گوادر ءِ نندانک ءِ نزور تریں روچ

گوادر ءِ نندانک ءِ نزور تریں روچ

      جاوید بلوچ

 

گوادر ءَ لس مردمانی نندانک ءِ 22ئمی روچ ات۔ چد ءُ پیسر 21 روچ ءَ اے نندانک گوادر ءِ بُنکی ھک، مکران ءِ ءُ بلوچستان ءِ ھکّانی زھرشانی نندانک ات۔ اشیی ءِ تہ ءَ ھمک آؤک ایوک یک لس بلوچے ات۔ ادا بلوچ شائر، نودربر، ازمکار ءُ زند ءِ ھمک پڑ ءَ گوں سیادی داروک پہ ھُب ءُ واھگ اتکگ ات انت۔ بلے 22ئمی روچ ءِ بیگاہ ءَ نندانک ءِ دروشم چٹ مٹ بوت۔ ساونڈ سسٹم ءُ اسپیکرانی سوت ءُ اوگاماں چہ انچو سما بوت گُش ئے جماعت اسلامی ءِ گچین کاری ءِ جلسہ یے بہ بیت۔ 22ئمی روچ ءَ مردم اتکگ ات انت گوں مزنیں جوزگ ءُ جوشے ءَ بلے پدا آھانی دیم تھار ات انت۔ ھما زرمبشت کہ مولانا ھدایت الرحمٰن ءَ بندات کتگ ات، مردماں یک دھکے ءَ پد سیاسی سنچ ءُ جوزگے داتگ ات ئے آ نزور تر ات۔

واجہ سراج الحق ءِ تران ءَ گُش ئے زاناں گوادر آل پارٹیز ءِ کار کُت۔ گوادر آل پارٹیز ءِ ھاموشی ءُ چیروکائی اے نندانک ءِ بگیری ءَ گپ ءُ تران کنگ ءَ ابید ھم لس مردم ءِ جوش ءُ سیاسی سنچ روچ پہ روچ گیشتر بوان ات بلے مولانا سراج الحق ءِ تران ءَ ھما آل پارٹیز ءِ کار کُت۔

اگاں سراج الحق ءِ تران کسے ءَ ھم گوش داشتگ ءُ آئی ءَ دگہ کسے جُست بہ کنت کہ سراج الحق ءَ چے گُشت؟ گڑا مردم ھئیران بیت کہ چے بہ گُشیت۔ ھما گپ، ھما واز ءُ نسیت ءُ ھما بیان کہ نواز شریپ ءُ فضل الرحمٰن ھم ھمے گپاں کن انت۔ بلاول ءُ مریم ھم ھمے گپاں کن انت۔ سراج الحق ءِ سرجمیں تران ءِ اشکُنگ ءَ ھمے سما بیت کہ واجہ سے روزہ یے ءَ اتکگ کہ بلوچاں دین ءُ دنیا ءِ نصیحت ءَ کنگ ءَ انت۔ یا ھما تران کہ ووٹ ءِ وھد ءَ مسلم لیگ نون، پی پی ءُ جمعت العلماء اسلام بلوچستان ءَ کاینت ءُ کن انت اِش۔ اے تران یک روچے ءِ واستہ اسلام آباد ءُ لاھور ءِ ھما مردماں دوست بنت کہ آ ھمے پارٹیاں گوں سیادی دار انت پدا بلوچستان ءُ اسلام آباد ءِ راہ جُتا بنت۔

واجہ سراج الحق ءَ من جُست کُت کہ بلوچ نودربرانی یک مزنیں گلہ یے ھمیش انت کہ آھاں یکے وَ ریاست وانگ ءَ نیلیت ءُ دومی مدام آ ھمے زنگ ءَ جن انت کہ پنجاپ ءِ مزنیں شاہ دربرجاھاں جمعت ءِ نودربرانی مارا لٹاں کُشت۔ واجہ ءِ پسو ھما ات کہ ریاست ءِ بیانیہ انت۔ ریاست ءَ روچ ءِ مرچی وتی پنچیں مزنیں آپریشنانی سر ءَ پشومانی پیش نہ داشتگ، بلوچستان ءِ تہ ءَ بُنکی ھکّانی پادمالی ءِ سر ءَ وتی جرم نہ من اتگ۔ انچو واجہ سراج الحق ھم گُشیت بلوچ نودربر دروگ بند انت ءُ قوم پرست آھاں پرماینت کہ انچش بہ گُش ات۔ 

مروچی گوادر ءِ اے زرمبشت ءِ اے کساس مزن بوھگ ءِ سبب وت ھمیش انت کہ اے وت ءَ قوم پرست گشوکانی بے سوبی انت۔ مردم چہ آھاں نا امیت انت کہ لس مردماں پہ وتی بُنکی ھکّاں یک زرمبشے بنا کُتگ۔ مرچی ھما سنا بلوچ کہ شش ماہ پیسر آئی ءِ اسمبلی ءِ تران ءُ بیان بلوچ نودربراں پہ ھُب شنگ کتگ انت بلے وھدے آئی ءَ ءُ آئی ءِ پارٹی ءَ بجٹ ءِ واستہ سرجمیں بلوچستان ءَ دگ بندیں زھرشانی ءِ جار جت۔ کس ءَ کمار نہ کُت، ھمے قوم پرست جیل ءَ وپت انت ءُ سجی وارت اش بلے بلوچاں  زانت کہ مئے درد وار نہ انت۔ بلوچاں ھچ نہ گُشت۔

نیشنل پارٹی ءَ گوادر ءِ ملا موسی موڑ ءَ زھرشانی گدانے جت۔ لس بلوچ زالبولاں گدان کشت ءُ پروشت کہ ما وت زھرشانی کن انت۔ مارا شمئے ھمراہ داری نہ لوٹیت۔ واجہ سعید فیض ءَ آل پارٹیز ءِ ھمرائی ءَ دو روچ پیسر پریس کانفرنس کت کہ ما ھم گوادر ءِ ھکانی لوٹ ءَ کنگ ءَ انت۔ آ پریس کانفرنس انگت سوشل میڈیا ءَ ایر انت اود ءَ بلوچانی کمنٹس وت پدر کن انت کہ راج ءَ آھاں چے پسو داتگ۔ 

بلوچ ءِ نوکیں پدریچ ءَ کسے ھم دو قرآنی آیات ءُ جزباتی ترانے ءَ گوں نی ریپینت نہ کنت۔ اے گپ مولانا ھدایت الرحمن بلوچ ءَ زانتگ پمیشکہ آئی ءَ وتی پارٹی ءِ بیرک ایر کُتگ گوں لس بلوچاں بُنکی ھکّانی لوٹ ءَ میدان ءَ ایر کپتگ۔ اگاں ناں ھمے جماعت اسلامی وت گوادر آل پارٹیز ءِ بھر بوتگ ءُ آھاں پانزدہ پانزدہ روچ ملا موسی موڑ ءَ زھرشانی نندانک داتگ بلے آ نندانکاں گپانی گوشداروکاں چہ گیش تران کنوک بوتگ انت۔ ءُ لس مردماں یک ساھتے ھم آھانی کر ءَ روگ دوست نہ داشتگ۔ 

گوادر ءَ ھوار سرجمیں مکران ءُ بلوچستان ءَ اے نوکیں زرمبشت ءَ یک امیت ءُ اوستے پیداگ کُتگ۔ ماسی زینی ءِ وڑیں بلوچ زالبولاں شعور داتگ، گوادر ءِ ازمکار ءُ ورناہ گوں سیاسی ءُ چاگردی جیڑھاں نزیک کُتگ انت۔ مکران ءِ لس پوریاگر ءُ بلوچستان یک برے پدا ڈن ءَ کشتگ، آھاں موبلائیز کُتگ۔۔۔ زالبول ءُ چُکانی تہ ءَ اے جوش پیداگ کتگ کہ کرپٹ مافیا ءُ دزانی نام ءَ بہ گر انت۔ دریاورد وتی ھکانی جُست ءَ بہ کنت۔ ڈرائیور ءُ بزگیں بے وانندھیں بلوچ ھم سیاسی بہ بیت۔ اشیی ءِ تہ ءَ یک درسد ھم جماعت اسلامی ءِ دست مان نہ انت۔ چیاکہ اگاں جماعت اسلامی ءَ اے سکت مان بوت انت گڑا اے نندانک ءِ اولی روچءَ اشانی بیرک بوتگ ات انت۔ اے لس مردمانی ءُ "حق دو تحریک" ءِ جھد انت۔ 

بلوچانی ربیت ءُ دودانی بھر انت کہ کسے ھم کیت آ چے گُشیت۔ آئی کس نہ داریت۔ مرچی اگاں وت ءَ قوم پرست گُشوکیں سروک ھم ادا بئیتکین انت ھم آھاں وتی تران وتی وڑ ءَ کُتگ ات انت۔ انچش کہ نیشنل پارٹی ءِ سروک اتکگ انت۔ آھاں تران ھم کُتگ۔ آل پارٹیز کیچ ءِ سروک ھم اتکگ ات انت آھاں ھم تران کتگ ات۔ بلے اے نندانک ءِ سوت ءُ اسپیکرانی توار، ادا گُشگ بوتگیں اوگام ءُ نعرہ اے وڑ نہ ات انت کہ 22ئمی روچ ءَ کنگ بوتگ ات انت۔ اے دھرنہ ءِ انتظامیہ ءَ وت ءَ جماعت اسلامی ءِ رنگ داتگ ات۔ ءُ ھما کار کُت کہ ھمائی ءِ ترس لس مھلوک ءِ دل ءَ انت۔ ھما پرپیگنڈہ ءَ را سوبین کنگ ءِ یک موقعے دات کہ ھمائی ءَ بے سوب بوتگیں آل پارٹیز لوٹگ ءَ ات کہ بکنت۔ 

"حق دو تحریک" ءِ 21 روچ ءُ ایوک 22ئمی روچ ءِ بیگاہ ءَ یک مایوسی آرت۔ ھما جوزگ ءُ جوش کہ لس دریاورد ءُ پوریاگر ءِ یا لس بلوچ ءِ دل ءَ ودی بوتگ ات۔ آھانی دیم ءَ نی پنجاپ ءِ یونیورسٹیانی تہ ءَ بزگیں بلوچ نودربرانی اکساں۔۔۔۔ ھما سیاسی سنچ ءُ شعور مردمانی تہ ءَ 21 روچ ءَ پیداگ بوتگ ات نی آیانی دیم ءَ فضل الرحمن، بلاول ءُ مریم نواز ءِ پی ڈی ایم ءِ تران پیداگ انت۔ کہ انگت اینچو سال ءِ گوزگ ءَ رند ھم اے پارٹی ھمے سمج انت کہ وتی یک کلاک والا ترانے ءِ تہ ءَ 25 منٹ ھندوستان ءَ نازین آں، 25 منٹ مسلمانیت ءِ درس ءَ دیاں، دگہ نیم کلاک بلوچستان ءِ سوئی گیس، ریکوڑک ءُ سیندک ءِ نام ءَ گر آں بلوچ رازی بنت۔ ۔۔۔۔

بلوچستان ءِ جیڑہ ھما انت کہ آھاں اے "حق دو تحریک" سوب مند کُتگ۔ اے زرمبشت لس بلوچ ءِ بُنکی ھکانی جیڑہ انت۔ اشیی ءَ گوں دگہ مُلکے ءِ نازینگ ءُ روایتی گپاں کار نیست۔ بُنکی ھکّانی اے "حق دو تحریک" ءِ سوبمندی اے نہ انت کہ اسلام آباد ءَ چے جماعت اسلامی ءِ مردم اتکگ انت ءُ آھاں بلوچاں اسلام ءُ پاکستانیت سوج داتگ۔ اے وڑیں جلسہ پی ڈی ایم ءَ ھم کوئٹہ ءَ کُتگ۔ ھمے گوادر ءِ تہ ءَ دگہ پارٹیاں ھم کُتگ بلے لس بلوچانی گپ "حق دو تحریک" ءَ کُتگ۔ ءُ اے زرمبشت ءَ دارگ ءُ سوبین کنوک لس بلوچ انت۔ آھاں گوں دگاہ کنگ ءِ آسر پدا ھما بیت کہ مرچی ھمے دھرنہ ءَ ٹنگتگیں سے مردمانی اکسانی انت یا گوادر آل پارٹیز ءُ کول ءِ واجہ حسین واڑیلہ ئیگ ءَ "گوک ءِ دو ماھگ ءِ شریدارانی انت"