شُما زاناں وتی راجی زُبان ءَ دربرگ لوٹ اِت؟

شُما زاناں وتی راجی زُبان ءَ دربرگ لوٹ اِت؟

اکس: کمانچر بلوچ

ندکار: ابدلستار بُگٹی 

انچوشکہ ما دْراہ سرپد ایں کہ مرچاں بازیں بلوچ بْرات ءُ گْوھار پہ راجی زُبان ءِ دیمروئی ءَ ماں وٹس ایپ، ٹیلی گرام، پیسبُک ءُ دگہ دامگی پریاماں کار ءَ اَنت۔ ھر کس راجی زُبان ءَ وت دربرگ ءُ دیم ءَ ھم وانینگ ءَ اِنت۔ اِے باز وشیں گپے کہ ما دْراہ زیت وتی راجی زُبان ءَ وت وان این ءُ دربر ایں ءُ پد ءَ دیم ءَ وتی سْیاد، وارس، سنگت ءُ دزگْوھاراں ھم راجی زُبان ءِ بارو ءَ آگاھی بہ دے ایں۔ 

اے درگت ءَ پہ بلوچی نبشتہ دربرگ ءَ من شُمارا یک سوجے دیگ لوٹ آں۔چوناھیگا شُما وَ بلوچ اِت پمیشکا شُما ابرمی وتی ماتی ءُ راجی زُبان ءِ وانگ ءُ سرپد بیگ ءَ زبر اِت۔ بزاں شُما وتی راجی زُبان ءِ وانگ ءَ ھچبر تکانسر نہ بَہ اِت۔ بزاں راجی زُبان ءِ وانگ ءُ پھمگ پہ بلوچ ءَ ھچ مُشکلے نہ بیت ءُ ھرکس بلوچی ءِ ونت ءُ سرپد بیت۔ گُڑا باید اِنت شُما لھتیں روچاں بلوچی نبشتانک، آزمانک ءُ گْوشکنداں وانان کن اِت، بزاں شُما ھم یک انچیں دابے ءَ بلوچی نبشتانک، آزمانک ءُ گْوشکنداں بہ وان اِت کہ شُما وت استاد اِت۔ بزاں انچو نبشتھاں ھورت ءُ دلگوش ءَ وان اِت کہ شُما چَہ نودربرانی نبشتھاں ردیِاں چارگ ءَ اِت۔

بلے بَے (شَرت) ایش انت کہ شُما پیسر ءَ وت بلوچی درونتاں سرجمی ءَ بہ وان اِت۔ بزاں یکبرے بلوچی درونتانی وانگ ءَ رَند شُما انچیں دابے ءَ بلوچی وانان کن اِت کہ شما چہ نبشتھاں نزوریاں درگیجگ ءُ آیانی رَدیاں نزّ آرگ ءُ یکجاہ کنگ ءَ اِت گُڑا ھمے داب ءَ شُما زیت دربر اِت۔ چریشی ءَ مستریں پائدگ ایش انت کہ شُمارا بلوچی درونت ھم مُدام تاجگ بنت۔

گْوشگ ءِ مُراد ایش اِنت کہ راجی زُبان ءِ دربرگ ءَ اُستاد نہ لوٹ ایت بلکیں مھر ءُ دلبڈی لوٹ ایت، اگاں شُمارا راجدوستی ءِ مارشت ھست، اگاں شُما زُبان دوست اِت گُڑا شُما وت چہ پیسبُک ءَ راجی زُبان ءَ دربُرت کن اِت۔ 

دومی وھدیکہ شُما ھر چیزے نبشتہ کن اِت گُڑا آئی ءَ یکبرے وت چمشانکے بہ دے اِت۔ وتی ردیاں وت راست کنگ ءِ جُھد بہ کن اِت، باید اِنت ما اشتاپ مہ کن ایں بلکیں وتی ھر نبشتگیں چیزاں ھورت چاری ءَ وانین ءُ آیانی ردی ءُ نزوریاں برابر بہ کن ایں گُڑا ما وتی راجی زُبان ءِ رھبند بلد بَہ ایں۔ من اُمیت کن آں کہ شُما زیت وتی راجی زُبان ءِ نبشتہ دربر اِت چوناھیگا شُما وت بلوچ اِت پمیشکا پہ شُما بلوچی نبشتہ دربرگ ھچبر اڑ ءُ اڑاندے نہ بیت۔ بس شُما اشتاپ مہ کن اِت۔ بلوچی وت دربر اِت، وٹس ایپی گلاں اڈکنان ءَ وتی لوگ ءِ مردماں بلوچی ءِ وانین ایں۔ بزاں مارا  تھنا بلوچی وت دربرگی نہ اِنت بلکیں سْیاد ءُ لوگ ءِ مردماں ھوار سرجمیں راج ھم وانینگی اِنت۔ ما ھرکس ءَ لوٹ ایت کہ بلوچی زُبان ءِ اُستاد جوڑ بِہ بہ ایں۔ کالج ءُ یونیورسٹیانی بلوچ نودربر  باید انت وٹس ایپ گروپانی دربرجاھاں اڈ کن اَنت ءُ راج ءِ راجی زُبان ءِ درونتاں وانین اَنت۔

وھدے کہ شُما بلوچی نبشتہ کنگ ءَ بُنگیج کن اِت گُڑا ھمے ھیالداری بہ کن اِت کہ ھر چیزے شما نبیسّگ ءَ اِت گُڑا شُما وت ھم ھمے نبشتگیں چیزاں دو سے رند ءَ چمشانک بہ دے اِت ءُ وتی نبشتہ رَدیاں وت کَشان کن اِت چی ءَ کہ ھر زُبان ءِ ندکار ءُ نبشتہ کار نبیسّگ ءِ وھد ءَ اشتاپیگ نہ بنت بلکیں دو سَے رند ءَ وتی نبشتگیں گالرِداں وت وانان ءُ وتی رَدیاں راست کن اَنت۔

نی اے مئیگ ءُ شُمئے راجی زمہ واری اِنت کہ ما بلوچی وت دربر ایں ءُ وتی راج ءَ ھم وانین ایں کہ مئے بلوچ راجی زُبان ءَ ھم گیدی ءِ دگریں زُبانی ڈول ءَ دیمروی بہ رس ایت۔ چوناھیگا اگاں ما دگہ بلوچ نودربراں وانین ایں گُڑا ما وت ھم زبر بہ ایں ءُ وت ماں وت وانگ ءَ مئے زیردستیں راجی زُبان ھم دیمروئی کنت چوناھیگا زُبان وانگ ءُ وانینگ ءِ برکت ءَ دیمروئی کن اَنت۔ بلوچ راج زِندگ بات ءُ بلوچی مُدام دیمروئی بہ کنات۔

 

اِے کلوہ ءَ دیم ءَ ھم روان بہ کن اِت کہ راج ءَ پہ وتی راجی زبان ءِ وانگ ءُ زانگ ءَ سرپدی ءُ آگاھی بہ رس ایت۔