زرد صحافت، البم ءُ اسکرین شاٹ اھوالکاری

زرد صحافت، البم ءُ اسکرین شاٹ اھوالکاری

جاوید بلوچ                         

اھوالکاری مئے چاگرد ءَ باز ھور ءُ تور نہ انت پمشکہ ما گوں اشییءَ وت ءَ باز بندوک نہ کن اِنت یا اے لبز ءِ اِش کنگ ءَ گوں ھمے دوئیں ھئیال ءُ لیکہ کہ باز نامدار انت ھمے ایوک مارا یات کاینت۔ یکے پہ شرّی "پیغمبرانہ پیشہ" ءُ دومی "لفافہ صحافی" ، باز بر ءَ تو گندئے کہ مئے نامی ایں بلوچ نبشتہ کار اوں اگاں وت ءَ چہ یک جاورے ءَ گِستا کنگ بہ لوٹ انت گڑا گُش انت کہ ما وَ لبزانک ءِ مردم اِنت مارا چے کار گوں اھوالکاری ءَ، ءُ وت ءَ چہ وتی کش ءُ گور ءِ جاوراں بے سما کنگ ءِ ازمکاری کنگ ءَ بندات کن انت۔ ءُ کدی کدی اگاں دل ءَ بیت اِت گڑا اھوالکاری ءَ را نان فکشن یا غیر افسانوی ادب ءِ پڑ ءَ ھم ھوار کن انت۔۔۔۔۔

بلے ادا یا ھر پڑ ءَ اھوالکار انت کہ آئی ءَ پہ زمہ واری ھوار بوھگی انت چیاکہ اے پڑ ءَ ھر تَک یا وَ براہِ راست جرنلزم انت بزاں ٹروڈشنل جرنلزم یا نان ٹرڈشنل جرنلزم۔ بلے جرنلزم انت۔ بزاں ھر کجا کہ رسانک ءِ، مارشت، لبز ءُ توارانی یکے ءَ داں دومی ءَ یا یکے داں باز ءَ سر بوھگ ءُ سر کنگ ءِ پروسس انت۔ اود ءَ جرنلزم گون انت۔  

اھوالکاری ءِ سپر ءِ بندات ءُ بندیک ءِ سر روچ ءِ مرچی بنی آدم ءَ درگیتک نہ کُت۔ بلے ھو برے اے اولی نبشتگیں تاک ءِ دروشم ءَ گوں بندوک کُت ئے ءُ برے گوں یک توار ءُ نشانے ءَ۔۔۔۔۔ اے سپر ءِ بابت ءَ یک چیزے الم پدر انت کہ ھما روچ ءَ ھئیال ءُ مارشتانی یا توار ءُ نبشتانکانی سپر برجا بیتگ ءُ بیت بزاں اھوالکاری ءُ رسانک ھست۔ ءُ اے سپر ءَ چو آ دگہ بازیں پڑاں شرپ ھم رَستگ ءُ بنامی ھم۔ اے پڑ مُلک ءُ بادشاہانی زلورت ھم بیتگ ءُ پہ آہاں سر ءِ درد ھم۔ 

مئے چاگرد ءَ جرنلزم ءَ گوں بندوکیں بدیں نام "لفافہ صحافت" ءَ را زرد صحافت گُش انت۔ اے راستی یے کہ زردیں اھوالکاری ءِ ٹرم مرچی سرجمیں جہان ءَ ھمے وڑ انت بزاں دروگیں اھوالکاری، اے دروگیں اھوالکاری چہ دروگیں ھالانی شنگ کنگ، راستیں ھالانی چیر ترینگ ءَ بہ گِر ءُ وتی نیم ءَ چہ وتی دوستیگیں ءُ پجاروکیں مردمانی ھالانی نبشتہ کنگ۔ 

بلے مئے کرا باز مردم "لفافہ صحافت" ءَ را زرد صحافت پمشکہ گُشیت کہ مئے سرکاری ادارگ ءُ مردمانی کرا چہ سرکار ءِ نیم ءَ مُپت ءَ یک لفافہ ءِ دئیگ بیت اے لفافہانی تہ ءَ کجام ھم سرکاری نمدی ءُ ایپلیکشن نبشتہ کنگ بنت ءُ یک دپترے ءَ چہ دومی دپتر ءَ دیم دئیگ بنت۔ اے لفافہ ءِ رنگ زرد اِنت ءُ مئے باز مردم ءِ لیکہ ھمیش انت کہ ھمے زردیں لفافہ ءِ تہ ءَ دُزیں ءُ دروگیں اھوالکاراں زَر دئیگ بیت۔ یا اے صحافی ھردیں بلکیک میلنگ ءَ رو انت گڑا آہاں ھمے لفافہ ءِ تہ ءَ رشوت، چندہ یا کمک دئیگ بیت ءُ اے صحافی پدا ھما ادارگ یا مردم ءِ کرپشن ءُ دُزی ءَ چیر دئینت۔ اے گپ یک ھدّے ءَ بہ گندئے راست بہ بیت ءُ اے زردیں لفافہ ءِ کلچر بہ بیت بلے اسل ءَ زرد صحافت ءَ گوں اے پاکستانی سرکاری ءُ واجہ کارانی دپترانی تہ ءِ زردیں لفافہ ءَ گوں ھچ سیادی نیست۔ ھو اے دابیں اھوالکاری ھم زرد صحافت الم گُشگ بیت۔

اسل ءَ زرد صحافت ءِ بندات امریکہ ءِ روتاک "نیو یارک ٹائمز" ءُ "دی نیویارک جرنل" ءَ 1890 ءَ پد بندات کُتگ۔ اے دہر ءَ روتاکانی وانگ ءُ بھا ءِ یک مزنیں لوٹے بوتگ گڑا اے دوئیں روتاکاں وتی وتی ھالانی گرم ءُ گیشتر واناک کنگ ءِ ھاتر ءَ آہاں روتاک ءِ تہ ءَ اکس ءُ لبز گوں زردیں رنگ ءَ نبشتگ انت دانکہ وانوکانی چم ھما ھال ءِ سر ءَ بہ کپ ایت کہ ھما ھال ءَ روتاک اسل ءَ بھا کنگ لوٹیت۔

پرے ھاتر ءَ ھر دوئیں ھال تاکاں زردیں رنگے یک کسانیں زھگے ءِ کارٹون ءِ شنگ کُتگ ءُ ھمے کارٹون ءِ چیر ءَ ھما ھال نبشتہ کُتگ کہ ھمائی ءِ سر ءَ پروپیگنڈہ کنگی بیتگ۔ اے کسانیں زھگ "زردیں زھگ" ءِ نام ءَ زانگ بوتگ۔ اے زھگ یک انچیں کارستے بوتگ کہ اشیی ءَ گریبیں آبادیانی ھما میتگ ءِ جاہمنندانی نمائندگی کُتگ کہ آ میتگ سک گند ءُ گسڑ ءَ بار انت، سماتانی سر ءَ چُک لئیب ءَ انت۔ سر بوٹانی سبب ءَ ساتگ انت ءُ پِنڈ اِتگیں گُد ئے گور ءَ انت کہ چہ آئی ءِ جِند ءَ دراج انت۔ اسل ءَ زردیں رنگ پیلوشگ ءُ نادراہی ءِ رنگ زانگ بیت بلئے اے ھالتاکاں ھمے رنگ پہ وانوکانی وتی نیم ءَ چِکگ ءِ ھاتر ءَ کارمرز کُتگ۔ ءُ ھمے "زردیں زھگ" ءَ چہ لبز یا ٹرم "زرد صحافت" در اتکگ ءُ روچ ءِ مرچی دروگیں ءُ زر زُرتگیں اھوالکاری ءَ زردیں اھوالکاری گُش انت۔

مئے کرّ ءَ اھوالکاری چونکہ مئے چاگر ءَ باز ھور ءُ تور نہ بوھگ ءِ سبب ءَ ءُ ایوک سرکاری ءُ واجہ کارانی کار ءُ تواراں گوں نزیک بوتگ پمیشکہ ما اے لبز اِش وَ کُتگ زرد صحافت ءُ وتی کش ءُ گوراں پدا لفافہ صحافت دیستگ، ءُ پدا ھمے سرکاری مُپتی لفافہ ءِ بد بھتی کہ اشیی ءِ رنگ ھم زرد انت پمیشکہ ھمیشی ءَ را زرد صحافت گُش انت۔ (چونا ءَ اے ھم بیت کنت کہ زور اے لفافہ ءِ رنگ زرد کنگ بیتگ داں کسے ھم اے لفافہ ءَ دست بہ گپت آ گوں زرد صحافت ءَ بنّام ءُ پولنگ بہ بیت)

بلئے ھئیر اے وَ اسل زرد صحافت ءِ ءُ بزگیں زردیں لفافہ ءِ کسہ اَت۔ زردیں اھوالکاری ءَ وھد ءِ ھمرائی ءَ وڑ وڑیں رنگ مٹاتگ۔ ءُ ھاس مئے دمگ ءَ وَ گیشتر۔ چونا ءَ جہان ءُ چالاکیں ادارگ انی 5th جنریشن وار ءِ نام ءَ ھم زردیں اھوالکاری کنگ انت۔ سوشل میڈیا ءُ انٹرنٹ ءِ جہان ءَ ھالانی چیر ترینگ ءُ وتی دلدوستیں ھالانی ٹرینڈ ءَ آرگ ءِ ھاتر ءَ پیج ءُ مردم دارگ بوتگ انت۔ ءُ آ گوں اشیی ءَ گولائیش انت۔

مئے دمگ ءَ زردیں اھوالکاری اجبیں ءُ سکیں مزاہی ءَ رنگاں ھست۔ لسبیلہ ءِ اھوالکاراں گوں بندوکیں یک گپے سک نامدار انت کہ ھردیں جام سائب بیلہ ءَ کئیت گڑا آئی ءِ دیواناں وڑ وڑیں مردم کاینت۔ لہتیں وتی زمینی جیڑہ، لہتیں نادراہی ءُ کُمک ۔۔۔۔ ءُ ھمے وڑ ءَ لہتیں مردم کئیت آہاں ایلبم گوں۔ اے مردم کاینت ایلبماں جام سائب ءَ پیشدار انت ءُ جام لفافہ یے آہاں دنت۔ انچو اے روت دگہ یکے کئیت۔۔۔۔ گڑا یک نوکیں مردمے اے ندارگ ءِ گندگ ءَ گوں ھئیران بیت ءُ جُست کنت کہ اے مردم کے انت کہ اشاں فوٹو البم گون انت، کاینت ءُ جام ءَ اکساں پیش دار انت پدا جام سائب آہاں لفافہ دنت؟ گڑا مالوم بیت کہ اے اھوالکارانی یک ٹولی یے جام سائب ءِ بابت ءَ توسیپ ءَ کہ ھرچ ھالتاکے ءَ ھالے یا اشتہارے شنگ بیت اے آہانی ھما ٹُکراں زور انت ءُ ایر کن انت پدا ھردیں جام سائب ءَ گوں ملاقات بیت گڑا پیش ئے دارنت۔ پدا جام سائب اشانی ھئیال چارگ ءَ کنت۔

اے وَ زردیں اھوالکاری ءِ میڈ اِن لسبیلہ ورژن ات نی ھئیرانی گپ اش انت کہ مئے مردم چنچو مزنیں ساچشتی creative ایں مردم انت کہ گوادر ءِ بابت ءَ اِش کُتگیں گپے کہ ادا لہتیں میر ءُ واجہ کار ءُ ھمے وڑ ءَ سرکاری مردمانی مردم سوشل میڈیا ءُ وٹساپ گروپانی تہ ءَ ایوک ھمے واستہ انت کہ اسکرین شاٹ ءُ لنک شیئر بکن انت۔ ءُ اے پہ تھمبُل ھرچ گروپ ءِ تہ وتی متعلقہ واجہ ءِ ھک ءَ یا بگیری ءَ توسیپی یا تنقیدی ھال ءُ گپانی اسکرین شاٹ ءُ لنکانی دیم دئیگ ءِ واستہ انت۔ نی اے ھالانی گندگ ءُ اِشکُنگ ءَ ھمے سما بیت کہ اگاں ما ءُ مئے چاگر نیویارک ٹائمز ءِ زیانی "زردیں چُک" والا ساچشت ءَ چہ بلکیں لیٹ انت بلئے ھچ وڑ ءَ کم نہ انت۔ چیاکہ ما ھم وتی کدّ ءَ وتی وڑ ءَ اے زردیں اھوالکاری ءَ وتی دست مان کُتگ۔ ءُ زردیں اھوالکاری، البم اھوالکاری داں اسکرین شاٹ ءُ لنکاں رسینتگ۔