گوادر ءِ نندانک، یک نیمگے ءُ سوال ءُ مئے زمہ واری

گوادر ءِ نِندانک ، یک نیمگ ءِ سوال ءُ مئے زمہ واری

     شاہزیب فضل بلوچ

 بیست روچ ءَ چہ گیش اِنت کہ گوادر ءَ ھدایت الرحمان بلوچ ءِ سروکی ءَ زہرشانی نندانک برجا اِنت اے ننداک ءَ زرمبشت یے ءِ شکل زرتگ اے ننداک یا زرمبشت کہ بِندات بیت گُڑا گوادر ءِ مھلوک ءَ ابید سیاسی، چاگردی زانوگر آں هوار بلوچستان ءِ لس مھلوک اے سرپد  بیتگ ات کہ اے زھرشانی یا زرمبشت چو پیسریگیں زھرشانی ءُ زرمبشانی داب ءَ  ھکومتی جهگیرانی آہگ ءَ پد پہ نوٹیفکیشن ءُ بیسہ آں چہ ھلاس بیت، مھلوک دم بارت ءُ وتی گِساں واتر کاں ءُ اے بَری اے امکان چہ پیشی بَراں گیش ات انت پرچہ کہ اے نِنداک ءِ سروک پاکستانی مین اسٹریم مزہبی سیاسی پارٹی ءِ صوبائی واکدارے ات، بلے چُش نہ بیت ھکومتی نوٹیفکیشن اے مرد ءَ نہ من ات انت ءُ وتی لوٹانی راستیں مہنا ءَ پیلو بوھگ ءِ لوٹ کُت۔ بلوچستان ءَ دہک یے ءَ پد سیاسی ساہ ءِ پُر کُتگ ءُ سیاسی زُرمبشت چست بیگ یک رندے پدا بندات انت۔ چہ گوادر ءِ زرمبشت ءَ پیش ھمے گوستگیں یک ءُ دو سالاں پیش چست بوھوکیں زرمبشت جاوارانی سرا بیتگ انت چوشکہ گوستگیں زرمبشتانی لوٹ اوں شریں وڑے ءَ پیلو نہ بیتگ انت بلے مھلوک ءَ وتی گھگیری دیما آورتگ ءُ نوٹیفکیش ءُ بیسہ دہانی ءَ پہ واتر کُتگ۔ گوادر ءِ ھکانی زرمبشت کہ نی بلوچستان ءِ ھکانی زرمبشت ءَ بدل بیتگ آهی ءِ لوٹ هستیں نظام ءِ بلوچستان ءَ لُٹ ءُ پُل ءُ ناهکّیانی ھلاپ اِنت ءُ ریاست اے لوٹاں پیلو کنگ ءَ رازی نہ انت۔ اے زرمبشت ءِ بندات بیگ ءَ پیسر بازیں مردماں اے اُمیت نیست ات کہ زرمبشت اینچو مزن ءُ مھکم بیت۔ بازیں سیاسی مردُماں ءُ مھلوک ءَ بگندے اے گمان نہ اَت کہ اے زرمبشت ءِ سروکی ءَ یک مزن زہرگیں ایمانداریں مید یے ءِ چُک ءِ کنگ ءَ انت کہ یک مزنیں وهدے بیت کہ گوں سیاست ءَ بندوک انت ءُ درستاں چہ مستِریں گپ کہ وتی مهلوک ءِ درد ءُ تکلیف دل ءَ انت۔ 

ھدایت الرحمان بلوچ ءِ درستاں چہ مستِریں شری اش انت کہ آهی ءَ ہمک همے مردم ءَ کہ پہ بلوچ ءَ درد یے دل ءَ داریت دعوت دنت کہ بیا ات مھلوک ءِ همراداری بہ کنِت ءُ زرمبشت ءَ مھکم کنِت۔ 

ھدایت الرحمان بلوچ کہ چہ جماعت اسلامی ءَ چہ سیادی داریت پمشکہ اے گپ ءِ توک ءَ ھچ ھیرانی نیست کہ بلوچ سیاسی مردماں آهی ءِ سرا سوال چست کُت، جماعت اسلامی ءِ گوَستانک ءَ چہ زانگ بیت کہ اے بلوچ یا پاکستان ءِ تہا دگہ راج یے ءِ دردانی دوا بیت نکاں۔ ءُ بلوچ بلوچستان ءِ تها مزہبی سیاسی پارٹی ءِ رنگ ءُ هواری ءَ بھ برداشت نہ کنت۔ بلے ھدایت الرحمن بلوچ یک بلوچ راجی رھشونی ءِ سرجمیں لوٹاں پیلو کنگ ءَ انت پمشکہ بلوچ کواس ءُ زانوگر ءُ سیاسی مردم ءُ لس بلوچ نِز ءَ آ کابِلِ کبول انت۔ گوستگیں روچ ءَ جماعت اسلامی ءِ امیر مولانا سراج الحق ءِ ھایگ ءُ نندانک کُتگیں گپاں چہ پدر بیت کہ سراج الحق ءِ واستہ بلوچ ھچ ارزشت نداریت ءُ آ وتی پارٹی ءِ کیش کنگ ءَ اتکگ۔ سراج الحق ءِ ھایگ ءُ ریاستی بیانیہ ءِ پرچار کنگ ءَ گوں بلوچانی شک مھکم تِر بیت انت ءُ ھدایت الرحمن بلوچ ءَ وت ھم اے گپ ءِ زانگ بیت کہ آهی ءِ چست کُتگیں زرمبشت ءَ را ہاهی جیک کنگ ءِ کوشست کنگ بیگ ءَ انت پمشکہ سراج الحق ءِ روگ ءَ پد ھدایت الرحمن بلوچ ءَ وتی گُشتانک ءُ اهوالکاراں  داتگیں بیان ءَ گشتگ کہ اے زرمبشت ءَ گوں منی پارٹی ءَ ھچ کار نیست ءُ ما مھلوک ءِ زرمبشت ءَ ہاهی جیک بیگ نئیل ایں۔ 

ادا سوال چست بیت کہ آیا پہ سراج الحق ءِ آیگ ءَ گوں مھلوک زرمبشت ءَ ھلاس بکنت؟ پہ سراج ءِ ھایگ ءُ لهتے بے سریں ھبر کنگ ءَ ما وتی رھشون ءِ نیت ءِ سرا شک بِکن ایں؟ مئے زمہ واری چی انت؟ نگدکاری اژدری انت بلے ما پرچہ هما راہ ءَ شوہاز کنگ ءِ جهد ءَ نکنیں کہ اے زرمبشت یک منزلیں سر بہ بیت؟ آ کُجام راہ انت کہ زرمبشت چہ ہاھی جیک بیگ ءَ رکیّنگ بیت؟ 

ما جیڑهاں سیاہ ءُ اسپیت ءِ ھساب ءَ چارگ آدت کُتگ مئے گورا دگہ رنگ نیست، دے راہ نیست مئے گورا چیز یا شر انت یا ھراب انت، اگاں ھراب ایں ما شر کنگے جهد ءَ نہ کن ایں۔ سراج ءِ ھایگ ءَ پد بازیں مردم مایوس بیگ انت بلے چو نہ انت. اے زرمبشت ءَ پہ بلوچ ءِ پائدگ واستہ دیما برگ ءُ اِشی ءَ گوں گیش ءَ چہ گیش مھلوک ءُ ورنا بندوک کنگ ءُ زرمبشت ءَ چہ ہاهی جیک بیگ ءَ رکینگ ءِ ھاتر ءَ پہ اژدری انت کہ هما راجی رهشون،زانتکار، هما سیاسی مردم کہ بلوچ ءِ کُشت ءُ هون ءَ ھوار نبیتگ انت ، شاعر ءُ ادیب کہ راج آیانی منوگر انت، هما مردم کہ چاگردی رسانکدر ءَ نشتگ انت ءُ نگدکاری کنگ انت نگد زلوری انت بلے مارا ءُ شمارا لوٹیت کہ ھدایت الرحمن بلوچ ءِ کرا همے نگداں بکن ایں ءُ آهی ءَ شرتریں پیسلہ کنگ ءَ کُمک بکن ایں مئے جیڑهاں گیش گیوار کنگ ءِ زمہ واری تهنا ھدایت الرحمن کوپگ ءَ نہ انت بلکیں مئے دُرستانی زمہ واری ایں ماسی زینی نندانک ءِ مردُماں آپ تام کنگ ءَ ایں بلے بگندے شریں پیسلہ ءُ پالیسی ءِ نکاں اے کار ءَ وانندائیں ورنائے ءُ زانتکارے شرتر کت کاں۔ اے جنز ءَ چہ هما مردُم مایوس بیگ انت کہ اے جنز ءَ وتی سرپد بیگ نہ انت۔ منی نِز ءَ اے جنز انکس نزور ءُ یک نیمگ نہ انت کہ اشیی ءِ ھلاپ ءَ گپ کنگ بہ بیت  اگاں اے جُهد یک مزنیں بدلی ءِ آرگ ءِ تاکت داریت گڑُا منی نِز ءَ اے انگت وتی بنداتی بهر ءَ انت ءُ ایشی ءِ مزن ءُ مھکم کنگ ءِ زمواری لس بلوچ ءُ ھاس وانیندئیں مھلوک ئیگ انت۔ ھدایت الرحمن بلوچ ءِ ھمک سیاسی پارٹی ءِ ھمدردی آنی زورگ یک شریں گامے، هرکس کہ کیت آ گوں وت مردم کاریت اگاں بلوچ راج پرست کاینت یا مین اسٹریم ءِ دگہ سیاسی گل پہ چم ءُ سر بلے من پدا اے گپ ءَ گُشگ لوٹاں کہ اے جنز ءَ پہ بلوچ ءِ ھق ءَ دارگ بلوچ ءِ زمہ واری اِنت۔ اے جنز ءِ مزن ءُ مھکم بیگ ءَ رند کہ اے مُلک ءِ واکداریں تاکت ڑاہرکٹ اِٹ کن انت گُڈا زانگ بیت کہ کئے وتی پاداں داریت۔