جون ایلیا ءِ جَنِک ءِ ءُ بلوچانی گِلہ یک انت

جون ایلیا ءِ جَنِک ءِ ءُ بلوچانی گِلہ یک انت۔

جاوید بلوچ                              

گوستگیں روچاں اردو ءِ شائر جون ایلیا ءِ نوزدہمی سال روچ ءَ آئی ءِ جَنِک فینانہ فرنام ءِ نام چہ یک نبشتانکے دیم ءَ اتک۔ اے روچ ءَ جون ایلیا ءِ سُتکگ دلیں دوست داروک آئی ءِ شئراں شنگ کنگ ءُ آئی ءَ را ساڑاھگ ءَ اِت انت بلئے آئی ءِ جند ءِ جَنِک چہ آئی ءَ گِلہ دار اَت۔ ءُ اے روچ ءَ وتی گِلھانی شنگ کنگ ءِ آئی ءِ مول ءُ مراد ھم ھمیش ات کہ جہان بہ زانت کہ جون ایلیا ءَ را یک اے وڑیں دروشمے ھم بوتگ۔ 

جون ایلیا ءَ گوں وتی شئراں پہ وت ءَ نوکیں پدریچ ءَ (ءُ ھاس اشانی مزنیں کساسے کالج ءُ یونیورسٹیانی نودربرانی تہ ءَ) یک مزنیں شرپے ھست۔ اے تبکہ جون ءَ را مرشد ءُ وت ءَ آئی ءِ مرید سرپد بنت۔ بلئے جون ءِ جَنِک ءَ اے گپ سک تَوریت کہ آئی ءِ دوست داروک پرچا آئی ءِ دومی دروشم ءَ چہ نہ زانت کار انت۔ پرچا آ اے نہ زان انت کہ جون یک بے زمہ واریں مردمے بیتگ۔ جون یک سُتکگ دلیں شائرے وَ بوتگ بلئے یک شریں لوگ واجھے نہ بوتگ۔ آئی ءَ شئر وَ نبشتہ کُتگ بلئے یک پتے نہ بوتگ۔ آئی ءَ شراب ءِ ورگ ءُ نشہ بوھگ ءَ را چہ وتی چاگردی زمہ واریاں گیشتر ارزشت داتگ۔ آئی ءِ شئر ءُ موال بوھگ ءَ وَ مردماں دوست داشت، اے موال بوھگ ءِ سبب ءَ آئی را مُرشد گُشگ بوھگ بئیگ ءَ انت گڑا پرچا آئی ءِ بے سُدی ءِ سر ءَ گپ نہ بیت۔ اے درست ھما گِلہ ءُ گپ اِت انت کہ جون ءِ جَنک آئی ءِ نوزدہمی سال روچ ءَ گُشگ ءَ انت۔ 

اسل ءَ اے گِلھانی مول ءُ متا ھچ بَر اے بوت نہ کنت کہ یک جنکے چہ وتی مُرتگیں پِت ءَ نہ وش اِنت۔ چیاکہ آئی ءِ رد ءَ آھانی پت وَ پہ آہاں زند ءُ ھیاتی مُرتگ بوتگ۔ ناں جون ءَ وتی جن ءُ چُکّانی ھیال بوتگ ءُ ناں وتی چاگردی زمہ واریانی۔ آ ایوک یک شائرے بوتگ کہ آئی ءَ شراب وارتگ ءُ شئر نبشتہ کُتگ۔ مرچی اردو لبزانک ءَ گوں مھر داروکیں بازیں مردماں آئی ءِ شئر دوست بنت ءُ باز آئی را ایوک انسٹاگرام ءُ وٹسپی اسٹیٹسی شائرے گُشیت۔ بلئے آئی ءِ جنک آئی را یک بے سوبیں ءُ بے سُدیں مردمے گُشگ ءَ اِنت۔ ءُ آئی ءِ نوزدھمی سال روچ ءَ اے گپانی کنگ ءِ مول ءُ مراد ھمیش انت دگہ کسے اگاں چہ وتی مُرشد ءُ موالیں اے شائر ءَ چہ متاسر بیت ءُ وت ءَ ھم سُتکگ دلے کنگ لوٹیت گڑا بہ زانت کہ آئی ءِ مُرشد چونیں بےسُدیں ءُ بے زمہ واریں مردمے بوتگ۔ آئی ءَ کدی ھم وتی لوگ ءَ وتی جَن ءُ چُکاں آ مھر نہ دات کہ آ ھم آئی ءَ را اگاں مُرشد ءُ بزرگ نہ گُشاں بلئے وتی پِت وَ بہ گُشاں۔ 

فینانہ فرنام ءِ دراجیں نبشتانک ءَ جون ایلیا ءِ زند ءِ یا بہ گُش ئے آئی ءِ لوگ ءِ ءُ چُکّانی یک درد ناکیں کسہ یے مان اِنت۔ ءُ نبشتانک یک دگہ جون ایلیایے دیم ءَ زائر کنت کہ آئی ءَ چو اے وھد ءِ لہتیں بلکیں گیشتر بلوچ ندکارانی وڑ ءَ انچیں رنگے ءَ پدر کنت کہ آ ایوک اسٹیجانی سر ءَ شئر وانگ ءَ انت، تاک ءُ ماہتاکانی تہ ءَ آہانی شئر نبشتہ انت یا شراب ءِ دیواناں زائر انت۔ آہانی چاگردی زمہ واری، راجی زمہ واری ءُ چاگرد ءِ تہ ءَ ھست بوھگ ءِ بابت ءَ آہاں جُست بکن ئے گڑا ترا ھمے پسو رسیت کہ ما وَ اھوالکار نہ انت۔ ءُ لبزانک چہ اھوالکاری ءَ گستا دگہ یک پڑے۔ بلئے اگاں آہانی اسٹیجانی سر ءِ شئر ءُ گچین کُتگیں روچانی مشائرہ اگاں آہاں چو نیرو ءَ نہ کن انت کہ روم سرجم ءَ سُچگ ءَ بیت ءُ نیرو نَل چنت ءُ وت ءَ کر کنت۔ گڑا آھانی نزیک تریں مردمے (آھانی راج ءُ آؤکیں پدریچ) چو جون ایلیا ءِ جنک ءَ آہاں ملامت کنت۔ 

ءُ ھمے وڑ انت پرچا کہ چُشیں درور بلوچی ءَ زیتاں ترا گندگ کاینت کہ بلوچی ءِ لہتیں ندکار ءِ بیران بوھگ ءِ ھال کیت کہ آ وتی زمانگ ءَ آہاں سرکاری مراگش ءُ اسٹیجانی سر ءَ وتی نبشتانک ونتگ انت۔ ءُ بلوچی ءَ نبشتہ ھم کُتگ بلئے اے جاوراں کہ بلوچ راج دیمپان انت آھانی کار چے بوتگ انت ۔۔۔۔ ایوک یک ھاموشی یے یا نہ زانتکاری ءِ سبب ءَ بہ گند ئے بلئے ھچ نیست پمیشکہ اے وڑیں مردماں آیانی سرکل بہ گند ئے یات بکن انت بلئے آ پہ راج ءُ آؤکیں پدریچ ءَ پہ درآمد بنت انچش درآمد چُش کہ جون ایلیا مرچی پہ وتی چُکاں یک درآمدیں نامے کہ آئی ءَ ایوک شراب وارتگ، شئر نبشتگ ءُ بے سُد بوتگ۔