد ءَ دُگنیا ءِ جوڑ کنگ ءَ پد هُدا ءَ گوں مردُماں هِچ دست ءُ داوا نیست انسان وتی تب ءَ زندگ اِنت آ وتی ھرچیز ءِ پیسلہ ءَ وت زورگ ءَ اِنت۔

پہ درور تو گُشت کنئے کہ دُگنیا چابی والا گڑی یے کہ چالو کنگ بوتگ وت ٹِک ٹِک کنگ ءَ اِنت ۔

ڈیئسٹ کازماس ءَ ابرمی تک ءَ چارنت ءُ ابرم ءِ کانودانی سرا سِتک دارنت۔ اے مردُم ھُدا ءِ منّوک اَنت بلے انگت باز مردُم اِشاں هُدا نہ منّوک سرپد بنت۔

لِبرَل: 

مزھبی ھساب ءَ لِبرَل هما مردُم گُشگ بنت کہ آ کُھنّیں پوتینک یا گپّانی سرا بروسہ نہ کن اَنت ءُ هروهد وهد ءِ گاماں روَگ لوٹنت۔ اے مردُم نوکی ءُ مٹ بوهگ ءِ منّوک اَنت ۔ اشانی واست ءَ ربیدگ، کُهنّیں رسم، کُهنّیں زنداب یا هرچیز کہ گوَست ءَ گوں سیادی داریت ارزشت ندنت۔

اے مردُم مزھبی، سیاسی، چاگردی تک آں هوار اَنت ۔ اے مردُم دومی مردُم ءِ لیکہ آنی گوشداروک بنت، آیانی شرپ دیئوک بنت۔

بُنپرست / فنڈیمنٹلسٹ

بُن پرست یا فنڈیمنٹلسٹ گیشیں وھد ءَ مزھبی مردُم گُشگ بنت۔ بلئے گال ءِ بزانت ءِ هساب ءَ هرچ تک ءِ مردُمانی واست ءَ کارمرد بوت کنت ۔ اے انچیں مردُم بنت کہ وتی لیکہ یا وتی هیالانک ءَ گوں بندوکیں هرچیزّ ءَ راست سرپد بنت ءُ آیانی سرا کار کنوک بنت ۔ اے مردُم مٹ بوھگ ءِ یا بدلی آرگ ءِ هّک ءَ نہ بنت اشانی رد ءَ هرچیز هست بس هما چیز اَنت آ مٹ ءُ بدل کنگ مہ بنت ۔

وھد ءُ جاورانی همرایی ءَ وتی عقیده، هیالانک ءُ کانودانی تہ بدلی آنی هلاپ بنت ءُ هروهد بُن هِشت ءِ سرا سِتک دارَنت۔

مارکسسٹ: 

مرکسسٹ ھما مردُم گُشک بنت کہ آ جرمن پلاسپر، ایکونومِسٹ ءُ چاگردزانت کارل مارکس ءِ هیالانک ءِ منّوک بنت۔

اشانی دل ءَ ایکونومی هرچ چیز ءِ بُن اِنت ءُ تیوگیں چاگرد همیشی ءِ گِرد چکرّیت۔ اے انسان ءِ جُهد ءُ آئی ءِ مُّذ ءَ سائنسی راهبند ءَ گوں چارنت۔ کیفیٹلزم ءَ بربادی سرپد بنت ءُ آئی هتم کنگ ءِ واست ءَ آشوب آرگ ءِ منّوک بنت ۔

پریگمیٹک: 

پریگمیٹک ھما مردُم گُشگ بنت کہ ھیالانک ءُ لیکہ آں ھما وھد من اَنت کہ آیانی سرا کار کنگ بہ بیت یا چم دیدیں آسر یے بہ بیت اش۔

اشاں تو آسر دوست ھم گُشت کنئے کہ اے تھنّا گپ ءُ هیالانی سرا سِتک نکن انَت بلکیں کار لوٹنت۔

اے زرُمبشت 1870 ءَ ماں امریکہ بندات بوتگ اشانی رد ءَ هیالانک ءُ لیکہ آنی سرا کار کنگ بہ بیت ءُ اگاں اے کار سوبمند بوتاں گُڑا آ کبول کنگ بہ بنت۔

سیکولر: 

سیکولر ءِ متلب هما مردُم کہ آئی ءَ مزهب ءُ روحانیت ءَ گوں هِچ سیادی مہ بیت ۔ سیکولرزم گیشتر هما مُلک آنی تہ ءَ بیت کہ آؤدا جمہوریتی گورنمنٹ بیت ۔ اشانی رِد ءَ مُلکی کانود گوں انسان ءِ گوَست ءِ تجرُبگ ءُ زلورتانی هساب ءَ جوڑ کنگ بہ بنت ۔

سیکولر مزھبانی بدواه نہ اَنت بلئے تو آیاں بے مزهب گُشت کنئے۔