شر رنگ تریں بد رنگ

شررنگ تریں بدرنگ

نصرت آزاد

1876 

یک جنکویے ودی بیت کہ آئیءِ نام میری این بیون بیت۔ آئیءَ یک بیماری یے گیپت، آ بیماری مردمءِ دیمءِ ردومءَ ھراب کنتءُ مردم بدرنگ بیت۔ بنداتی زمانگءَ میری این بیون انچو بدرنگ نہ بیت پمشکا آ گوں تھامس بیون نام ئے مردے ءَ سیر کنت۔ آہاں چار چُک بیت۔ چارمی چُکءَ پد تھامس بیون مر ایت۔

میری این بیونءَ دگہ زر دیوک نہ بیت پمشکا آ وتی چاریں چُکانی رودینگءِ واستہ رؤت سرکسےءَ (Circus) کار کنت۔ آؤدءَ اشیءِ کار ایوکءَ ھمے بیت کہ آ نندیتءُ سئیلءُ سوادءَ اتکگیں مردُم آئیءَ چار انتءُ آئیءِ بدرنگیءِ سرءَ کند انت۔ میری این بیون دُرستیں تہلءُ تُرپشیں گپاں گوں بچکندےءَ وش اتک کنت پرچا کہ آئیءَ وتی چُکانی لاپ درگیجگی بیت۔ یک زمانگے کئیت کہ میری این بیونءَ "دنیاءِ بدرنگ تریں جنین" گُشگ بیت۔ 1933ءَ میری این بیون مر ایت۔

اے کسہ مرچی فیسبُکءَ منی دیمءَ گوست، پدا من گوگلءَ چار اِتءُ نبشتہ کُت۔ من اے واستہ نبشتہ  کُت کہ اے ایوکءَ یک ماتےءِ کسہ نہ انت پرچا کہ دنیاءِ ھمک مات پہ وتی چُکاں کُربانی دنت۔ اے کسہ چاگرد ائیگ انت کہ آئیءَ وشرنگی مردُمءِ دپءُ دیماں گوں بندوک کُتگ۔ چُشیں دپءُ دیمی ھزار وشرنگیں مردُم ھست کہ آ دروگ بند انت، دُز انت، لوگ سوچ انت، بے درد انت۔۔۔۔۔ءُ چُشیں ھزار بدرنگیں مردُم ھست کہ آ دردوار انت، زرورتءِ وھدءَ کوپگ جوڑ بنت، انسان دوست بنت۔ 

شررنگی دیمءِ تہا نہ انت، شررنگی کِردءِ تہا انت۔