وانندئیں بلوچ جنین ءُ پندل سازی

وانندئیں بلوچ جنین ءُ پندل سازی

رگام بلوچ

  ادا چالاک ءُ سلّیں مردماں بزگر ءُ سادئیں مردُم هروهد وتی پندلاں چہ کارمرز کُتگ اَنت ءُ وتی زاتی سیت ءُ نپ گپتگ اَنت ـ

همے وڑا انوگیں دُگنیا ءَ لهتے انچیں پندل سازی ءِ رپک ءُ داب کارمرز کنگ بوهگ اِنت کہ سر پر اوں نہ بیت، تبزانتی ءُ چالاکی آنی تندانی تہ ءَ باز  مردُم امینکدر پس اِتگ کہ آیانی درآیگ ءُ وت ءَ دوبر گیگ کنگ سک گِرانیں کارے سماه بیت۔

شما سرپد ات کہ اے ٹیکنیکل اھد ءَ سائنس، آرٹ، تبزانتی ءَ امینچو دیمروی کُتگ کہ انٹرنیٹ ءِ پُشت ءَ لس مردُم ءِ سرا هاکِمی کنگ بوهگ ءَ انت، اے کارانی تہ زمہ واریں مردمانی وتی وتی نپ هست اَنت ۔ بلوچستان کہ دگنیا ءِ سکّیں پدمتگیں بهرے، ادا بن هِشت ءَ چہ مردم ھاکمی ءِ چادر ءِ چیر ءَ چیر ترّینگ بوتگ اَنت، گژن، بزّگی،کُشت ءُ کوش ، تُرس ءُ بے وسی تہ ءَ زندگی کنوکیں اِدے مردُم نپسیاتی رنگ ءَ هم نِزور کنگ بوتگ اَنت ۔ 

زوراکاں هرچ رنگ ءَ اِدءِ مردُم نِزور کنگی بوتگ اَنت ءُ آیاں مزنیں مزنیں پندلانی تہ ءَ پسیّنگ ءِ کوشست بوتگ ءُ مئے ناسرپدی ءُ کم علمی کہ ما آ پندلانی تہ ءَ امینچو پس اِتگ ایں کہ کسے ءَ اے چیز هال دیئگ هم بہ بیت آ باور نہ کنت! 

جنین ھرچ زمانگ ءَ مردین واجهی نزام ءِ چیرا باز رنگ ءَ کارمرز بوتگ اَنت، لهتے آں آ پہ وتی وپت ءُ وابی زلورتانی واستہ کارمرز کُتگ انت، لھتے ءَ پہ سیاسی رنگ ءَ ءُ باز جاگہ ءَ مزهبی رنگ ءَ ۔ اے کار زوراوری، نپسیاتی، ھمدردی ءُ چالاکی ءِ چادر ءَ چہ کنگ بوتگ اَنت، انگریز هاکمی ءِ دور ءَ هندوستان ءَ همے رنگ ءَ جنین نپسیاتی شکل ءَ نِزور کنگ بنت، آیانی تہ ءَ جهالت در کنگ ءِ نام ءَ گیش جاهلی ءِ تہ ءَ دور دیئگ بنت کہ هندوستان ءِ جنین آؤکیں دور ءَ مئے ھاکمی ءِ ھلاپ ءَ سردرد یے جوڑ مہ بنت ۔

مرچی ھمے رنگ ءَ پاکستانی فیمنِسٹ سیاسی ءُ لبرلزم ءِ نام ءَ کارمرز بوهگ ءَ اَنت داں مُلک ءِ تہ ءَ جنین ءُ مردینی جنگ بہ بیت ءُ اِشانی پُشت ءَ وتی وتی نپ کشگ بہ بنت ۔ نو زائریں کہ ھرچ پِڑ ءَ گوں بندوکیں مردُمانی تہ ءَ بزنس مین، لس مردُم، ڈاکٹر، گُشنده، تامرساز درُست گوں وت ما وتی جنگ ءَ دلگوش بنت، پُشت ءَ سیاست دان ءُ مستریں زوراک چے چے کناں آیاں چہ گھتر کس نزانت ۔

بلوچستان ھم مرچاں ھمے وڑا نپسیاتی ھاکمی ءِ گِر ءُ چیّلاں کپان اِنت، اِدا بزگّیں بلوچ مردین گوں بیچارگیں بلوچ جنین ءَ میڈینگ بوهگ ءَ اِنت داں مردُم وتی لوگی جیڑهاں ابید ھرچیز ءَ بیهال بہ بنت۔ من اے منّاں کہ بلوچ جنین گلام اَنت ءُ آئی ءِ سوَب مئے مرُدمانی نابزانتی اِنت، ناوانندگیں دکهان چے زانت کہ منی جنک ءَ وانگ ءِ، سور ءِ ءُ وتی شر ءُ هراب ءِ پیسلہ کنگ ءِ هک هستاں ۔ ناوانندگیں بلوچ مزدور یے چے زانت کہ آئی ءِ جنین ءَ هک هست، اِشانی سوج دیئوک ناوانندئیں پِت ءُ پیروک اَنت کہ ھمے نزام ءَ نِزور کُتگ اَنت گوں ۔ وتی ھکّاں چہ نابزانت بوھوک مشکل کہ وتی جنک ایں چُک ءِ هَک ءَ بزانت پدا یک انچیں زمانگ یے ءَ کہ مزھبی رسم ءُ سیاسی ٹِکٹکس آنی بار لس مردُم ءِ سرا بہ بیت ۔

بلوچانی تہ ءَ فیمَنزم ءَ من وش اتک کناں من زاناں کہ مئے جنین گُلام انت، ما آیانی ھک وارتگ انت، آ تهنّا کارزَدی شکل ءَ چارتگ اَنت، بلئے شمارا هم اے پندل سرپد بوهگ لوٹاں، اِشاں چہ وت ءَ رکّینگ لوٹیت۔ مرچی روڑ ءُ آسراتی ءِ نام ءَ آزاتیں بلوچ جِنک شش شش ( این، جی، اوز) آنی باسک انت، آیانی پندلانی تہ ءَ کپتگ اَنت ءُ جتائیں رنگ یے ءَ کارمرز بوهگ ءَ اَنت، آیانی تہ ءَ چہ سیاسی سِنچ کشگ ءُ لس مردمانی سرپ ءَ هوار کنگ بوهگ ءَ اَنت داں آ شرّیں سیاست دان ءُ رهشون بوت مہ کن انت، سیاست ءِ تہ ءَ بهر زُرت مہ کن انت، وتی اسلی جیڑھ ءَ سرپد بوت مہ کن انت ۔

شمئے لوٹ، روانک ءُ کار ءِ تریک ءَ چہ من ءَ هِچ جیڑھ نیست بلئے یات بدار اِت، وت ءَ شیوار بہ کنئے کہ کئے شمارا کارمرز کنگ ءَ اِنت، کئے مزنیں مزنیں مراگش اڑ دیئگ ءَ اِنت ءُ جنین گلامی ءِ جیڑھ ءَ شمئے مستریں جیڑھ لیکگ ءَ اِنت، هما روچ ءَ شما اے گپ من اِت کہ شمئے مستریں جیڑھ "جنین گلامی" انت گُڑا بہ زان کہ شما پندلانی تہ ءَ بے کار پس اِتگ ئے، پدا نا شمارا اے زِمین ءِ هاتر ءَ رتکگیں هون دیم ءَ کاینت ءُ  نہکہ بانڑی، گوهر ءُ بانُک کریمہ ءِ شیرزالی مان کئیت ۔

پدا بلوچ راجدپتر شمارا تھنا وتپرستیں، کارمرز بوتگیں ءُ بے اگلیں جنین ءِ نام ءَ یات داریت ۔