ملا پازلءِ پڑءِ سیاسی رومانس

 مُلا پازلءِ پِڑّ ءِ  سیاسی رومانس!    

وہاب مجید 

"من گوادرءِ باشعور ءُ گیرت مندیں مھلوکءَ گوں دزبندی کناں کہ آ نزّیک بیاانت ءُ دیوانءِ پچیں تگردانی سرا بہ نِند اَنت پرچاکہ نوں مہے لیڈر جلسہ گاہءَ سر اَنت ءُ چیزے سہتءَ پد مہے دیوان بُنگیج بیت اِنت" آسکانی ھوٹلءِ دیمءَ اسٹیجءِ سرا اوشتوکیں سکریٹریءِ دزبندی ءَ گوں مُلا پازلءِ پِڑّءَ (چوک) حمیدءِ ھوٹل، ڑیلکس ھوٹل (انوگیں سلام ھوٹل) ، ملنگءِ پانءِ کیبین ءُ حجامانی دُکانانی دیمءَ اوشتوکیں مھلوک کم کمءَ آیان ءُ پچیں تگردانی سرا نِندان بیت اَنت۔ ہشتاد ءُ نوّدءِ دھکّاں مُلا پازلءِ پِڑّءَ عصرءِ نمازءَ پد سیاسی پارٹیانی نیمگءَ چہ چُشیں سیاسی دیوان ہمک ماہ ءُ بازیں وھداں ہمک ہپتگ یک رندے زرور برجاہ دارگ بیتگ اَنت۔منی اسکولءِ زمانگءَ چہ مُلا پازلءِ پِڑ ہمے رنگءَ اِنت۔ اِدا کاروبار کم، سیاست گیش بیتگ۔ 

چوناہا مُلا پازلءِ پِڑ چہ بازیں وھداں گوادرءِ انٹر ءُ انٹرا سٹی گاڑیانی اسٹاپ اِنت۔ گوادرءِ کش ءُ گوارءِ ھند ءُ دمگ چُش کہ سُربندن، پشوکان، پلیری، نگور، دشت ءُ کلانچءِ مھلوکءِ  کاروبار ءُ سیل ءُ سوادءِ مرکز پازلءِ پِڑ بیتگ۔ ہمک روچ بس ءُ پِک اپ چہ کوچگاں مُلا پازلءِ پِڑءَ اتکگ اَنت۔ مھلوکءَ دُکاناں سودا کُتگ۔ آسکانی ءُ ڑیلکس ھوٹلءَ شرّیں سُبہارگ ے کُتگ ءُ بیگاہءِ گاڑیءَ گوں وتی ھلکاہاں روانہ بیتگ اَنت۔ اے سِلسلہ مروچی ہم جاری ءُ ساری اِنت۔ 

ہشتادءِ دھّکءِ گُڑی سال بلوچستانءِ نودربرانی سیاسی چِست ءُ ایرانی ھوالہءَ سکیّں ھرابیں دورے اَت۔ پرچاکہ اے دورءَ بی ایس او دو ٹُکرّءَ بیت۔ ڑاکٹر یاسین پجّار ءُ ڑاکٹر کہور خان سُہبءِ چیرمین جوڑ بنت۔ وت ماں وتی بے پاہدگیں جنگ ءُ جدلءَ وانگجاہانی وانگ باز متاثر کُت۔ یک ءُ دومیءِ سطحی ءُ ثانوی اختلاف کُشت ءُ خون ءُ برات کُشیءَ سر بیت اَنت۔ تُربتءَ فدا آحمد ہمے زمانگءَ شہید کنگ بوت ءُ مُلا ستار تیرگواریءَ ٹپّی بوت۔ مُلا ستار بی ایس اوءِ چیرمین ات ءُ آہیءِ سیادی چہ گوادرءَ ات۔ پمشکا بلوچ ورناہانی اے بے پاہدگیں وت ماں وتی کُشت ءُ کوشءَ گوادرءِ وانگجاہ ہم اسر مند کُت اَنت۔ 

ہمے ٹیمبءَ 1988 ءَ بواہز ہاہی اسکول نوک نوک ماڑل جوڑ بوتگ اَت۔ ماڑل اسکول ءِ مہے اولی پرنسپل واجہ غلام حیدر اَت ۔ واجہءِ سیادی چہ پنجگورءَ ات۔ واجہ سکّیں وش روح ءُ انسان دوستیں مردم ے ات۔ اسکولءِ ہچ کارا میارے نہ کُت۔ ہر وھدے کہ مہے نو ءُ داءِ کلاسءِ گُڑّی پیریڈ یلس بیت اَنت گُڑا واجہءَ وت مارا انگلش گراہمر وانینت۔ بلے ہمے دورءَ بی ایس اوءِ پروشت ءُ پروشءِ سببءَ اسکولانی وانگ ہم باز اسر مند بیتگ ات ۔ مہے اسکولءَ ہم گیشتریں وھداں سُہبءَ اسمبلیءَ پد روانک ءُ زہر شانی کشگ بیت اَنت۔ اے روانکانی منزل مُلا پازلءِ پِڑ اَت۔ مُلا پازلءِپڑءَ سر بیگءَ گوں دو کسءَ گُشادیءَ گوں حمیدءِ ھوٹلءِ یک ٹیبل ے چِست کُت ءُ دیمءَ ایر کُت ءُ پدا گوں لس مھلوکءَ گوں تران شروع بیت۔ 

مناں یات اِنت من ہشتءَ وانگءَ اِتاں ۔ من ہم ہمے زمانگءَ "پبلک اسپیکنگ"ءِ الپ ءُ بے چہ ہمیدا در بُرت اَنت۔ مُلا پازلءِ پِڑ مھلوکءِ بیگاہءِ چاہ واری ءُ ٹیمب پاسءِ جاگہ ات. ہمک سیاسی مراگشاں گوں یک نیمگ ے لس مھلوکءِ ٹیمب پاس بیتگ اَت ءُ دومی نیمگءَ راجی اڑءُ جنجالانی بابتءَ آھانی سیاسی شعور ہم ودیتگ اَت۔ " مہے ھلکہاں مشہورِ زمانہ "پانی دو بجلی دو۔۔۔  ورنہ کُرسی چھوڑ دو" ہمے زمانگءِ پیداوار اِنت۔ پازلءِ پِڑءِ بیگاہءِ سیاسی دیوانانی برے برے سہ بہر بیتگ اَنت۔ اولی گُشتانکی بہر، دومی شاہریءِ ءُ سیمی بہر شپءَ سازءُ زیملی دیوان ہم برجاہ دارگ بیتگ اَنت ءُ باز وھداں سازءُ زیملی دیوان داں مُلاءِ بانگءَ ہم شُتگ اَنت۔ پدا سنگتاں آسکانی یا ڑیلکس ھوٹلءَ چاہ ءُ پوراٹہ ے جتگ ءُ نوں لوگءَ شُتگ اَنت۔ 

ہشتاد ءُ نوّدءِ دھکءَ گوادرءَ سوشل میڑیا ءُ وٹس اپ نیست ات۔ پمشکا ہر وھدے کہ مارا پازلءِ پِڑءَ جلسہ کنگی ات گُڑا ما لس مھلوکءِ دعوت دیگ ءُ لوٹوکیءَ پہ لہتے کمیٹی جوڑ کُت۔ جلسہءَ چہ یک روچے سر یک گروپے دیمی زِرءِ بلوچ وارڑءَ چہ دریاوردانی دعوت دیگ بُنگیج کُت دانکہ ڑھوریہءَ شُت۔ دومی گروپءَ بلال مسجدءَ چہ شروع کُت داں پازلءِ پِڑءَ۔۔۔ دگے یکےءَ شاھی بازارءِ ایم سی بی ءَ چہ لوٹوکی شروع کُتگ دانکہ ابراھیم پان ھاوس ءُ علی مروکءِ ھوٹلءَ۔۔۔ دگے لہتے سنگتاں سرکاری ءُ غیر سرکاری دپتراں مھلوک دعوت دات۔ 

اے گپءِ تہا ہچ شک نیست کہ آ وھداں گوادرءِ آبادی کم ات بلے بی ایس اوءِ جلسہانی روچاں پازلءِ پِڑ چہ بنی آدمءَ چکار بیتگ ات۔ 

مرچی 2021 اِنت۔ آل پارٹیز ھور بنت ۔ زہرشانی کن اَنت بلے گُشتانک دیوک چہ لس مھلوکءَ گِیشتر اَنت۔ چُش پرچا؟؟ اے سیاسی decline ءُ زوالءِ سبب چی اَنت؟ منی ھیالءَ کُلیں سیاسی گلانی رھشون ءُ بلوچ وانندہیں ٹکّ اے جُستءِ سرا پِگر بکنت دانکہ یک رندے پدا لس مھلوک پہ وتی انسانی، راجی، پیداہشی ءُ بُنکی ھکاّنی ھاترا سیاسی چست ءُ ایرانی بھر جوڑ بہ بنت پرچا کہ اگاں لس مھلوک سیاسی چست ءُ ایرانی تہا بھر نہ زورایت گُڑا وت گڑیں غیر سیاسی مردم آہیءِ ھاکم بنت ءُ ایشیءِ آسرءَ داہمی بزگی ءُ لنگڑی آھانی ءُ آھانی چُک ءُ پساہندگانی بھتءَ نویسگ بیت اِنت۔ 

منی ھیالءَ چُشیں بلوچ لیڑرءِ نیست کہ آہیءَ پازلءِ پِڑءَ لس مھلوکءَ گوں تران نہ کُتگ۔ پازلءِ پِڑءَ بازیں ھندی ورناہاں سیاسی پجّارے داتگ ءُ لیڑر جوڑ کُتگ۔ 

1988ءَ ما اسکولءَ وانگءَ ایت اِیں۔ جنرل الیکشنءِ جار جنگ بیت۔ من اولی ءُ گُڑّی رندا باباے بلوچستان میر غوث بخش بزنجو پازلءِ پِڑءَ دیست ۔ آ الیکشن مہم ءِ سلسلہءَ گوادرءَ اتکگ ات۔ ناکو حُسین اشرف ، کپٹن سلیمان ءُ پی این پیءِ دگہ بازیں ھندی سروک آہیءِ ہمراہ ایت اَنت۔ آہیءَ مھلوکءَ گوں تران کُت۔ کسانیں تپرے آہیءِ دستءَ ات۔ آہیءَ مھلوک ءَ تپرءَ ووٹ دیگءِ سِکین دات۔ 

میر ساھب ءُ آہیءِ پارٹیءَ 88 ءِ جنرل الیکشنءَ پروش وارت۔ 1989 ءَ میر ساھب بیران بوت بلے۔۔۔۔ رند تِرا  گیشتریں بلوچ سیاسی سروک ءُ بی ایس اوءِ لیڑر ءُ "سینیر ساتھیاں" میر ساھبءِ جمہوری ءُ Pragmatic سیاستءِ رند گیری کُت۔ 

پازلءِ پِڑءَ میر ساھب ءَ چہ ابید ڑاکٹر مالک،  اختر مینگل، ڑاکٹر کہور خان ءُ دگہ بازیں ھندی ءُ ملکی سطحءِ رھشوناں گوادرءِ مھلوکءَ گوں تران کُتگ۔ سیاسی رھشونانی گوشدارگءَ گوادرءَ چہ ابید تیوگیں ضلعءِ مھلوک اتکگ اَنت۔ اے گپ رد نہ اِنت کہ ضلع گوادرءِ ورنا ءُ لس مھلوکءِ سیاسی شعور ءُ زانتءِ ودینگءَ ملا پازلءِ پِڑءِ مزنیں کنٹریبیوشن ے است اِنت۔ 

مہے نودربریءِ زمانگءَ چہ پیش 60 ءُ 70 ءِ زمانگءَ ہم ملا پازل ءِ پِڑ  سیاسی چِست ءُ ایرانی بُنزہ بیتگ۔ مروچی ہم وڑے ناں وڑےءَ ملا پازلءِ پِڑءَ گوں سیاسی ورکرءِ رومانس ے برجاہ اِنت۔ 

پازلءِ پِڑءَ ہما وھداں نودربر ءُ ورناہاں سیاسی شعور داتگ کہ آ دورءَ گوادرءَ کالج ءُ یونیورسٹی کیمپس نہ بیتگ۔ سوشل میڑیا، ٹویٹر، یوٹیوب ءُ فیس بُک. کسّیءِ وہم ءُ گُمان نہ بیتگ۔ راستیں ھبر ایش اِنت کہ پازلءِ پِڑ گوادرءِ لس مھلوکءَ پہ یک سیاسی، چاگردی ءُ کاروباری ادارہ ے بیتگ۔ 

مرچی 2021 اِنت۔ گوادر شہر مزن بیتگ۔ مرچی گوادر مونڑیءَ چہ شروع بیت اِنت داں باتیلءَ کیت۔ شہرءِ مزنیں آبادی ے گوریچءِ نیمگءَ شِفٹ بوان اِنت۔ پمشکا مرچی ناایوک شاھی بازار ءِ پیسریگیں وشیّ ءُ رونق ھلاس اَنت بلکینہ پازلءِ پِڑءِ سیاسی چست ءُ ایر ہم روچ پہ روچ کم ترّان اَنت۔ 

وھد بدل بیتگ ءُ وھدءِ گرم ءُ سرد ءُ چِست ءُ ایرانی ہمراہیءَ مرچاں پازلءِ پِڑءِ جاگہ شُہداے جیموڑی چوکءَ گِپتگ۔ بلے انسانی ءُ راجی ھَکّ ءُ سیاسی زانت ءُ شعورءِ اے سپر نہ اوشتاتگ۔۔ ایوک ءَ فیلڑ ءُ لہتے کارست بدل بیتگ اَنت۔ چو "اولمپک مشعل"ءِ وڑا مُلا پازلءَ سیاسی ءُ چاگردی زانتءِ اے قندیل جیموڑیءِ شہیداں "پاس" کُتگ۔