الودع ڈاکٹر
وہاب مجید
یک ہپتگے ساری من ءُ ڈاکٹر عزیز یک تعلیمی سیمینارے ءِ تہا اولی سرپ ءَ کش ما کش نِندوک اِت اِنت۔ اکتوبر ءِ ماہ ءِ اے دومی رند اَت کہ من ءُ ڈاکٹر ساھب یک رندے پدا مراگشے ءَ ھوار اِت اِنت۔ من ڈاکٹرءَ پدا سلہ دات " ڈاکٹر' نوں تو ملازمتءَ چہ ریٹاہر ئے۔ وتی آٹو باہیوگرافیءَ بہ نویس"۔ دراہیّنتے "اگاں زندہ موہ دات ۔ گُڈا۔۔۔من گُشت ڈاکٹر، ھُدا ترا صحت بہ دنت۔ پدا من جُست کُت۔ ڈاکٹر، تئی زندءِ کریٹیکلیں وھد کُجام بوتگ؟ گُشتے ہما وھد کہ سیاستءَ مارا "ماو ماو "ءِ نام بندگ بیتگ اَت۔
مئے اے گِند ءُ نندءَ چہ پیش یکیّں ماہءَ نیشنل پارٹیءِ ڈاکٹر کہور خان ءِ وش اتکی دیوان ءَ گوادر پریس کلب ءَ منی ءُ ڈاکٹر ءِ ھال اھوال بیتگ اَت۔ من گُشت۔ ڑاکٹر تو ملٹی ڈائمنشنل شخصیتے۔ سیاست، میڈیکل، چاگردی چست ءُ ایر، ادب، وانگ ءُ زانگ، تئی شخصیت ءِ بازیں تک ءُ پہنات اَنت۔ تو کہ وتی زند، سیاست ءُ پروفیشنءِ بارہ ءَ نویس ئے گُڈا یک نیمگے بلوچستان ءِ راجدوستیں سیاست ءِ راجدپتر ءَ یک بابے محفوظ بیت اِنت ءُ دومی نیمگءَ نوکیں پدریچ ءَ بازیں سرپدیے رسیت دانکہ آ وتی سیاسی ءُ چاگردی کِردءَ جوانیءَ پیلو بکن اَنت۔ ڈاکٹر ءَ منی گپّاں گوں تِپاک کُت۔۔۔ بلے انچش کہ ڈاکٹرءَ گُشتگ اَت۔ انچش بوت. زندءَ ڈاکٹر موہ نہ دات ءُ ڈاکٹر وتی ابدی ھنکینءَ شُت۔
ڈاکٹر عزیز راجدوست ءُ ترقی پسندیں ہما سیاسی ءُ نظریاتی گُڈّی کامریڈانی لڑّ ءَ ھوار اَت کہ آھاں ہپتاد ءُ ہشتاد ءِ دھکّءَ سوویت کیمپ ءِ اُمیدءَ بلوچستانءَ سیاسی بدلی آرگ ءِ واب دیستگ اَت۔ وتی نودربری ءِ وھداں ڈاکٹر غنی پرواز ءَ گوں سیاسی ءُ نظریاتی نزّیکی کنت ءُ دیمتر ءَ آھانی ہما وھد ءِ بی ایس او ءِ سینئر سنگتاں گوں اختلاف پیداک بنت۔ بی ایس او غنی پرواز ءُ ڈاکٹر عزیز لابیءَ "ماوسٹ" قرار دنت ءُ ہما وھد ءِ بی ایس او ءِ سنگت ہر کُجام جاہ ءَ پرواز لابی ءِ مردماں کہ گِند اَنت آھاں ماو ماو توار پِر جن اَنت۔
اے طوفانِ بدتمیزی ءِ ھلاپءَ ءُ وتی موقفءِ ھکّءَ واجہ غنی پرواز ہما زمانگءَ "ماو ازم کیا ہے؟ ءِ سرھالءَ یک کتابے ہم نویس اِیت۔
وھد گوست. دیمتر ءَ ہمے سوویت یونین کہ بی ایس او ءُ پروفیسر غنی پرواز ءِ سنگتانی پِکری ءُ نظریاتی کلات ات آ پروشت ءُ پروش ءِ آماچ بوت۔
بی ایس او ءِ پارگ ءُ سینیئریں سنگتاں بِندات ءَ بی این واہی ایم، پی واہی ایم ءُ پدا بی این ایم جوڈ کُت ءُ ووٹ ءُ الیکشنءِ سیاستءَ پاد مان دات۔ پدا وزیر ءُ گزیر جوڑ بوت اَنت۔ دومی نیمگءَ غنی پرواز ءُ ڈاکٹر عزیزءِ بازیں سنگتے عملی سیاستءَ چہ دست کش بوت ءُ سرکاری ملازمتانی بھر جوڈ بوت اَنت۔ ہماہاں کہ ملازمت نہ کُت یا نہ رست اِش آ ہم ووٹی سیاست ءِ بھر جوڈ بوت اَنت ءُ مارکسزم ءُ لیننزم ءِ رومانسءِ بامءَ جورکاں دات۔
منی ءُ ڈاکٹر ءِ پجّاروکی نوْدءِ دھکءَ چہ بِندات بوت۔ وھدے کہ ما لہتے سنگت اسٹوڈنٹس پالٹکسءَ چہ پد پی این پی ءَ جواہن کنیں۔ ڈاکٹر ساھب پیسر ءَ چہ پارٹیبءِ ہندی سرگرمیں رھشونے ات۔ آ وھدءَ میر بیزن بزنجو پارٹیءِ صدر ءُ حفیظ پیرزادہ جنرل سکریٹری اَت۔ اے وھدءَ ناکو حُسین اشرفءِ دومی ایم پی اے شپ ءِ گُڈّی سال ات۔ ڈاکٹر ءِ گوں ناکو حُسین ءُ کپٹن سلیمان ءَ سکیّں نزیکی ءُ سیاسی سیادی یے است ات۔
آ وھداں ڈاکٹرءَ مُلا موسیٰ موڈ ءَ کلینکے است ات کہ ڈاکٹر ءُ شے علی بیگاہءَ نِشت اَنت۔ اُودا دریاورد ءُ لس مھلوکءِ میڈیکل چیک اپءِ ہمراہیءَ مئے وڈیں جونئیراں ملکی ءُ چاگردی جاورھالانی سرا ڈاکٹرءِ را جُست کُت۔ ڈاکٹرءَ گوں نزیکی ءُ آئیءِ شخصیتءِ تجزیہ کنگءَ پد من اے ماراِتگ کہ ڈاکٹر یک بے غرضیں انسان دوست ، بلوچ دوست ءُ ترقی پسندیں رژنا پگریں انسانے ءُ آہیءَ وتی ھاکءَ گوں بے پناہ مھر ات۔
من ءَ یات اِنت یک بیگاہ یے ما لہتے سنگت ملا موسیٰ موڈءَ ڈاکٹر ساھبءِ کلینکءَ نِندوک اِت اِنت۔ اے روچی ڈاکٹر این جی اوزانی سرا سکّ زہر ات. گُشت ئے ہمے ملکی ءُ درملکی این جی اوز مئے چاگردءَ روچ پہ روچ ڈی پولیٹائیز کنگءَ اَنت۔ وانندہیں سیاسی مڈل کلاس مزنیں پگاراں گوں ہمے این جی اوزانی بہر ءُ غیر سیاسی جوڈ بوھگءَ اِنت۔ اے رحجان بلوچ چاگردءَ پہ مزنیں تاوانے۔ ما اے بابت ءَ ڈاکٹرءَ گوں ڈیبیٹ کُت۔ منی ھیالءَ ڈاکٹرءِ گپ داں یک ھدّے ءَ راست اِت اَنت بلے اگاں ما "سازشی تھیوری" ءَ یک منٹے ءِ واستا یک کِرّا ایر بکن انت گُڈا این جی اوزانی عمومی مول ءُ مراد ہم چاگردی بدلی ءُ معاشرہءِ اصلاح اِنت۔ گو کہ اے بدلیءِ ھدّ ءُ اثر سیاسی پارٹیانی مقابلہءَ کم اِنت پر چا کہ سیاسی پارٹی اقتدارءَ کیت۔ آئیءَ دُراھیں ریاستی ادارہ گون بنت۔ آ لس مھلوکءِ گہتریءَ پہ پالیسی جوڈ کنت ءُ اے پالیسی چاگردءِ یک پوریاگرے ءَ بِگر داں کاروباری ٹاہیکونےءَ متاثر کنت۔ بلے ایشیءِ متلب اِش نہ اِنت کہ چاگردءِ دُراھیں تک ءُ پہناتانی مردم المّ عملی سیاست بکن اَنت۔ البت سیاسی شعور چاگردءِ ہمک مردم ءِ تہا بیگ الّمی اِنت دانکہ آ وتی واستا وژنری ءُ ایمانداریں رھشون ایلیکٹ کُت بکنت۔
ہر کسءَ شخصی آزادی است۔ اگاں کسے عملی سیاست کنگ لوٹ اِیت یا این جی اوزانی بہر جوڈ بیگ لوٹ اِیت۔۔ کسے پروفیشنل زندگی جواہن کنگ لوٹ اِیت یا کسے وتی قلمءَ کارمرز کنت۔۔۔ بلے شرت ہمیش اِنت کہ آھانی ہر عمل وتی چاگرد ءُ لس مھلوکءِ آسراتی ءُ دیمروہیءَ پہ بہ بیت۔ چاگرد سیاست، معشیت، ادب، کاروبار ، لیب ءُ گوازی، آرٹءُ مزہبی سرگرمیانی نام اِنت۔
وھد گوزان ات. من ءَ ڈاکٹرءِ سیاسی زندءِ دگے یک کریٹیکل ایونٹے یات اِنت۔ اے سال اِنت 1998۔ اختر مینگل سی ایم بلوچستان اِنت۔ کوہٹہءَ بی این پیءِ مرکزی کنونشن اِنت۔ بند اجلاسءَ پارٹی پروشیت۔ گوادرءِ سنگت کپٹن سلیمانءِ رھشونیءَ میر بیزن ءُ میر حاصل خان لابیءِ ہمراداری کن اَنت۔ بلے ڈاکٹر عزیز گوادرءِ یکّیں ہما مردم ات کہ آ بزنجو برادرز ءُ وتی کُہنیں سیاسی سنگت کپٹن سلیمانءَ گوں اختلاف داریت ءُ اختر مینگلءِ بی این پیءِ بھر ے جوڑ بیت ءُ پدا پُشتءَ چّکے نہ جت۔ ہما وھدءَ بِگر داں وتی گُڈّی ساھتاں آ سردار اختر مینگلءِ پارٹی ءِ سیاست ءُ پِگرءِ منوک اَت۔
راستیں اِش اِنت کہ ڈاکٹرءَ بلوچءِ روایتی ءُ پدمنتگیں چاگردءِ اوشتوکیں آپءِ تہا سِنگے دور داتگ۔ مرچی ہمے اوشتوکیں آپ میزاں میزانءَ دیم پہ وتی منزلءَ جُنزان اِنت۔ منی ھیالءَ بلوچءِ چاگردءَ ڈاکٹرءِ سیاسی ءُ چاگردی کنٹریبیوشن ءُ خدماتاں سلام ءُ خراجِ عقیدت پیش کنگءِ شر تِریں وڈ ءُ پیم ہمیش اِنت کہ بیست ءُ یکمی کرنءِ بدل بوتگیں سیاسی ءُ چاگردی لوٹانی مُتابکءَ ڈاکٹرءِ بلوچ ءُ انسان دوستی، وطن دوستی، ترقی پسندی ءُ رُژنا پگریں ھیال ءُ لیکہاں ما وتی بکن اِنت ءُ سیاسی ، ادبی ءُ چاگردی چست ءُ ایرانی تہا بھر بہ زور اِنت دانکہ بلوچءِ بھتءِ سیاہ ءُ تہاریں شپ ھلاس ءُ وش ءُ سارتیں سہبے ءِ بِندات بہ بیت۔
No comments:
Post a Comment