تیاب دپی کلچر ءَ کُٹھمی برتری ءِ بدیں دروشم

نبشتہ کار: جاوید بلوچ

طبقاتی نظام برحال یک سِلّ  ءُ بدیں نظامے۔ اے چاگرد ءِ تہ ءَ یک لکیرے کشیت، وتی مفاداتانی واستا چاگرد ءِ کَمکُیں زردار یک نیمگے بنت  ءُ آ دگہ دراھیں مردم یک نیمگے۔ اشیی ءِ سر ءَ باز بحث بوت کنت بلے مئے تیاب دپی دمگاں اے نظام گوں نوکیں جاگیرداری رنگے ءَ دیم ءَ اتکگ، اشیی ءِ تہ ءَ جاگیر وَ نیست بلے مفاداتانی سیادی، زردارانی وتی سرکل، گوں زردار ءَ وتی سیادی جوڑ کنگ ءِ ٹرینڈ  ءُ جھل ءِ طبقہ بزاں پوریاگر ءَ تھنا کارمرز کنگ، آئی ءِ لیکہ ءَ ارزشت نہ دیگ  ءُ آئی ءَ را جَٹ  ءُ پھوال  ءُ وت ءَ زانتکار سرپد بوھگ ءِ وسریں درورے گندگ ءَ کیت۔

مئے تیاب دپی کلچر ءِ زیباھی یکے ھمیش بوتگ کہ ادا لھتیں سال پیسر ھمساھگ ءَ اے نزانتگ منی ھمساھگ  ءِ کُٹھم چی انت؟ کس  ءَ اشیی ءِ زلورت نہ اَت۔ پمشکہ چُشیں بلاھیں پرک ءُ پیرے گندگ ءَ نیتک کہ کسے ءَ اے زلورت پیش بہ کپیت وتی نام ءِ دیم ءَ ناں ایوک اشیی ءَ نبشتہ بہ کنت بلکیں پد ءَ وتی کُٹھم ءِ ٹیکھدار بہ بیت، وتی کُٹھم ءِ ھر زردار ءَ وتی نزیک تریں مردم بہ کنت  ءُ آئی ءِ ذاتی کاروبار، سیاسی مفاد ءُ چاگردی پی آر او جوڑ بہ بیت۔

بلے مشرف ءِ دھر ءَ گْوادر ءَ زمینانی سودا ءِ مارکیٹ گرم بوت۔ گْوادر ءِ کش ءُ کراں ریک ءُ پٹ، ھُشک ءُ کَلَریں زمین  ءُ ڈگار کروڈاں بھا بوت آں، کش ءُ گور ءِ دمگانی مردماں چہ آیانی زمین پچ گِرگ  ءُ بھا کنگ بوت آں (پچگرگ پمشکہ کہ وت سیاسی سروک ھم اسٹیٹ ایجنسیاں نشتگ اِتاں  ءُ زمینانی سودا کنگ ءَ اِت آں) کش ءُ گور ءِ مردمانی کرّ ءَ زر اتک، آ سیر بوت آں گڑا آیاں گْوادر شھر ءِ نیم ءَ مائیگریٹ کُت، شھر ءِ جند آیاں دوست بوت بلے شھر ءِ اکثریتی مردم چُشکہ چہ آیاں غریبتر اِتاں، روچ ءُ شپ دریاوردی ءِ گرانیں کار ءَ گوں بزگ اِتاں گڑا اے زر داراں وت ءَ اولسر ءَ بلوچ گُشت ءُ اے میدُک۔ 

چہ ھمد ءَ اے بدیں طبقاتی نظام تیاب دپی دمگاں اتک ءُ گَرک بوت۔ پد ءَ مشرف ءِ دھر ءَ گْوادر ءَ جی ڈی اے، نیو ٹاؤن  ءُ گْوادر پورٹ ءِ وڑیں سرکاری پروجیکٹ اتکاں، اشانی نوکری  ءُ پوسٹانی جار بوت۔ چُشکہ گْوادر پارلیمنٹی سیاست، وانگ ءُ زانگ ءُ شفارش ءِ تک ءَ پُشت ءَ اَت۔ مکُران ءِ آ دگہ دمگانی مردم پارلیمنٹی سیاست، بیورکریسی  ءُ سفارش ءَ دیم ءَ اِتاں پمشکہ ادا پوسٹانی سر ءَ ھما اتک انت۔ ادا نشتگیں زمین بھا کنوک سیر اِتاں، سرکاری دپترانی توک ءَ سائب، بینکانی منیجر ءُ کیشیئر ڈنی بلوچ اِتاں۔ زر داریں زمین بھا کنوک کہ بینک  ءَ اتک کُرسی  ءِ سر ءَ نادینگ بوت، آپ ءُ چاہ کنگ بوت بلے لس گْوادری لئین  ءَ اوشتارینگ بوت۔ ھر دپتر ءَ لس گْوادری چو اچھوت ءَ بوت۔ 

اے جاورانی نپ لھتیں چالاکیں مردماں چست کُت۔ آیاں گْوادری  ءُ کیچ، گْوادری  ءُ ڈنی  ءِ نام ءَ سیاست کُت۔ ھمے ادارگانی توک ءَ پہ وت ءَ پوسٹ گپت  ءُ ھاموش بوت آں۔ 

نی گْوادر ءُ دو طبقاھانی تہ ءَ بھر اَت یکے زمین بھا کُتگیں سیٹ ءُ سرکاری سفارشی مردم، دومی لس گْوادری بلوچ بزاں میدُک۔ سیریں مردمانی تہ ءَ لھتینانی زر کمتر بوت آں گڑا اشانی تہ ءَ دگہ طبقاتی پرکے پیداگ بوت۔ اے پرک ءَ نی کُٹھمی رنگ زُرت۔ کسے ءَ وت ءَ چہ لس گْوادریاں جُتا کنگ ءِ واستہ شئے گُشت، کسے ءَ کلمتی، ھمے وڑ ءَ لھتیانی وتی انٹروڈکشن  ءِ واستہ اے المی سمجھ اِت کہ بُگشیت من سھرابی فیملی یا آسکانی فیملی ءَ گوں سیادی داراں، یا ھوت  ءُ زینوزئی آں، دانکہ لھتیناں وتی اسٹیٹ ایجنسیانی دیم  ءَ گوں پھر  ءُ شان نبشتہ کُت ریکانی، گورگیج  ءُ جدگال  ءُ دگہ باریں چی چی۔۔۔

اے ھمے دھر انت کہ بلوچستان  ءَ کُشگ ءُ چگل دیگ ءِ سرکاری پالیسی جاری انت۔ کَش ءُ گور ءِ بازیں دمگاں مردم چہ فوجی آپریشناں لڈ اِت  ءُ گوادر ءَ اتک آں، بازیں پیسر ءَ ھار ءَ تاچینتگ اِتاں۔ اشاں ھم وت ءَ چہ لس گْوادریاں جُتا کنگ ءِ واستا دشتی، کلاچی ءُ مندی کُت دانکہ کسے آیاں گْوادری مہ گُشیت ، لبز گْوادری اشانی کرّ ءَ مید بزاں لگوری ءِ نشانی اَت۔ ھما راھشون کہ اے پرک ءُ پیر ءِ بگیری ءَ اِتاں آ بیگواہ کنگ، جنگ ءُ کُشگ بوت آں۔ نی پشکپتگیں مردم یا وَ جھل ءِ طبقہ اکثریتی بزگ ءُ بیوسیں بلوچ اِتاں کہ اشاں بلوچ کم میدُک  ءُ گْوادری گیشتر گُشگ بوت دومی نیم ءَ سرکاری سفارشی مردم، اسٹیٹ ایجنسی والا زمین زورک یا بھا کنوک۔ شھر ءِ سیاست ءَ بگر داں ھر وڑیں مفاداں ھمے ھوار اِتاں۔۔۔۔۔

میان ءَ دراجیں وھدے گوست، زمینانی زر ھلاس بوت آں۔ پد ءَ ھمے سیریں مردم واتر وتی پیشی جاگہ  ءَ اتک آں، گراؤنڈ ءَ بلوچ ءِ سیاست دوار کمو ساہ کشگ ءَ لگ اِت۔ گڑا تیل ءِ کاروبار زور ءَ بوت۔ اے کار ءَ نی پدا ڈاکٹر ماہ رنگ  ءُ سمّی ءِ اسٹیٹس جنوک یا بلوچ نبشتہ ایں ماسک ءِ تہ  ءَ یک دگہ کُٹھمی ٹیکھدارے پیداگ کُتگ، تیاب دپی دمگاں پد ءَ یک سلّیں طبقاتی لکیرے ودی بوتگ۔ یک نیمگے لس پوریاگر، ڈرائیور  ءُ بلوچ آں۔ دومی نیمگ ءَ مافیا انت۔ پوریاگر اگاں شھزادگے، کلمتی یے، ھوتے یا رئیسے یا دگہ۔۔۔۔۔ آ ذی پسانی چارینگ ءَ ، جانشوئی  ءُ دار ءِ گُڈگ ءَ بزگ بوتگ مرچی بار ءِ کشگ، ڈرائیوری  ءُ ڈیزل  ءِ چُنسگ ءَ ھزاب انت بلے مافیا اے طبقہ  ءِ اسل نامی گرامی واجہ انت، آئی ءِ بابت ءَ گپ کنگ بزاں آئی  ءِ کُٹھم  ءِ توہین کنگ انت۔۔۔۔۔ اے کُٹھمی برتری رُژناہ پگرے ورنایاں سیٹھک بوھگ ءِ واب پیش دارگ ءَ اِنت، آیاں چہ تیاب دپی کلچر، لبزانک، ابرم، سما  ءُ سنچ ءَ دور برگ ءَ اِنت تھنا کاٹن، موبائل  ءُ کُٹھمی وت پرستی  ءِ تالبان جوڑ کنگ ءَ اِنت۔۔۔۔