ممتازءَ چی ءِ کمک لوٹیت!

 ممتازءَ چی ءِ کمک لوٹیت۔۔۔۔۔۔

جاوید بلوچ                      

بلوچ ءُ بلوچستانءِ ھردیں گپ بیت گڑا دو اکس دیمءَ کئیت۔ اولی شُد، گژن، بزگی، پدمنتگی ءُ ڈالچاری ءُ دومی گنجیں زِر، سھر ءُ گیس ءُ دگہ بازیں معدنی دروسیلہ ۔۔۔۔

مرچاں شُد ءُ بزگی ءِ ھمرائیءَ سوشل میڈیا ءَ پچ کن ئے گڑا شومکءِ وڑیں نادرائیاں گورجتگیں بلوچانی اکس ءُ کمکی جار۔۔۔۔۔

اے کمکی جارانی تہءَ بازیں جُست چیر تر انت کہ اشانی زمہ واریءَ کئی گردنءَ بہ دئیں؟ کےءَ دیمءَ بیار انت ءُ جُست بگر انت کہ بلوچ ءِ جاور چُش انت پرچا؟ بلکیں برے برے اوپار ھم نہ رؤت کہ مردم اے جُستءَ بہ کنت کہ داں کد پہ اے راجءَ انچش کمک ءِ ھاترءَ دست دراج کنگ بیت۔۔۔۔ بلئے ھؤ! مئے ورناہاں اگاں (ھما ورنا کہ اے جاوراں رک اتگ۔۔۔ بزاں یا و برگ نہ بوتگ، یا شومکءِ وڑیں دگہ نادرائیءَ گور نہ جتگ، یا پہ باڑہ ءِ سرا دارگ نہ بوتگ کہ میتگءِ یک نشہ بھا کنوک، دُز ءُ ڈنگ یا سردار، میر ءُ واجہ کارےءِ کاردار ءُ توسیپ کنوک نہ انت) آئیءَ وانگی انت، وتءَ زندگ دارگی انت ءُ بلوچے بوھگی انت۔ اے کار سک گران و نہ انت بلئے ھؤ چُش پہ گُشَگ ارزان ھم نہ انت۔۔۔۔

بلئے ھئیر اے سرھال ھم یک کمکی جارے ءِ بابتءَ انت۔۔۔ اے جار یک بلوچ نودربرےءِ وانگءَ پہ کمکی جارے۔ ءُ اے جار یک دگہ گلّے یا نوک رواج گپتگیں لبز سوشل ایکٹویسٹانی گروپےءِ نیمءَ چہ دئیگ نہ بوھگءَ انت بلکیں ھمے نودربر ءِ جندئے نیمءَ چہ دئیگ بوھگءَ انت کہ آ وانگ لوٹیت۔ ءُ پہ وانگءَ آئیءَ داکلہ، آئیءِ یونیورسٹی ءُ وانگءِ ھرچءِ درستیں کار گیشتگ آں بلئے نی کار اوشتاتگ آں پہ اودءِ نندگءُ جاگہءِ ھرچءَ۔۔۔۔۔

اے نودربر ممتاز ساجدی انت۔ ممتازءَ مرچی باز روچ انت کہ آن لائن کمکءِ جار ئے جتگ۔۔۔۔ ءُ مرچی آئیءَ پدا وتی یک ٹوئیٹے ءِ تہءَ لہتیں نامی ایں واجہ کار ٹیگ کتگ انت۔ امیت و گیشتر ھمیش انت کہ آہانی نیمءَ چہ ھچ کمک نئیت ۔۔۔  چیاکہ اگاں چو ممتازءِ وڑءَ وتی پندمنتگیں ھلکءَ چہ وتی جندئے بودناکیءَ داں ماسٹرءَ کراچی شاہ دربرجاہءَ وانگ ءُ پدا ڈنی شاہ دربرجاہ یےءَ چہ اسکالرشپ گرگءَ پد اے واجہ کارانی نیمءَ چہ کمک بہ رسیت گڑا کجام نودربر وتی ضمیرءَ بھا کنت، بیرک جنت، سوشل میڈیا ءَ توسیپی پوسٹ لکیت ءُ واجہ کارانی تراناں سوشل میڈیاءَ شیئر کنت ءُ نبشتہ کنت "ہر دل عزیز، فخرِ پلانی ءُ پلاں پلاں" پرچا کہ اگاں پہ گچین کاری ءُ کشمیر ءُ پلاں پلاں روانکانی تہءَ شریک بوھگ ءُ اینچو چست ءُ ایر کنگءَ رند ھم ایوک نہاد یک روچے اے سی والا گاڑی ءَ نندارینگ، یک موبائلی کارڈے یا وتی میتگےءِ ڈگری کالجءِ کلاساں ھازر نہ بوھگءُ نام کشگ نہ انت۔۔۔۔ گڑا ڈنی ءُ ملکی مزن شاہ دربرجاہےءَ کے ءُ چون کمک کنگ بیت۔۔۔۔۔

بلئے امیت چہ راجءَ دارگ بیت۔۔۔ اے راج سکیں موم دلیں ءُ بزگیں راجے۔۔۔۔ زوت گریت ھم ءُ زوت دستءَ دراج ھم کنت۔ چیاکہ اے بزگی ھرکسءَ وت ھم دیستگ ءُ ھرکسی واھگ ھمیش بوتگ کہ آ یا آئیءِ زھگ باز بہ وانیت ءُ وتی جھدانی برکتءَ اوشتات بکنت۔ 

ھمے وڑ ممتاز انت ءُ ممتازءِ کسہ۔۔۔

ممتاز کے انت؟

ممتاز بلوچ یک نودربرے۔ آئیءِ سیادی چہ خضدار ءَ انت۔ ممتازءَ وتی کمکءَ داں کراچی شاہ دربرجاہءَ میان استمانی سیالی ءِ تہءَ ماسٹر کتگ۔ ءُ آ اے وھداں لسبیلہ شاہ دربرجاہءَ استادےءِ بستارءَ وانینگءَ انت۔

ممتازءَ وتی نودربر بوھگءِ ھوار چاگردی کاراں ھم بھر زُرتگ ءُ بلوچ نودربرانی ھاترءَ بوتگیں ھر توارءَ شریک بوتگ۔

انی ممتازءَ ڈنی شاہ دربرجاہ ےءَ اسکالرشپے رستگ۔ اودءَ ممتاز مولمی مٹی ءُ بدلی ءُ میان استمانی دیمرئیءِ تہءَ دیمترءَ وانیت۔ شاہ دربرجاہ آئیءِ 80% ھرچاں وت دنت بلئے اودءَ نندگءُ ورگءِ ھرچ ممتازءَ وت دئیگی آں۔ ممتازءَ وتی وسءُ واکءِ رِدءَ ھرچانی کشگءَ پہ زر جم کنگءِ جھد کُتگ بلئے انگت آ سوبین نہ بوتگ۔ پرے ھاترءَ ممتاز لہتیں روچ بیت یک آن لائن کمکی جارے پرینگءَ انت۔

https://www.indiegogo.com/projects/help-mumtaz-ahmed-sajidi-pursue-his-masters?s=08#/

ممتازءِ کمک کنگءِ واھگ دار بُرزءِ لنکءَ لنکُک جت کن انت یا گوں آئیءَ وت نزیکی کت کن انت۔ داں ممتاز وتی وانگءِ وابءَ سرجم کت بہ کنت۔

نیکیں واھگ پہ کُل بلوچ نودربراں۔۔۔۔