دی مرڈر آف ہسٹری

دی مرڈر آف ہسٹری

                             ماران بلوچ

''دی مٙرڈر آف ہسٹری''(The Murder Of History) اے کتاب ءِ نبشتکار ''کے کے عزیز''(خورشید کمال عزیز) انت۔۔۔ اے کتاب ''نونزدہ سٙد نوٙد ءُ سے''(1993) ءٙ شنگ ءُ تالان کٙنگ بوتگ۔۔۔ سرجمیں کتاب یک تنقیدی چمشانکے  پاکستانی ٹیکسٹ بُکہ سر ءٙ اِنت۔۔۔ اے کتاب ءِ تہا کے کے عزیز گشیت کہ پاکستان ءِ تہا ھمے کتاب اسکول، کالج ءُ شاہدربرجاھانی تہا کہ وانینگ بنت اِشانی ھشتاد درسد مواد دروگاں، "دی مرڈر آف ہسٹری" سرجم ءٙ پاکستان ءِ راجدپتر بِزاں کہ پاکستان اسٹڑیز ءِ کتابانی سر ءٙ اِنت، کے کے ءِ گُشگ اِنت کہ اے کتابانی(پاکستان اسٹڑیز) مستریں مول ءُ مراد ریاست ءِ لس مھلوک دشمن  پالسیانی رکّینگ انت۔۔۔  

 کے کے گُشیت اے کتابانی سوب ءٙ نودربرانی زہنی سلاھیت دیمروی نکنت ءُ مردم انچیں دوکا ءُ فریب ءِ شکار بنت کہ کدی ھم ریاست ءِ ھلاپ ءٙ گپ برداشت نہ کن انت۔۔۔ پاکستان ءِ لس مھلوک ءِ جیڈہانی گیش ءُ گِوار نہ بوھگ ءِ یک بلائیں سوبے ھمے کتاباں۔۔۔ کے کے عزیز اے ھم گشیت کہ اے ملک ءِ تہا ھشتاد درسد نودربر وتی کورس ءٙ چے اٙبید دِگے کتاب نہ وان انت پمیشکا نودربر اے چیزے پجار ءٙ کت نکناں کہ اے کتاب دروگاں کہ راستاں۔۔۔ کے کے اے کتاب ءِ تہا باز انچیں دروگ ھم مارا پیشداریت کہ چون راستیں راجدپتر دروگیں دروشمے ءَ نودربرانی دیما ھیر کنگ بیت تاکہ نودربرانی ذھنیت داھِم ریاست ءِ کنٹرول ءٙ بہ بیت ءُ ھر وھد ءَ آیاں وتی Interest ءِ واستہ کارمرز کُت بِہ کنت۔۔۔    

 دِگہ کے کے  "قاہد اعظم"، "علامہ اقبال"، "لیاقت علی" ءُ ایدگہ سیاسی مردمانی سر ءٙ گپ کنت کہ چوں اِشاں کہ دروگیں کریڈت دیگ بوتگ ءُ وتسرا مزن جوڈ کنگ بوتگ اٙنت ءُ اسل مردم چہ راجدپتر ءٙ گار ءُ بیگواہ کنگ بوتگ انت۔۔ پدا ما گند انت کہ اِدءِ نبشتکار ءُ سیاسی مردم مدام اے ملک ءٙ گوں اسلام ءٙ ھوار کناں بلے راستی ءٙ اے گپّاں ھچ وڈیں راستی نیست۔۔۔ھما کسان ایں راج کہ اے ملک ءِ تہا نشتگ اَنت بِزاں بلوچ، پشتون ءُ سندھی اِشاناں کمتر لیکگ ءُ احساس کمتری ءِ شکار کنگ اے کتابانی یک مکسدے یا کہ ھما بنگالی کہ اے ملک ءِ گیشتر آبادی بوتگ انت بلے راجدپتر ءٙ چہ آہاناں گار کنگ ءُ آیاں ھرابیں دروشمے ءٙ پیشدارگ پاکستانی نبشتکارانی کار اِنت۔۔۔    

 ھِندو ءُ ھندستان ءِ ھوالہ ءَ ھم ما گِند انت کہ پاکستانی نبشتکارانی ھرابیں واھگ زاھر بنت ءُ مدام آہاں چہ مسلماناں چہ کمتر لیک انت ءُ وتی دشمن زاھر کن انت تاکہ ملک ءِ مردم ھر وھد ءَ مزہبی جیڑھاں دُچار بہ بنت۔۔۔۔ کے کے ءِ گشگ اِنت کہ اے کتابانی سوب  ءٙ چاگرد ءِ تہا تہنا ڈمیز (Dummies) جوڈ بوگ ءَ اِنت، اِشاں چے ھچ وڈیں ذھنی دیمروی نہ بوھگ ءٙ اِنت۔۔ اگاں اے نودربر ءُ مھلوک وتی راستیں راجدپتر ءِ پجار ءٙ نکنت ءُ وتی قبلہ ءٙ دُرست نہ کنت گڈا اے مردم سرجمیں وھد ءَ دروگیں راجدپتر ءُ مزہب ءِ نام ءٙ رد دیٙگ بنت۔  

 اِشانی سوب ءٙ اے نظام ءِ تہا ھچ وڈیں گہتری اتک نہ کنت۔۔۔

گڈ سر ءٙ نبشتہ کار گشیت کہ بایدیں اے ملک ءِ مھلوک وتی زمہ واری ءٙ بِزانت ءُ وتی راستیں راجدپتر ءِ پجار ءٙ بکنت۔۔۔ اِشاں چے آیانی چُکّانی باندات روژناہ بیت ءُ اے نظام ءِ تہا ھم گہتری اتک کٙنت۔۔۔!