ڈاکٹر مروچی ءَ پد تئی دوزواہ، گریب ءُ نزوریں مردم چورو بیتگاں

ڈاکٹر مروچی ءَ پد تئی دوزواہ، گریب ءُ نزوریں مردم چورو بیتگاں۔

نبشتہ کار: سلیمان ہاشم 

ڈاکٹر عزیز بلوچ یک انسان دوستیں سروکے ات۔ گوں مھلوک ءَ سک نزیک ات۔ نزور ءُ نیزگارانی دوزواہ ات۔  پوریاگرانی ھمبراہ ات۔

 آئی ءَ وتی زندمان ءِ اے ابدمانیں سپر ءَ گریبی ءُ گژن باز نزیکی ءَ گوں دیستگ ات۔

اے ھما وھد اَت کہ آ وھداں ھدامرزی یک گریبیں نودربرے بیتگ ات- آئی ءَ اے گپ مدام گوشتگ ات کہ انچیں گرانیں وھدے منی سر ءَ اتکگ ات کہ من وتی  داکتری وانگ مھتل کت ءُ کتاب ءُ دگہ ھرچ ءُ درچ ءِ درگت ءَ من سک نگیگیں جاورانی آماچ بیتگ ات اَنت -ھمے نگیگیں جاورانی سوب ءَ من  دبئی ءَ شتاں چیزے وھد ھموداں مزوری کت  ءُ پد ءَ واتر بیتاں - پد ءَ میڈیکل ءِ پڑ ءَ داخلہ  زورگءِ ھاتر ءَ من ءَ بازیں ھڑ ءُ جنجالے ءُ مشکلے دیم ءَ آتک - بلے من وتی دل دور نہ دات - پد ءَ وتی وانگ برجاہ داشت۔ 

 ءُ ھما روچاں من چہ باتن ءَ ھمے پیسلہ کت کہ اگاں من ڈاکٹرے جوڑ بیتاں تہ من پہ گریب ءُ نیزگارانی جان سلامتی ءَ، آیانی اے وڑیں میڈیکل جیڑھانی گیش ءُ گیواری ءَ، آیانی الاج ءُ ایندگہ ناوشیں ساھتاں گوں آیاں الم وتی بھرشت ءَ شریں وڑے ءَ ھوار کناں ۔ 

ڈاکٹر وتی مکسد ءَ سوبین بوت ءُ آئیءَ ڈاکٹری دربرت-۔ 

 بلے مروچی آ چہ مارا چے باز دور شتگ ۔ نی ما کجا چہ ڈاکٹر ءَ توار کت بکن ایں ۔

 اے دگنیا پہ ما ادارکی دگنیایے۔۔ 

ما ھما چاگرد ءِ تہءَ رستگیں ءُ مزن بیتگ ایں کہ آ چاگرد پد منتگی ءِ آماچ انت۔  مھلوک لب ءُ لالچ ءُ زَر ءِ پشت ءَ کپتگ اَنت۔  

مہر ءُ دوستی نی آسر بیتگ۔ 

ڈاکٹر عزیز اے چاگرد ءِ یک رژناہ پگریں ھما قندیل ءُ کارست ات  کہ آ پہ وتی اے لگتمال ءُ بے وسیں راج ءَ  یک بے بھائیں سرے ءِ ھواری ءَ یک  دردواریں انسانے ات۔ آئیءَ وتی تیوگیں زند ءِ گیشتریں بھر پہ مھلوک ءِ خدمت ءَ گوں دلپاکی ءَ گوازینتگ ات۔ 

 ھما روژناہ پگریں چراگ ءِ وڑ ءَ ات کہ چراگ مدام روک انت- وتءَ سوچیت بلے مھلوکءَ روژنائی دنت۔ 

چوشیں شریں سرانی لڈگ ءُ روگ ءُ دومی پد ءَ اے وڑیں نہ رستگ ءُ ناتوامیں چاگرداں سک  گران انت ۔اے رنگیں چاگرد چُشیں سرانی بیرانی ءَ چورہ بنت۔ ائی ءِ اِلگ ءُ روگ ءَ آئیءِ اے وھد ءُ   ساھتاں سپر کنگءُ لڈگ ءَ گم دلاں توسین ایت ۔ 

 

 اے ھما مردم بیتگ کہ ھر کسی درد ءُ گماں شریدار بیتگ۔ انسان دوستیں، انسانانی کمی ءُ آیانی دوری سک تورین ایت۔ اے وڑیں کارستانی کمی الم مارگ بنت ۔ 

من ءَ مدام آئی ءِ یات گیر کاینت مدام پدی زر ءِ تیاب ءِ لمب ءَ، کدی دوچار کپتگیں گڈا مدام ھال ءُ ھوال ئے کتگ ات۔ 

اے وڑیں دگہ بازیں مردمے ھمے تیاب ءِ لمب ءَ گوستگ - اشانی تہ ءَ یکے ڈاکٹر ہم ھوار بوتگ- بلے آیاں گوں مھلوک ءَ چُشیں مھر ءُ دوستی یے نہ بوتگ۔

  آئی ءِ اے نمیرانیں کرد ءَ را پراموش کنگ سک گران انت۔

آ نا ایوک ءَ ڈاکٹرے بوتگ - بلکیں اے درستانی ھوار آ یک زانتکاریں، سیاسی کارکنے ھم بیتگ۔ باز رند ءَ  آئیءَ جیوز ءِ کارگسءَ ،ءُ باز رند ءَ آر سی ڈی سی کلب ءَ سیاسی چاگردی ڈیبٹ ءُ تقریراں وتی ھیال ءُ لیکہ پہ جوانی گوں زانشتی ءُ سائنسی منّاکاں گوں مھلوک ءِ دیم ءَ ایر کتگ اَنت ءُ مھلوک ءَ را سرپدی داتگ -

آئی ءِ نماز جنازہ ءَ بلوچستان ءِ کنڈ، کنڈ ءَ چہ آئیءِ لوٹوک اتکگ اِت اَنت- وھدیکہ آئیءِ نماز جنازہ وانینگ ءُ ھلاس کنگ بوت۔

تہ ھما ملا ءَ نماز جنازہ داتگ ات آئی ءَ تران کت ءُ گْوشت کہ مروچی ڈاکٹر ءِ جند ءِ چک ءُ کول ءُ کٹم ءَ ھوار، ڈاکٹر ءِ ھما گریبیں  لوٹوک ھم چورو بیتگ اَنت ۔