انیتہ جلیلءَ چی کُتگ؟
گوادر ءِ توار
گوستگیں روچءَ گوادرءَ جم بوتگیں یک مراگشےءَ کہ پاکستانءِ مزن وزیر اتکگ ات۔ انیتہ جلیلءَ مراگشءِ جار چینےءِ زمہ واری گون ات آں۔ ءُ انیتہءَ ھمے زمہ واری وتی منّاں انچُش ادا کُت کہ آئیءَ کنگی ات۔ اے جار چینےءِ یک تامُرءِ سوشل میڈیاءَ سک وائرل بوت کہ آئیءِ تہءَ انیتہ گُشگءَ انت کہ گوادر ھرچ دیمرئیءِ بوتگ آئیءِ چمانی دیمءَ بوتگ ءُ ھمے دیمرئیءِ سبب انت کہ آ مرچی ادا چار چینی کنگءَ انت۔
انیتہ جلیل یک ریڈیو مہماندارے، ازمکارے ءُ وی لاگرے۔ ابید اشییءَ آ وائس آف بلوچستان نامیں گلےءِ ھوار کار کنگءَ اِنت کہ اے گلّءَ بلوچستان سرکار زر ءُ مالی کمک کنگءَ انت ءُ بلوچستانءِ ھما دروشمءَ پیشدارگ اے گلّءِ کار انت کہ آئیءَ را "مثبت رپورٹنگ" گُش انت۔
انیتہ جلیلءَ ھچ بر قوم پرستی ءِ جار نہ جتگ، یکے ءُ دومی اے مراگشءِ اسکرپٹ باریں چنچو روچ پیسر نبشتہ کنگ بوتگ کہ آئیءَ ھر وڑءَ وانگی بوتگ۔
انیتہءِ سرا تنقید کنوک دو، سے وڑیں مردماں کہ اشانی تہءَ لہتیں ھما سادگیں بلوچاں کہ انیتہءِ بلوچی پوشاک ءُ دروشمءَ گِند انت ءُ وسرا ھمے واھگءَ دار انت کہ انیتہ آہانی واھگانی ترجمانیءَ بکنت۔ انیتہءَ وَ ھچ بر گچین کاریءَ بھر نہ زُرتگ کہ منءَ ووٹ بہ دئے من بیگوائیں بلوچاں آجو کناں کار آں، یا من گوادرءَ لئین، آپ، وانگءِ آسراتی ءُ شیر ءُ بینگءِ کور ءُ جُوہاں یل کناں۔۔۔۔۔
بلئے ھئیر اے سادگیں مردم انگت اوپار کنگ بنت۔ بلئے دگہ یک ٹولی یے ھما کامریڈ یا ھما مردمانیگ انت کہ وھدے آہاں چو مینا مجید، بشری رند ءُ لیاقت شاہوانی ءِ کدّءَ مزنیں جاگہاں توسیپ کنگءَ کس پہ باڑہءِ سرا نہ داریت گڑا آ وتی میتگ، شھر ءُ دمگانی کھدہ، میر، واجہ کارُک، لینڈ مافیا ءُ ڈرگ مافیا ءُ ھما مردمانی توسیپاں کن آں کہ انیتہءَ ڈارک ھماہانی واجہانی توسیپ کُتگ۔ اگاں پہ یک جوڑی یے کاٹن، موبائلءِ کارڈے یا پہ یک شپے شالءَ ایم پی اے ہاسٹلءَ وپسگءَ توسیپ کنگ ھلار انت گڑا پہ پنجاہ ہزارءِ چیکےءَ پرچہ ھرام؟۔۔۔۔۔۔
ھمے ٹولی وتی کسان کسانُکیں واجہ کارانی توسیپ کنگءَ نودربر سیاست، بودناکی ءُ ایکٹویزم ءِ نام دات کن انت گڑا یک ازم کارےءَ اگاں پہ زر یک اسکرپٹے دئیگ بیت ءُ آئیءَ وانیت۔۔۔۔ آ ھم ایوک یک ءُ کلاکءِ واستہ (ناں تاکہ دیمءِ گچین کاریءَ) اشییءِ تہءَ ھرابی چی انت؟
شالءَ ھمے کامریڈُک کہ ھر وڑیں بلکیں وڑ وڑیں سرکاری ءُ ادارگانی نیمءَ برجم داشتگیں سیمینار، اکس کشی مراگش، بلوچ ورناہانی پُر ایمنیں (قومی دھارے میں شمولیت) مراگشانی نامءَ بھر زورگ، سرٹیفکٹ دزگرگ ءُ سریناءَ ورگءَ کزاہ نہ کن انت۔۔۔۔ اگاں آہاں ھمے موہ بہ رسیت آ اشییءَ یل دئینت؟
انیتہءَ کہ اے مراگشءَ مہمانداریءِ زمہ واری پیلو کُتگ انت اے وڑیں مراگش داں کم چہ کم مشرفءِ دہرءَ بوھگ ءُ پیداگ انت ءُ ھمے مراگشانی تہءَ مئے ءُ شمئے فرزند، واجہ، ہر دل عزیزاں ھم زیءَ تک نشتگ ءُ چاپ جتگ۔۔۔۔۔ مرچی انیتہءِ فرزند، ھر دل عزیزانی باریگ اتکگ آئیءَ توسیپ کُتگ۔۔۔۔ بس ادا تپاوت ھمیش انت انیتہءِ جاگہ ءُ موقع مستر بوتگ ءُ مئے وڑیں لہتیں مردم انگت پہ ھمے جاگہءِ واستہ struggling کنگءَ انت۔۔۔۔۔
انیتہ جلیلءَ چی کُتگ؟ فخر پاکستان، فرزندءِ پاکستا ءُ ھر دل عزیز ءِ دیمءَ توسیپ بس۔۔۔۔
گُڈ سرا بس ھمے کہ ھرکسی روزیگءِ دئیوک ربّءِ پاک انت۔ باھد کس کسّی سرا بش بش مہ وارت۔۔۔۔ شُمئے باریگ اوں بگندئے بئیت۔۔۔۔۔ جزاک اللہ۔😍
No comments:
Post a Comment