 |
| اکس: ھمل سالار |
کس نزانت پیریں بلُّک پرچے ءَ نشتگ ءُ ملور اِنت ءُ پیریں ناکو ءِ دست ءِ لٹّ کُج ءَ گار ءُ بیگواہ اِنت۔ گْوھار ءِ گیرت ءُ ننگ ءِ رکّینوک پد ءَ ھُلوچ کُتگ رستراں۔ بْراتانی کوپگ کَے ءَ نزور کُتگ۔ تھارونکی ءَ چپّ ءُ چاگرد وتی اندر ءَ مان پوشتگ۔ سرجمیں میتگ ءُ بازار ابیتک اَنت۔ ھما میتگ ءُ بازار کہ ورناھاں لیب ءُ گْوازی، وتی کسانی تیلانک داتگ ءُ ورناہ بوتگ اَنت۔ ورناھی ءِ رسگ ءَ انچوش گُمان بوتگ کہ اِے ورناھی پہ ایشاں یک گناھے بوتگ۔ ورناھی ءِ تہ ءَ بیچارگ چہ لوگ ءَ وتی گِسر کپت اَنت ءُ انچیں جاہ یے شُت اَنت کہ اود ءَ ھچ زند ءِ آسراتی پہ ایشاں نیست۔ پہ کئی ھاتر ءَ اِے دُور رپتگ ءُ گار ءُ بیگواہ اَنت۔ پہ کئی ھاتر ءَ ایشاں کپن بستگ سر ءَ ۔ ھو۔۔۔۔۔۔ ھو۔۔۔۔۔
یک انچیں وھدے اتکگ کہ گریب تباہ دی۔۔۔۔ گریب تباہ دی ءُ گریب تباہ دی۔ کُجام کُجام جیڑھاں من دیم ءَ بیاراں۔ بلے مروچی من گُنگ نہ باں، کَرّ نہ باں۔ بس اِنت انچو بزّگی واری۔ سبر ءُ اوپار ءَ جواب دات۔ نوں لوٹاں کہ دْرشان بہ کناں تیوگیں دل ءِ زندان ءِ تہ ءَ بندوکیں درد ءُ گماں کہ کرن ءِ بیت سر ریچ بُوان اَنت۔
اولی جیڑہ :
بلوچستان ءِ دریا ءُ چائنیز ٹرالر
مئے مکران ءِ تہ ءَ دریائی جیڑہ وَ سک باز اَنت۔ انچوشکہ ڈیزل ماپیا۔ گُجّو ءُ ٹرالر، ماھیگانی نسل کُشی۔ چہ کرن ءَ گجّو ءُ ٹرالر مئے دریا ءِ ماھیگانی نسل کُشی کنگ ءَ اَنت۔ دریا انچیں بلاھیں دادے کہ گپ نہ بیت۔ گیشتر گریب ءِ لاپ ھمے دریا اِنت۔ دریا ورد دریا کن اَنت ءُ چیزُکے ایشاں رس ایت ءُ چُکّانی لاپ ءَ کشّ اَنت۔ نوں بیا کہ گُجّو ءُ ٹرالر، ڈیزل ماپیا ایشانی رھزنی مئے دریا ھلاس کُت۔ دریا ءِ چیر ءَ ماھیگانی ردوم ءُ وردن تیوگیں ساپ ءُ لسّ کنگ بوگ ءَ اَنت گڑا چہ کُج ءَ اِے ماھیگ رُد اَنت ءُ ھیک کن اَنت؟ ءُ نسل گیش بیت اشانی۔ نوں وَ اشاں بِل۔ سرکار ءُ ادارگاں باریں چینچو چائنیز میلاں (آپی گُراب) پرمِٹ داتگ کہ اِد ءَ بیا اِت ءُ رُپت ءُ روپ بہ کن اِت ءُ بلوچانی مال ءُ مڈّی کہ گیشتر ھمے دریا اِنت ایشی ءَ ولگوج کن اِت ءُ بر اِت۔ یک زانتکارے ءِ گپ ءِ پرمان ءَ آ گْوش ایت کہ مئے دریا ورد سے سال ءَ دریا بہ کنت ءُ ماھیگ بہ گِر اَنت اِے بلاھیں میل (لانچ ) سے روچ ءِ تہ ءَ ھمنچو ماھیگ گِر اَنت۔ نوں وت کساس کن چنچو مئے بلوچستان ءِ تیوگیں دریا ورداں تاوان بوگ اِنت۔
دومی جیڑہ
آپ ءِ جیڑہ
انچوشکہ سرجمیں پاکستان زانت بلوچستان ءِ مزنیں جیڑہ یکّے اِش اِنت کہ اِد ءَ پہ مھلوکانی ورگ ءِ ھاتر ءَ آپ نیست۔ مردُم بزّگ ءُ لاچار اَنت۔ ھر چاریں نیمگ ءَ زالبولاں دیز سر ءَ اَنت ءُ رھادگ اَنت آپ ءِ شوھاز ءَ۔ ایشانی جیڑہ مُدام پیسبک، وٹس ایپ ءُ آ دگہ سوشل میڈیا ءَ شنگ بوتگ اَنت بلے انگہ ھچ مردُم تلوس اَنت ، گْونڈواں بوتل گون اَنت ءُ لوگ پہ لوگ ءَ پٹّے آپ ءَ گلودگ اَنت۔ پٹّ بات اِے ایشاں۔
سیمی جیڑہ
لین
لین انّوں یک بلاھیں جیڑھے۔ مُدام لین برگ ءُ آرگ بنت ءُ مھلوک گرم ءَ بزّگ اَنت ءُ ایشانی گوش ءَ مورے ھم نہ وارت۔ مُدام لین ءِ جیڑہ دیم ءَ کیت مناپکیں واپڈہ والا گْوش ایت کہ چہ ایران ءَ لین ھراب اَنت۔ ایران ءِ واپڈہ والایے گْوشت کہ چہ مئے گْور ءَ لین نہ رو اَنت۔ اِے پاکستانی واپڈہ والا آنی ھنر ءُ مکر اَنت۔ اِے نوں کُج ءَ سرپد بنت۔
چارمی جیڑہ
بے روزگاری
ھر کس سرپد اِنت ءُ زانت کہ مئے ھند ءُ دمَگ ءَ بے روزگاری روچ پہ روچ گیشتر بُوان اِنت۔ بے روزگاری ءَ ھر لوگ ءِ کارمستر سرین پْروش کُتگ۔ دکاندار، ماھیگِر، بٹّ گراد ءُ آ دگہ سک ابیتک ءُ دلگران اَنت ءُ زنگ ءَ جنَگ ءَ اَنت۔
پنچمی جیڑہ
نادراھی ءُ دوا درمان ءِ جیڑہ
انّوں تیوگیں بلوچستان ءَ تپے کپتگ۔ اِے تپ ءَ مردُم بزّگ ءُ وار کُتگ۔ اِد ءَ نادراھی ءَ چست بوتگ ءُ بلے آسراتی ھچ نیست۔ گریب ءُ لاچاریں مردمانی گْور ءَ انچو زرّ کُج اِنت کہ آ دوا ءُ درمان بہ گِر ایت۔ یک دوایے ءِ نھاد اتکگ ءُ 150 گیش سر اِنت ءُ لھتیں گولیانی نھاد وَ 500 ءَ برز اِنت۔ ھدا وت اِے نادراھیاں ھلاس بہ کنت۔ مئے گور ءَ شرّیں ڈاکتر نیست کہ پہ الاج ءَ گریبانی ساڑی بہ بنت۔
No comments:
Post a Comment