گوادر نندانک ءِ سوبمندی ءُ زرانی بھر ءُ بانک ءِ تامُر
گوادر ءَ بنا بوتگیں زرمبشت "گوادر ءَ ھک بہ دئے" ءُ پدا "بلوچستان ءَ ھک بہ دئے" 32 روچ ءَ رند نندانک ھلاس بوت۔ اے نندانک ءِ تہ ءَ نوکیں چُشیں ھچ سرھال نیست ات کہ کسے بہ گُش ایت کہ اے بُن گپانی سر ءَ پیسر ءَ زھرشانی نہ بوتگ۔ بلے ھو اے کساس ءُ اے کد ءَ نہ بوتگ۔ اے زرمبشت ءِ یک مستریں سوبمندی یے ھمیش ات کہ اشیی ءَ لس مردم سیاسی جوڑ کتگ ات انت ءُ زرمبشت لس بلوچ ءِ کوپگان ات۔ اشیی ءِ بگیری ءَ ھمینچو سازش بوتگ ات ھمے کدّ ءَ اشیی ءَ را ھائی جیک کنگ ءُ وتی نام دیگ ءِ ھم جھد بوتگ ات بلے لس مردمانی مچی ءُ جھداں ھر دوئیں بے سوب کت انت۔
یک لس بلوچے ءِ بستار ءَ ادا ھر بھر زوروک ءَ اے نندانک ءُ زرمبشت ءَ بلوچ ءِ زرمبشت جوڑ کنگ ءِ واستہ کد ءِ وت باز جھد کُت۔ ادا آ دگہ جیڑھانی ھمراھی ءَ بلوچستان ءِ مستریں جیڑہ کہ اے کساس مزنیں مچی یے دیم دائم آئی ءِ سر ءَ گپ ءُ تران بوت۔ آ بیگواہ کُتگیں بلوچانی گپ ات۔ داں گُڈی روچ ءَ ناں ایوک اسٹیج ءِ سر ءَ بیگواہ کُتگیں مردمانی ماتانی بزگی ءِ سر ءَ گپ بوت بلکیں جھل ءَ مردمانی مُچی ءَ ھم وزیر اعلی انگیر ءَ کُت ءُ ھمے جُست آئی ءِ دیم ءَ ایر کُت۔ آ دگہ گپے کہ ھرکس ءَ کد ءِ وت چار اِت۔ لھتیناں بیگواھیں مردماں پہ کُتگیں گپ دوست بوت انت ءُ آیاں ھما شنگ کُت انت ءُ لھتیناں زرانی بھر کنگ ءِ تامُر۔ بلے ھیر زرانی بھر کنگ ءِ کسہ ھم دیم ءَ بیت۔
شھید لالا ھمید چار راہ ءِ سر ءَ بوتگیں اے نندانک ءَ گوادر ءِ سیاسی جھد ءِ چیدگ پیش داشت۔ گوادر ءِ گوں مکران ءَ مھکمیں سیادی پیش داشت ءُ بلوچستان ءِ پدمنتگی ءُ بزگی ءِ نماھندگی پیش داشت۔ اے وڑ نہ انت کہ چد ءُ پیسر گوادر ءَ الس ءُ لس مردمانی سیاسی چست ءُ ایر نہ بوتگ انت۔ گوستگیں دہ یا دوازدہ سال پیسر ھم گوادر ھمے وڑ سیاسی بوتگ۔ جیمڑی ءِ شھیدانی چار راہ ئے کن ئے شر یا مُلا پازل ءِ پِڑ ئے کن ئے شر۔ گوادر ءِ نودربر ءُ لس دریاورد سیاسی بوتگ انت۔ کریمک ءِ ھوٹل روچ ءِ مرچی اشیی ءِ گواھی ءَ دنت۔
بلے میان ءِ اے دوازدہ ءُ دہ سالانی تہ ءَ گوادر ءَ را یک ماسکے دیم ءَ دیگ بوتگ ات۔ گوادر ءِ سیاسی سنچ ءُ شعور ءِ لپاشگ ءَ پہ زوریں ءُ وتگڑیں جاورے پیشدارگ بوتگ ات۔ لھتیں کُٹھم ءُ ٹولیاں گوں ریاست ءُ مافیاھانی ھور ءُ ھواری ءَ گوادر گاوادر جوڑ کُتگ ات۔ اے ٹولیاں ءُ مافیاھاں سوب کُت وھدے اد ءِ سیاسی مردم چست کنگ ءُ کُشگ بوت انت یا ھاموش ءُ بلیک میل کنگ بوت انت۔ پدا ھمے مافیاھاں نوکری ءُ لوکل ءُ نان لوکل ءِ نام ءَ مکران ءِ سیادی گوں گوادر ءَ سِندگ ءِ ھاتر ءَ ھمینچو کار کُت کہ گوادری نام ءَ را ایوک گوں یک نوکری ءَ بندوک کنائینت۔
ھمے مافیاھاں پہ وتی ذاتی نپ ءُ پاھدگاں گوادر ءِ آبادی گوں بلوچستان ءَ سندگ ءِ ھاتر ءَ اد ءِ سیاست ءِ تہ ءَ نوکیں دروشم ءِ سرداری نزامے آورت۔ ادا سردار ءِ وجود وَ نیست ات بلے آئی ءِ کُٹھمی برتری ھست ات۔ ءُ ھمے پدر کنگ بوھگ ءَ ات کہ گوادر ءِ مالک ایوک یک کُٹھمے۔ گوادر ءَ را مُلا ءُ ٹیکھدار ءُ زمین ءِ سوداگرانی تہ ءَ بھر کنگ بوت۔ ھمے ٹولی گوادر ءِ سیاہ ءُ اسپیت ءِ مالک کنگ بوت انت۔ بلے اے زرمبشت ءَ دوازدہ سال ءِ جتگیں سرمایہ، دروگیں دروشم ءُ ماسک یک دمانے ءَ دِرت ءُ ٹُکر کُت۔ گوادر پدا مکران ءُ بلوچستان ءِ ھمک مردم ءِ بوت۔
اے زرمبشت ءِ یک دگہ سوبمندی یے اِش انت کہ اشیی ءَ لس بلوچ ءُ ھما ٹولیانی تہ ءَ یک لکیرے کشت ءُ پدر کُت کہ ھما وت ءَ گوادر ءِ نماھندگ گُش انت کہ آ اسل ءَ کئی نماھندگ انت؟ ءُ لس گوادری بلوچ نودربر، دریاورد ءُ پوریاگر ءِ دیم آھانی اسلیت چے اِنت؟ ھما مُلا کہ ھمک جمعہ کشمیر ءُ فلستین ءِ سر ءَ زوراکیاں ایر جنت ءُ جزباتی بیت۔ آئی ءَ دہ دسمبر ءِ جمعہ روچ ءِ واز باریں چون کتگ۔ ءُ بیگاہ ءَ وت ءَ کجا چیر داتگ۔ چیاکہ دہ دسمبر ءِ جمعہ ءِ بیگاہ ءَ ھمے مُلاہ ءِ جند ئے لوگ ءِ مردم ھم انسانی ھکّانی روچ ءِ روانک ءَ گون بوتگ انت۔
لس مردمانی اے زرمبشت ءِ بابت ءَ لھتیں مردمانی خدشات ھمیش انت کہ اشیی ءَ جماعت اسلامی ھائی جیک کنگ لوٹگ ءَ بوتگ ءُ دیمتر ءَ وتی ووٹانی واستہ جماعت اسلامی اشیی ءِ کریڈٹ ءَ زور ایت۔ اے گپ ءِ کنوک دو وڑیں مردماں۔ یکے ھما کہ وت آھاں سر ءُ پاد جت بلے اے نندانک ھلاس کنائینت نہ کُت ءُ اونڈانی تہ ءَ ٹپ ات انت۔ نی آ ھمے تنقید ءَ کنگ ءَ انت۔ دومی ھما لس مردم کہ آیاں گوں ھچ ٹیکھدار ءُ مافیاھاں سیادی نیست۔ آ اے زرمبشت ءِ دل ءَ چہ منوگر انت بلے جماعت اسلامی ءِ گواستانک ءُ آئی ءِ سیاست ءِ گوں ریاستی ادارگانی سیادی ءِ سبب ءَ آ جماعت اسلامی ءِ سر ءَ اوست کُت نہ کن انت۔ بلے اے ھم اے زرمبشت ءُ نندانک ءِ یک سوبمندی یے کہ ادا چی جماعت اسلامی ءَ یک کلوہ یے رست کہ بلوچ چاگرد ءِ تہ ءَ انگت آئی ءَ را ھچ گنجائش نیست۔ ھمے مولانا ھدایت الرحمن بلوچ بیت یا لیاقت بلوچ۔ واجہ عبدالحق بلوچ بیت یا دگہ راھشونے۔ آ جماعت اسلامی ءِ بیرک ءَ زور ایت گڑا آئی ءِ مانا ءُ یک بلوچ ٹیکھدار ءُ سرداری سیاست کنوکے ءِ مانا یک۔ بلکیں آ ھم بنگالیانی کُشگ ءُ پنجاپ ءُ اسلام آباد ءِ شاہ دربرجاھانی تہ ءَ بلوچ نودربرانی جَنَگ ءُ بزگ کنگ ءَ ھوار اِنت۔ بلے گندئے ھمے مردم بِلّے توری جماعت اسلامی ءَ انت اگاں لس بلوچے ءِ بستار ءَ بلوچ ءِ گپ ءَ جنت۔ بلوچ آئی ءَ را سردار ءُ واجہ کار ءَ چہ گیش وتی دل ءَ جھگہ دنت۔
اے زرمبشت ءِ سوبمندی انت کہ اشیی ءَ اے کلوہ ھم تچک کُت ءُ دات کہ دینی ٹیکھدار ءُ سردار ءِ جھگہ بلوچ ءِ کر ءَ نیست۔ ءُ بلوچ وتی جھد ءَ وت دیم ءَ بارت ءُ اگاں کسے اے جھد ءِ تہ ءَ وتی نپ ءُ سیتانی ھاتر ءَ وتی راہ ءَ مٹ کنت آئی ءَ بلوچ ککے ھم بھئے نہ کنت۔
گُڈ سر ءَ ھمے تامرانی بابت ءَ کمو گپ کہ قدوس بزنجو نندانک ءِ سر ءَ زالبولاں زر دیگ ءَ انت۔ اے زر بھر کنگ ءِ کلچر ھمیش انت کہ گوادر ءِ اے زرمبشت آئی ءَ ھلاس کنگ ءِ نیم ءَ برگ ءَ ات۔ گوادر ءَ گوستگیں پانزدہ سال انت کہ ھمے سیاست ءِ بھر بوتگ۔ بزگیں دریاورد، جنوزام ءُ پوریاگر ءَ ووٹانی وھد ءَ بہ گِر داں انچیں روچاں سد ءُ دو سد کلدار دیگ بوتگ ءُ دیم دیگ بوتگ۔ اے بزگیں گوادری وتی یک کارے ءَ شُتگ بلے واتر گوں دوسد کلدار ءَ بوتگ۔ پدا اے دوسد کلدار زوروک ءَ ناں کدی وتی پدمنتگی ءِ جُست کُتگ ناں روزگار ءُ وانگ ءِ۔ اے دوسد کلدار زوروک انچش مُرتگ گش ئے زاناں آئی ءِ زند ءُ زمیر بھا بوتگ انت۔ اے بزگ پابند بوتگ کہ کدی فرزند ءُ ھر دل عزیز ءَ چہ ڈن در مئیت۔ اے وتی ھمے جاورانی سر ءَ رازی بہ بیت۔ قدوس ءَ ھمے زُلم کُت کہ ھمے پانزدہ سالی کلچر کہ اے زرمبشت آئی ءَ ھلاس کنگ لوٹگ ءَ ات کمو نزور کُت بلے اگاں قدوس ءَ چُش مہ کت ایں ھم اے نندانک ءِ ھلاس بوھگ ءَ رند چندیں روچ یا ماھاں پد پدا انچش بوتگ ات۔ بلے یک سوبمندی یے اے نندانک ءِ ھمیش ھم بیت کنت کہ لس مردم ھم چالاک بہ بنت اگاں سد ءُ ھزاریں کلداراں سر نہ گوز انت گڑا اے وڑ کت کن انت کہ اے زرّاں ھم دزبگر انت ءُ کُکار ءَ ھم ڈن ءَ دربیا انت۔ بلیک میل مہ بنت۔
No comments:
Post a Comment