جنکانی میان اُستمانی روچ

                            انیلہ یوسف

@AnilaYousufB

مرچی دنیا جنکانی میان استمانی روچءَ "ڈیجیٹل جنریشن " ءِ نسبتءَ دارگءَ انت ، وھدے کہ بلوچستانءَ جنکیں چک ءُ جنیں آدم ڈیجیٹل جنریشن ءِ نامءِ زانگ کُجا؟ وتی جندءِ بنکی آسراتیاں چہ زبھر انت. MMRءِ ھساب ءُ داد یا چارءُ ٹپاس ءِ ردا بلوچستانءَ چلگی بزاں چک ماتیءِ وھدءَ مرگءِ کساس چہ پاکستانءِ ایندگہ صوبہاں بلوچستان ءَ گیشتر انت.

ھمے زوتان جنینانی چک ماتی ءِ وھدءَ  بیران بئیگءِ دروراں چہ یک درورے اش انت کہ یک نادراہ یے ءَ ڈاکٹرءَ پیسرءَ چہ ھمے گشتگ کہ اے زالبولءِ چُک لاپءِ تہا بیران بیتگ ھمے جنین ادم ءَ ھسپتالءَ سربوھگءَ سہے روچ گوازینتگ. پمے ھاترا آئیءِ جند اوں بیران بیتگ.

بلوچستانءَ چُک ماتیءِ وھداں بیران بئیگءِ اے جیڑہ ءَ ما سرکارءِ نابودی ءُ ھسپتال ءُ ڈاکٹرانی بے پروائی گُش اِنت ءُ وتا بے میار کنیں. بلے بُندرءَ  اے جیڑہ چُک ماتیءِ وھدءَ نہ بیت ھما وھدءَ کہ جنکیں چک ودی بیت ما ءُ مئے چاگرد میزان میزانءَ آئیءَ مرگءِ نیمگا تیلانک دیان کنیں. آئیءِ لیبءُ گوازی ءُ اسکولءَ روگ ءِ اُمبرءَ ما لوگءِ سجیں زمہ واریاں ھمائی ءِ بڈءَ لڈیں. آئی ءِ کستریں برات ءُ گہارانی سجیں کاراں ما ھمائی ءِ کوپگءَ دھیں.

ھمروچ اسکولءَ چکانی بے ھوش بئیگ ءِ سبب آھانی کم وردنی ءُ کم ھونی انت. ھمیشی سببءَ آ ھر روچ نادرہ بنت. لوگءِ کارءُ کستریں برات ءُ گہارانی چارءُ دلگوش ءِ سببءَ مدام چہ اسکولءَ موکل کنگءُ نیاھگ وَ ھمروچیگیں گپے....آھانی کم توانی ءُ کم وردنی یے ءَ ابید نفسیاتی ھسابءَ اوں آھانی ھالتءُ جاور شر نہ انت.

بازیں انچیں چُک ھم است کہ سک باز ھساس انت وتی ھساس طب بوھگءِ سببءَ وتی لوگءِ چاگرد،نیزگاری ءُ ایندگہ پریشانیانی سوبءَ مونجاءُ گمیگ گندگءَ کاینت..اسکولاں گیشتر موکل کنگ ءُ چہ اسکول ءَ درآھگءِ سوب ھم ھمے لوگءِ کار انت. گریبی ءُ نیزگاریءِ سببءَ بازیں مردم وتی سہیں وھدے ورگءَ پہ باز مشکلءُ جنجالے درگیجیت. آ کُجا شیر، نیوگ، گوشت ءُ دگہ شریں وردنی چیز زرت کت کنت.

ھمے ھمک ماہءِ ماہواری ء ھوار نادراھی ءُ ایندگہ جیڑھانی بابتءَ وا گپ نہ بیت. ھمے سبب انت کہ گیشتر چُک نوک اُمبری ءَ ھونءِ کمیءِ سوبءَ نزور ءُ نہ توان بنت. دگہ جیڑہ ئے کسانی ءَ جنکیں چکانی سیرءُ سانگ دیگ انت.سیرءَ چہ پد ھمشریکیءَ چک آرگ لوگءِ مردمانی ھزمت ءُ لوگءِ کار ءُ چلوپگاں گوں انچو مشکول بنت کہ وتی جندءَ بیھال کن انت.ھمے وڑءَ وتی جندءِ ھیال نہ دارگ وتی پرواہ نہ دارگ آھانءَ مرگءِ دپءَ کاریت ءُ سر کنت.

ھمے سوب انت کہ چک ماتی وھدءَ بازیں ھون ریچگ ءُ جٹکہ یے نادراھی ءُ دگہ کسانیں جیڑہ یے ءَ آ چہ وتی گرانبھاھیں زندءَ چہ زبہار بنت۔

چونہا جنینانی برابری ءِ راھبند کانود،  بازیں این جی اوز ءُ جنینانی ھقانی گروکیں بازیں گلانی زورتگیں گامگیج کہ اشان زرتگ۔ بلے بازیں وھدے ھمیشی سرءَ کار کنگءَ انت انگہ سود مند نہ بیتگ...